Filipensenan 2

BSNP Edit

Filipensenan 2

2:1 Pesei, si tin algun enkurashamentu den Cristo, si tin algun konsolashon di amor, si tin algun komunion di e Spiritu, si tin algun sintimentu profundo i kompashon,

2:2 hasi mi goso kompleto dor di keda di akuèrdo ku otro, manteniendo e mesun amor, uní den spiritu, teniendo un solo propósito.

2:3 No hasi nada ku un aktitut di egoismo òf orguyo, ma ku umildat laga kada un di boso konsiderá e otro mas importante ku e mes;

2:4 no buska boso interes personal so, ma buska tambe interes di otronan.

2:5 Laga tin den boso e aktitut aki ku tabatin tambe den Cristo Jesus,

2:6 Kende, ounke ku E tabata eksistí den e forma di Dios, no a konsiderá igualdat ku Dios algu pa tene na djé,

2:7 ma a bandoná Su mes gloria, tumando forma di un sirbidó, siendo trahá den e semehansa di hende.

2:8 I hañando Su mes den kondishon di hende, El a umiyá Su mes dor di bira obedesido te na morto, asta morto na un krus.

2:9 Pesei tambe Dios a hals'E te na e halturanan, i a dun'E e nòmber ku ta riba tur nòmber,

2:10 ku pa e nòmber di Jesus tur rudia mester dobla, di esnan ku ta den shelu, i riba tera, i bou di tera,

2:11 i ku tur lenga mester konfesá ku Jesu-Cristo ta Señor, pa e gloria di Dios Tata.

2:12 Asina anto, mi stimánan, meskos ku semper boso a obedesé, no manera den mi presensia solamente, ma awor muchu mas den mi ousensia, traha riba boso salbashon ku temor i temblamentu;

2:13 pasobra ta Dios ta Esun ku ta obra den boso, tantu pa kier komo pa hasi segun Su bon boluntat.

2:14 Hasi tur kos sin murmurá ni diskutí,

2:15 pa boso por proba boso mes di ta sin kulpa i inosente, yunan di Dios sin reproche meimei di un generashon korumpí i pèrvèrso, entre kualnan boso ta briya manera lusnan den mundu,

2:16 teniendo duru na e palabra di bida, pa den e dia di Cristo mi por tin motibu pa gloria, pasobra mi no a kore en bano, ni a traha en bano.

2:17 Ma ounke mi wòrdu bashá komo un ofrenda di bibida riba e sakrifisio i sirbishi di boso fe, mi ta regosihá i ta kompartí mi goso ku boso tur.

2:18 I boso tambe, regosihá na e mesun manera i kompartí boso goso ku mi.

2:19 Ma mi ta spera den Señor Jesus di manda Timoteo pronto serka boso, pa ami tambe por wòrdu enkurashá ora mi tende kon ta bai ku boso.

2:20 Pasobra mi no tin ni un otro hende di e mesun spiritu ku lo preokupá sinseramente pa boso bienestar.

2:21 Pasobra nan tur ta buska nan mes interesnan, no esnan di Cristo Jesus.

2:22 Ma boso tin prueba di su fieldat, ku el a sirbi huntu ku mi, manera un yu ku su tata, den e trabou di evangelio.

2:23 Pesei mi ta spera di mand'é mesora, asina ku mi mira kon ta bai ku mi mes asuntonan;

2:24 i mi ta konfia den Señor ku ami mes tambe lo bin pronto.

2:25 Ma mi a haña nesesario pa manda Epafrodito serka boso, mi ruman i mi kompañero sòldá, huntu ku mi, kende tambe ta boso mensahero i kende ta yudami den mi nesesidatnan;

2:26 pasobra e tabata anhelá na boso tur i tabata preokupá, pasobra boso a tende ku e tabata malu.

2:27 Pasobra di bèrdat e tabata malu pa muri, ma Dios a tene miserikòrdia di djé, i no solamente di djé ma di mi tambe, pa mi no mester tin tristesa riba tristesa.

2:28 Pesei mi a mand'é mas pronto posibel, pa ora boso mir'é atrobe, boso por regosihá, i ami por ta menos preokupá pa boso.

2:29 Pesei, risibié den Señor ku tur goso, i trata hòmbernan asina ku gran apresio;

2:30 pasobra el a hera muri pa e obra di Cristo, riskando su bida pa kompletá loke boso tabata falta den boso sirbishi na mi.

Filipensenan 1 Filipensenan 3