Proverbionan 25

BSNP Edit

Proverbionan 25

25:1 Esakinan tambe ta proverbionan di Salomon, ku e hendenan di Ezekias, rei di Juda, a kopia.

25:2 Ta e gloria di Dios pa skonde un asunto, ma e gloria di reinan ta pa skudriñá un asunto.

25:3 Meskos ku e shelunan ta haltu, i tera ta profundo, asina e kurason di reinan ta inskudriñabel.

25:4 Kita e skuma for di e plata, anto lo sali un artíkulo-di-uzo pa e platé.

25:5 Kita e malbado for di e presensia di rei, i su trono lo wòrdu stablesí den hustisia.

25:6 No halsa bo mes den e presensia di rei, i no para den e lugá di e grandinan.

25:7 Pasobra ta mihó pa nan bisabo: "Subi bin aki riba," ku pa nan umiyábo den presensia di prens, kende bo wowo a mira.

25:8 No sea purá pa pleita bo kaso; pasobra kiko lo bo hasi na final, ora bo próhimo ponebo na bèrguensa?

25:9 Pleita bo kaso ku bo próhimo, i no revelá sekreto di un otro,

25:10 pa esun ku tende esaki no ponebo na bèrguensa, i bo reputashon keda ruiná.

25:11 Un palabra papiá na ora apropiá ta manera un apel di oro den montura di plata.

25:12 Manera un rench'i orea di oro i un adorno di oro fini, asina ta un reprendedó sabí pa un orea ku ta skucha.

25:13 Manera friu di sneu den tempu di kosecha, asina ta un mensahero fiel pa esnan ku ta mand'é, pasobra e ta refreská alma di su shonnan.

25:14 Manera nubia i bientu sin awaseru, asina ta un hende ku ta gaba regalo ku e no a duna.

25:15 Ku hopi pasenshi un gobernante por wòrdu pèrsuadí, i un lenga suave ta kibra wesu.

25:16 Bo a haña miel? Kome solamente loke bo mester, pa bo no yena di mas i sak'é bèk.

25:17 No pone pia den kas di bo próhimo ku muchu frekuensia, pa e no fada di bo i odiabo.

25:18 Manera un klòp, un spada i un flecha skèrpi, asina ta un hende ku ta duna testimonio falsu kontra su próhimo.

25:19 Konfiansa den un hende infiel den tempu di angustia ta manera un djente putrí i un pia saká for di lugá.

25:20 Manera un hende ku ta kita su paña riba un dia ku ta hasi friu, i manera binager riba soda, ta esun ku ta kanta kantika pa un kurason tristu.

25:21 Si bo enemigu tin hamber, dun'é pan pa kome, i si e tin set, dun'é awa pa bebe;

25:22 pasobra asina lo bo montoná karbon sendí riba su kabes, i SEÑOR lo rekompensábo.

25:23 Bientu di nòrt ta trese awaseru, i lenga ku ta kalumniá ta trese kara rabiá.

25:24 Mihó biba den un skina riba dak, ku biba den un kas huntu ku un muhé pleitadó.

25:25 Manera awa friu pa un alma ku tin set, asina ta bon notisia for di un tera leu.

25:26 Manera un fuente trublá i un pos kontaminá, asina ta un hende hustu ku ta kai dilanti di e malbado.

25:27 No ta bon pa kome hopi miel; tampoko no ta onorabel pa buska bo mes onor.

25:28 Esun ku no tin dominio riba su spiritu ta manera un stat bashá abou, sin muraya.

Proverbionan 24 Proverbionan 26