Mikeas 5
5:1
"Awor reuní boso mes den trupanan, yu muhé di trupanan; nan a rondoná nos; ku un bara nan lo dal e hues di Israel na su band'i kara.
5:2
"Ma abo, Bètlehèm Efrata, muchu chikitu pa ta entre e famianan di Juda, for di bo lo sali Uno pa Mi pa ta Gobernante na Israel. Su origen ta for di hopi tempu pasá, for di e dianan di etèrnidat."
5:3
Pesei E lo entregá nan te ora ku esun ku tin doló di parto a haña yu. E ora ei esnan ku keda di Su rumannan lo bolbe serka e yunan di Israel.
5:4
I E lo lanta i pastoriá Su tou den e forsa di SEÑOR, den e mahestat di e nòmber di SEÑOR Su Dios. I nan lo keda, pasobra na e tempu ei E lo ta grandi te na e finnan di tera.
5:5
I Esun aki lo ta nos pas. Ora ku e asirio invadí nos tera, ora ku e trapa riba nos sitadelnan, e ora ei nos lo lanta kontra djé shete wardadó di karné, sí, ocho lider di hende.
5:6
I nan lo pastoriá e tera di Asiria ku spada, e tera di Nimròd na su entradanan; i E lo libra nos for di e asirio ora ku e ataká nos tera i ora ku e trapa nos teritorio.
5:7
E ora ei e restante di Jakòb lo ta meimei di hopi pueblo, manera serena for di SEÑOR, manera yobidanan di awa riba vegetashon ku no ta warda riba hende, ni ta tarda pa e yunan di hende.
5:8
I e restante di Jakòb lo ta entre e nashonnan, entre hopi pueblo, manera un leon entre e bestianan di mondi-será, manera un leon chikitu entre tounan di karné, ku, si e pasa einan, ta trapa i ta sker, i no tin ningun hende pa reskatá.
5:9
Bo man lo wòrdu lantá kontra bo atversarionan, i tur bo enemigunan lo wòrdu kòrtá kitá afó.
5:10
"I lo sosodé den e dia ei," SEÑOR ta deklará, "ku lo Mi kòrta bo kabainan kita for di meimei di bo i destruí bo garoshinan.
5:11
Tambe lo Mi kòrta e statnan di bo tera kit'afó i basha tur bo lugánan fortifiká abou.
5:12
Lo Mi kòrta tur bruheria kita for di bo man, i lo bo no tin miradónan di destino mas.
5:13
Lo Mi kòrta bo imagennan grabá kit'afó i bo pilarnan sagrado for di meimei di bo, asina ku lo bo no bùig mas pa e obra di bo mannan.
5:14
Lo Mi ranka bo imagennan di Asera kita for di meimei di bo, i destruí bo statnan.
5:15
I lo Mi ehekutá vengansa ku rabia i furia riba e nashonnan ku no a obedesé."