Numbernan 23

BSNP Edit

Numbernan 23

23:1 E ora ei Balaam a bisa Balak: "Traha shete altar pa mi akinan, i prepará shete bishé machu i shete karné chubatu pa mi akinan."

23:2 I Balak a hasi meskos ku Balaam a bisa, i Balak ku Balaam a ofresé un bishé machu i un karné chubatu riba kada altar.

23:3 E ora ei Balaam a bisa Balak: "Para banda di bo ofrenda kimá, i ami lo bai. Kisas SEÑOR lo bin serka mi, i kiko ku E mustrami lo mi kontabo." Asina Balaam a bai na un seru pelon.

23:4 Awor Dios a topa ku Balaam, i el a bisa Dios: "Mi a lanta e shete altarnan, i mi a ofresé un bishé machu i un karné chubatu riba kada altar."

23:5 Anto SEÑOR a pone un palabra den Balaam su boka i a bisa: "Bolbe serka Balak i bo mester papia asina."

23:6 Asina el a bolbe serka djé, i mira, e tabata pará banda di su ofrenda kimá, é ku tur e lidernan di Moab.

23:7 I el a kuminsá su parábola i a bisa: "For di Aram Balak a tresemi, rei di Moab for di e serunan di Oriente: 'Bin maldishoná Jakòb pa mi, i bin, denunsiá Israel!'

23:8 Kon lo mi maldishoná esun ku Dios no a maldishoná? I kon mi por denunsiá esun ku SEÑOR no a denunsiá?

23:9 Ora mi mir'é for di punta di e barankanan, i mi wak é for di e serunan, ata, un pueblo ku ta biba apartá, i ku lo no wòrdu kontá entre e nashonnan.

23:10 Ken por konta e stòf di Jakòb, òf numerá e di kuater parti di Israel? Lagami muri morto di hende hustu, i laga mi fin ta manera esun di djé!"

23:11 E ora ei Balak a bisa Balaam: "Kiko bo a hasi ku mi? Mi a buskabo pa maldishoná mi enemigunan, ma mira, ta bendishoná bo a bendishoná nan!"

23:12 I Balaam a kontestá i a bisa: "Mi no mester pèrkurá di papia loke SEÑOR pone den mi boka?"

23:13 E ora ei Balak a bis'é: "Pa fabor, ban ku mi na un otro lugá for di unda bo por mira nan, ounke ku lo bo mira solamente un parti di nan i lo no mira tur di nan; i maldishoná nan pa mi for di ayanan."

23:14 Asina el a hib'é na e kunuku di Zofim, na e kabes di seru di Pisga i a traha shete altar i a ofresé un bishé machu i un karné chubatu riba kada altar.

23:15 I el a bisa Balak: "Keda para aki banda di bo ofrenda kimá, mientras ku ami mes ta bai kontra ku SEÑOR aya banda."

23:16 E ora ei SEÑOR a topa ku Balaam i a pone un palabra den su boka i a bisa: "Bolbe serka Balak i asina bo mester papia."

23:17 Anto el a bin serka djé, i mira, e tabata pará banda di su ofrenda kimá, i e lidernan di Moab huntu kuné. I Balak a bis'é: "Kiko SEÑOR a bisa?"

23:18 E ora ei el a kuminsá su parábola i a bisa: "Lanta, O Balak, i tende; skuchami, O yu hòmber di Zipor!

23:19 Dios no ta hende, ku E lo gaña, ni yu di hende, ku E lo repentí. Akaso El a bisa, i E lo no hasié? Of El a papia, i E lo no kumpli?

23:20 Mira, mi a risibí un òrdu pa bendishoná; ora ku El a bendishoná, ami no por kambia esaki.

23:21 "E no a mira inikidat den Jakòb; ni E no a mira maldat den Israel; SEÑOR su Dios ta kuné, i e gritu di un rei ta meimei di nan.

23:22 Dios ta saka nan for di Egipto; E ta pa nan manera e kachunan di buey di mondi.

23:23 Pasobra no tin pronostikashon kontra Jakòb, ni no tin adivinashon kontra Israel. Na e tempu apropiá lo wòrdu bisá na Jakòb i na Israel kiko Dios a hasi.

23:24 Mira, un pueblo ta lanta manera leon muhé, i manera leon e ta lanta para; e lo no kai drumi te ora ku e devorá e proi, i bebe sanger di esnan ku a wòrdu matá."

23:25 E ora ei Balak a bisa Balaam: "No maldishoná nan di ningun manera, ni bendishoná nan di ningun manera!"

23:26 Ma Balaam a kontestá i a bisa Balak: "Mi no a bisabo: 'Kiko ku SEÑOR papia, ta esei mi mester hasi'?"

23:27 E ora ei Balak a bisa Balaam: "Pa fabor, bin, lo mi hibabo na un otro lugá; kisas lo agradá Dios pa bo maldishoná nan pa mi for di ayanan."

23:28 Asina Balak a hiba Balaam na e kabes di seru di Peor ku ta mira ofer di e desierto.

23:29 I Balaam a bisa Balak: "Traha shete altar pa mi akinan i prepará shete bishé machu i shete karné chubatu pa mi akinan."

23:30 I Balak a hasi meskos ku Balaam a bisa, i a ofresé un bishé machu i un karné chubatu riba kada altar.

Numbernan 22 Numbernan 24