Salmonan 104

BSNP Edit

104:1 Bendishoná SEÑOR, O mi alma! O SEÑOR mi Dios, Bo ta masha grandi; Bo ta bistí ku splendor i mahestat.

104:2 E ta kubri Su mes ku lus manera ku un mantel, E ta span e shelunan manera lona di tènt,

104:3 E ta pone e balkinan di Su kambernan-ariba den e awanan, E ta hasi e nubianan Su garoshi, E ta kana riba e halanan di bientu,

104:4 E ta hasi e bientunan Su mensaheronan, Su sirbidónan flam di kandela.

104:5 El a stablesé tera riba su fundeshinan, pa asina esei no kita for di su lugá nunka mas.

104:6 Bo a tap'é ku profundidat, manera ku un bistí; ariba di e serunan e awanan tabata keda para.

104:7 Debí na Bo reprendementu nan a hui; na e zonidu di Bo strena nan a pura bai.

104:8 Nan a subi pasa riba e serunan i a baha den e vayenan, na e lugá ku Bo a stablesé pa nan.

104:9 Bo a pone un frontera ku nan no por pasa, pa nunka mas nan no bolbe kubri tera.

104:10 E ta manda fuentenan den e vayenan; nan ta kore meimei di e serunan.

104:11 Nan ta duna di bebe na tur bestia di sabana; e burikunan di mondi ta kita nan set.

104:12 Banda di nan e parhanan di shelu tin nan neishi; nan ta kanta den e ramanan.

104:13 E ta muha e serunan for di Su kambernan-ariba; tera ta keda satisfecho ku e fruta di Su obranan.

104:14 E ta hasi yerba krese pa bestia, i vegetashon pa hende kultivá, pa asina e por saka pan for di e tera,

104:15 i biña ku ta hasi kurason di hende kontentu, zeta pa hasi su kara lombra, i pan ku ta fortalesé kurason di hende.

104:16 E palunan di SEÑOR ta haña sufisiente awa, e palunan di seda di Líbano, ku El a planta.

104:17 Ayanan e parhanan ta traha nan neishi, i e oyevar tin su kas den e palu di pino.

104:18 E serunan haltu ta pa kabritu di mondi; e barankanan, un refugio pa konènchi.

104:19 El a pone luna pa e temporadanan di aña; solo sa ki ora e mester baha.

104:20 Bo ta pone skuridat, i ta bira nochi; e ora ei tur bestia di mondi ta kuminsá move.

104:21 E leonnan chikitu ta gruña tras di nan proi, i ta buska nan kuminda for di Dios.

104:22 Ora solo sali nan ta retirá, i ta kai drumi den nan kueba.

104:23 Hende ta sali bai su trabou i ta traha te anochi.

104:24 O SEÑOR, ki numeroso Bo obranan ta! Ku sabiduria Bo a traha tur; tera ta yen di loke Bo a krea.

104:25 Ata e laman, grandi i hanchu, kaminda tin kantidat di bestia ku no por wòrdu kontá ta kriul den otro, bestia chikitu i grandi.

104:26 Aya barkunan ta pasa; i Leviatan, ku Bo a forma, ta hunga den djé.

104:27 Esakinan tur ta spera riba Bo, pa Bo duna nan kuminda na su debido tempu.

104:28 Bo ta duna nan, nan ta rekohé esaki; Bo ta habri Bo man, nan ta keda satisfecho ku kosnan bon.

104:29 Bo ta skonde Bo kara, nan ta desmayá; Bo ta kita nan rosea, nan ta muri i ta bolbe bira stòf.

104:30 Bo ta manda Bo Spiritu, nan ta wòrdu kreá; Bo ta renobá e superfisio di tera.

104:31 Laga e gloria di SEÑOR dura pa semper; laga SEÑOR regosihá den Su obranan.

104:32 E ta wak e tera, i esaki ta tembla; E ta mishi ku e serunan, i nan ta saka huma.

104:33 Lo mi kanta na SEÑOR tanten ku mi ta biba; lo mi kanta alabansa na mi Dios mientras ku mi tin bida.

104:34 Laga mi meditashon ta agradabel p'E; pa loke t'ami, lo mi alegrá mi mes den SEÑOR.

104:35 Laga pekadónan peresé for di riba tera, i no laga malbadonan eksistí mas. Bendishoná SEÑOR, O mi alma. Alabá SEÑOR!