Nehemias 3
3:1
E ora ei sumosaserdote Eliasib a lanta huntu ku su rumannan, e saserdotenan, i a traha e Porta di Karné; nan a konsagr'é i a kologá su portanan. Nan a konsagrá e muraya di e Toren di Shen i e Toren di Hananeel.
3:2
Banda di djé e hòmbernan di Jeriko a traha, i banda di nan Zakur, yu hòmber di Imri, a traha.
3:3
Awor e yu hòmbernan di Senaa a traha e Porta di Piská; nan a pone su balkinan i a kologá su portanan ku su boltnan i baranan.
3:4
I banda di nan Meremot, yu hòmber di Urias, yu hòmber di Kos, a hasi reparashon. I banda di djé Mesulam, yu hòmber di Berekias, yu hòmber di Mesezabel, a hasi reparashon. I banda di djé Sadok, yu hòmber di Baana, tambe a hasi reparashon.
3:5
Ademas, banda di djé e tekoitanan a hasi reparashon, ma nan nobelnan no a apoyá e trabou di nan shonnan.
3:6
I Joiada, yu hòmber di Paseah, i Mesulam, yu hòmber di Besodias, a drecha e Porta Bieu; nan a pone su balkinan i a kologá su portanan ku su boltnan i su baranan.
3:7
Banda di nan Melatias e gabaonita, Jadon e meronotita, e hòmbernan di Gabaon i di Mizpa, tambe a hasi reparashon pa e asiento ofisial di e gobernadó di e provinsia na e otro banda di Riu Eufrates.
3:8
Banda di djé Uziel, yu hòmber di Harhaia, un di e platénan, a hasi reparashon. I banda di djé Hananias, un di e trahadónan di perfume, a hasi reparashon, i nan a restorá Jerusalèm te na e Muraya Hanchu.
3:9
I banda di nan Refaias, yu hòmber di Hur, ofisial di e mitar distrikto di Jerusalèm, a hasi reparashon.
3:10
Banda di nan Jedaias, yu hòmber di Harumaf, a hasi reparashon enfrente di su kas. I banda di djé Hatus, yu hòmber di Hasabnias, a hasi reparashon.
3:11
Malkias, yu hòmber di Harim, i Hasub, yu hòmber di Pahat-moab, a drecha un otro sekshon i e Toren di Fòrnunan.
3:12
I banda di djé Salum, yu hòmber di Halohes, ofisial di e mitar distrikto di Jerusalèm, a hasi reparashon, é ku su yu muhénan.
3:13
Hanun i e habitantenan di Zanoa a drecha e Porta di Vaye. Nan a trah'é i a kologá su portanan ku su boltnan i su baranan, i mil kodo di e muraya te na e Porta di Mèst.
3:14
I Malkias, yu hòmber di Rekab, ofisial di e distrikto di Bèt-hakerem, a drecha e Porta di Mèst. El a trah'é i a kologá su portanan ku su boltnan i su baranan.
3:15
Salum, yu hòmber di Kolhoze, ofisial di e distrikto di Mizpa, a drecha e Porta di Fuente. El a trah'é, a fur'é i a kologá su portanan ku su boltnan i su baranan, i e muraya di e Tanki di Awa di Siloé na e hòfi di rei te na e trapinan ku ta baha for di e stat di David.
3:16
Despues di djé Nehemias, yu hòmber di Azbuk, ofisial di e mitar distrikto di Bèt-sur, a hasi reparashon te na un punto enfrente di e tumbanan di David, i te na e tanki-di-awa artifisial i te na e Kas di e Hòmbernan Poderoso.
3:17
Despues di djé e levitanan a hasi reparashon bou di mando di Rehum, yu hòmber di Bani. Banda di djé Hasabias, ofisial di e mitar distrikto di Keila, a hasi reparashon pa su distrikto.
3:18
Despues di djé nan ruman hòmbernan a hasi reparashon bou di mando di Bavai, yu hòmber di Henadad, ofisial di e otro mitar distrikto di Keila.
3:19
I banda di djé Ezer, yu hòmber di Jesúa, e ofisial di Mizpa, a drecha un otro sekshon dilanti di e subida di e lugá di warda arma na e Angulo.
3:20
Despues di djé Baruk, yu hòmber di Zabai, a drecha un otro sekshon ku masha ánimo, for di e Angulo te na entrada di e kas di sumosaserdote Eliasib.
3:21
Despues di djé Meremot, yu hòmber di Urias, yu hòmber di Kos, a drecha un otro sekshon, for di entrada di e kas di Eliasib te na fin di su kas.
3:22
I despues di djé e saserdotenan, e hòmbernan di e vaye, a hasi reparashon.
3:23
Despues di nan Benjamin i Hasub a hasi reparashon dilanti di nan kas. Despues di nan Azarias, yu hòmber di Maaseias, yu hòmber di Ananias, a hasi reparashon banda di su kas.
3:24
Despues di djé Binui, yu hòmber di Henadad, a drecha un otro sekshon, for di e kas di Azarias te na e Angulo i te na e skina.
3:25
Palal, yu hòmber di Uzai, a hasi reparashon dilanti di e Angulo i e toren haltu ku ta sali for di e kas-ariba di rei, ku ta keda na e plenchi di e guardia. Despues di djé Pedaias, yu hòmber di Faros, a hasi reparashon.
3:26
I e sirbidónan di tèmpel ku tabata biba na Ofel a hasi reparashon te dilanti di e Porta di Awa, parti pariba, i e toren ku ta sali for di e kas-ariba.
3:27
Despues di djé e tekoitanan a drecha un otro sekshon dilanti di e toren grandi ku ta sali for di e kas-ariba, i te na e muraya di Ofel.
3:28
For di e Porta di Kabai e saserdotenan a hasi reparashon, kada un dilanti di su kas.
3:29
Despues di nan Sadok, yu hòmber di Imer, a hasi reparashon dilanti di su kas. I despues di djé Semaias, yu hòmber di Sekanias, wardadó di e Porta Pariba, a hasi reparashon.
3:30
Despues di djé Hananias, yu hòmber di Selemias, i Hanun, e di seis yu hòmber di Salaf, a drecha un otro sekshon. Despues di djé Mesulam, yu hòmber di Berekias, a hasi reparashon dilanti di su mes kamber.
3:31
Despues di djé Malkias, un di e platénan, a hasi reparashon te na e kas di e sirbidónan di tèmpel i di e komersiantenan, dilanti di e Porta di Inspekshon i te na e sala-ariba na e skina.
3:32
I entre e sala-ariba na e skina i e Porta di Karné e platénan i e komersiantenan a hasi reparashon.