Filemon 1

BSNP Edit

Filemon 1

1:1 Pablo, un prizonero di Cristo Jesus, i Timoteo nos ruman, Na Filemon, nos ruman stimá i kolaborador,

1:2 i na Apia, nos ruman muhé, i na Arkipo, nos kompañero sòldá, i na e iglesia ku ta den bo kas:

1:3 Grasia na boso i pas di Dios nos Tata i di Señor Jesu-Cristo.

1:4 Mi ta gradisí mi Dios semper, rekòrdando bo den mi orashonnan,

1:5 pasobra mi ta tende di bo amor, i di e fe ku bo tin pa ku Señor Jesus i pa ku tur e santunan,

1:6 pa e komunion di bo fe bira efikas pa medio di e konosementu di tur kos bon ku ta den boso pa kousa di Cristo.

1:7 Pasobra mi a sinti gran goso i konsuelo den bo amor, pasobra e kurasonnan di e santunan a wòrdu refreská dor di bo, ruman.

1:8 Pesei, maske den Cristo mi tin basta konfiansa pa ordenábo pa hasi loke ta bo deber,

1:9 tòg, pa kousa di amor, mi ta mas bien suplikábo--siendo ku ami, Pablo, ta manera mi ta, un hòmber di edat, i awor, ademas, un prizonero di Cristo Jesus--

1:10 mi ta suplikábo pa mi yu Onésimo, kende mi a engendrá tempu ku mi tabata enkadená,

1:11 kende un tempu tabata inútil pa bo, ma awor ta útil, tantu pa bo komo pa mi.

1:12 I mi a mand'é bèk serka bo en persona, esta, mi mes kurason,

1:13 kende mi kier a tene serka mi, pa na lugá di abo e por a sirbimi tanten ku mi tabata enkadená pa kousa di evangelio;

1:14 ma sin bo konsentimentu mi no kier a hasi nada, pa bo bondat no parse komo si fuera ta algu obligatorio e ta, sino algu di bo propio boluntat.

1:15 Pasobra podisé ta pa e motibu aki el a wòrdu separá for di bo pa un tempu, pa bo por hañ'é bèk pa semper,

1:16 no mas komo esklabu, sino mas ku esklabu, un ruman stimá, spesialmente pa mi, ma kuantu mas pa bo, tantu den karni komo den Señor.

1:17 Si bo ta konsiderámi anto komo un kompañero, asept'é meskos ku lo bo a aseptámi.

1:18 Ma si el a ofendébo den kualkier forma, òf si e debebo kualkier kos, pone esei riba mi kuenta;

1:19 ami, Pablo, ta skirbi esaki ku mi mes man; lo mi paga p'é--pa mi no tin mester di bisabo ku abo ta debemi asta bo mes tambe.

1:20 Sí, ruman, lagami benefisiá di bo den Señor; refreská mi kurason den Cristo.

1:21 Teniendo konfiansa den bo obedensia, mi ta skirbibo, komo ku mi sa ku lo bo hasi asta mas ku loke mi ta bisa.

1:22 I na mesun tempu tambe prepará un posada pa mi, pasobra mi ta spera ku, pa medio di boso orashonnan, lo mi wòrdu entregá na boso.

1:23 Epafras, mi kompañero di prizon den Cristo Jesus, ta saludábo,

1:24 meskos Marko, Aristarko, Demas, Lukas, mi kolaboradornan.

1:25 Grasia di Señor Jesu-Cristo sea ku bo spiritu. Amèn.

Tito 3 Hebreonan 1