Numbernan 2

BSNP Edit

Numbernan 2

2:1 Awor SEÑOR a papia ku Moisés i Aaron, bisando:

2:2 "E yunan di Israel mester kampa, kada un bou di su mes emblema, ku e banderanan di e hendenan di e kasnan di nan tatanan; nan mester kampa rònt di e tènt di reunion, na un distansia.

2:3 "Awor esnan ku ta kampa na e banda pariba, den direkshon di kaminda solo ta sali, mester ta bou di bandera di e kampamentu di Juda, segun nan ehérsitonan, i e lider di e yu hòmbernan di Juda: Nason, yu hòmber di Aminadab,

2:4 i su ehérsito, nan hòmbernan kontá, 74.600.

2:5 I esnan ku ta kampa banda di djé mester ta e tribu di Isakar, i e lider di e yu hòmbernan di Isakar: Natanael, yu hòmber di Zuar,

2:6 i su ehérsito, nan hòmbernan kontá, 54.400.

2:7 Despues ta sigui e tribu di Zabulon, i e lider di e yu hòmbernan di Zabulon: Eliab, yu hòmber di Helon,

2:8 i su ehérsito, su hòmbernan kontá, 57.400.

2:9 E total di e hòmbernan kontá di e kampamentu di Juda: 186.400, segun nan ehérsitonan. Nan mester sali bai promé.

2:10 "Na e banda pasùit e emblema di e kampamentu di Ruben mester ta, segun nan ehérsitonan, i e lider di e yu hòmbernan di Ruben: Elisur, yu hòmber di Sedeur,

2:11 i su ehérsito, nan hòmbernan kontá, 46.500.

2:12 I esnan ku ta kampa banda di djé mester ta e tribu di Simeon, i e lider di e yu hòmbernan di Simeon: Selumiel, yu hòmber di Zurisadai,

2:13 i su ehérsito, nan hòmbernan kontá, 59.300.

2:14 Despues ta sigui e tribu di Gad, i e lider di e yu hòmbernan di Gad: Eliasaf, yu hòmber di Deuel,

2:15 i su ehérsito, nan hòmbernan kontá, 45.650.

2:16 E total di e hòmbernan kontá di e kampamentu di Ruben: 151.450, segun nan ehérsitonan. I nan mester sali bai na di dos lugá.

2:17 "E ora ei e tènt di reunion mester sali bai huntu ku e kampamentu di e levitanan meimei di e kampamentunan; meskos ku nan ta kampa, asina nan mester sali bai, kada hòmber na su lugá, bou di nan emblemanan.

2:18 "Na e banda pabou e emblema di e kampamentu di Efrain mester ta, segun nan ehérsitonan, i e lider di e yu hòmbernan di Efrain lo ta Elisama, yu hòmber di Amiud,

2:19 i su ehérsito, nan hòmbernan kontá, 40.500.

2:20 I banda di djé e tribu di Manasés lo ta, i e lider di e yu hòmbernan di Manasés: Gamaliel, yu hòmber di Pedasur,

2:21 i su ehérsito, nan hòmbernan kontá, 32.200.

2:22 Despues ta sigui e tribu di Benjamin i e lider di e yu hòmbernan di Benjamin: Abidan, yu hòmber di Gideoni,

2:23 i su ehérsito, nan hòmbernan kontá, 35.400.

2:24 E total di e hòmbernan kontá di e kampamentu di Efrain: 108.100, segun nan ehérsitonan. I nan mester sali bai na di tres lugá.

2:25 "Na e banda panòrt e emblema di e kampamentu di Dan mester ta, segun nan ehérsitonan, i e lider di e yu hòmbernan di Dan: Ahiezer, yu hòmber di Amisadai,

2:26 i su ehérsito, nan hòmbernan kontá, 62.700.

2:27 I esnan ku ta kampa banda di djé mester ta e tribu di Aser, i e lider di e yu hòmbernan di Aser: Pagiel, yu hòmber di Okran,

2:28 i su ehérsito, nan hòmbernan kontá, 41.500.

2:29 Despues ta sigui e tribu di Nèftalí, i e lider di e yu hòmbernan di Nèftalí: Ahira, yu hòmber di Enan,

2:30 i su ehérsito, nan hòmbernan kontá, 53.400.

2:31 E total di e hòmbernan kontá di e kampamentu di Dan tabata 157.600. Nan mester sali bai último bou di nan emblemanan."

2:32 Esakinan ta e hòmbernan kontá di e yunan di Israel, segun e hendenan di e kasnan di nan tatanan; e total di e hòmbernan kontá di e kampamentunan, segun nan ehérsitonan, tabata 603.550.

2:33 Sinembargo, e levitanan no a wòrdu kontá entre e yunan di Israel, meskos ku SEÑOR a ordená Moisés.

2:34 Asina e yunan di Israel a hasi; konforme tur loke SEÑOR a ordená Moisés, asina nan a kampa bou di nan emblemanan, i asina nan a sali bai, kada un segun su famia, segun e hendenan di e kas di su tata.

Numbernan 1 Numbernan 3