Mateo 6
6:1
"Pèrkurá pa boso no hasi boso obranan di karidat dilanti di hende, pa nan mira; sino boso lo no tin rekompensa serka boso Tata ku ta den shelu.
6:2
"Pesei, ora bo ta hasi bo obranan di karidat, no laga toka tròmpèt bo dilanti, manera e hipokrítnan ta hasi den snoa i riba kaya pa nan risibí onor serka hende. Di bèrdat Mi ta bisa boso, ya nan tin nan pago kaba.
6:3
Ma ora bo ta duna limosna, no laga bo man robes sa kiko bo man drechi ta hasi,
6:4
pa bo limosna keda den skondí; i bo Tata, ku ta mira den skondí, lo rekompensábo.
6:5
"I ora bo ta hasi orashon, no sea manera e hipokrítnan, pasobra nan ta gusta para hasi orashon den snoa i na skina di kaya, pa hende mira nan. Di bèrdat Mi ta bisa boso, ya nan tin nan pago kaba.
6:6
Ma abo, ora bo ta hasi orashon, bai den bo kamber di mas paden, i ora bo a sera bo porta, hasi orashon na bo Tata ku ta den skondí; i bo Tata, ku ta mira den skondí, lo rekompensábo.
6:7
I ora bo ta hasi orashon, no keda ripití palabranan bano manera e paganonan ta hasi, pasobra nan ta kere ku nan lo wòrdu tendí pa motibu di nan kantidat di palabra.
6:8
Pesei, no sea meskos ku nan, pasobra boso Tata sa kiko boso tin mester, promé ku boso pidiE.
6:9
"Pues, hasi orashon anto asin'aki: 'Nos Tata ku ta den shelu, Bo nòmber sea santifiká.
6:10
Ku Bo reino bin. Ku Bo boluntat sosodé na tera meskos ku den shelu.
6:11
Duna nos awe nos pan di kada dia.
6:12
I pordoná nos nos debenan, meskos ku nos tambe ta pordoná nos debedónan.
6:13
I no hiba nos den tentashon, ma libra nos for di e malbado. [Pasobra di Bo e reino ta, i e poder i e gloria, pa semper. Amèn].'
6:14
Pasobra si boso pordoná hende nan transgreshonnan, boso Tata selestial tambe lo pordoná boso.
6:15
Ma si boso no pordoná hende, boso Tata tampoko lo no pordoná boso transgreshonnan.
6:16
"I ki ora ku boso ta yuna, no traha kara tristu manera e hipokrítnan, pasobra nan ta neglishá nan aparensia pa hende mira ku nan ta yuna. Di bèrdat Mi ta bisa boso, ya nan tin nan rekompensa kaba.
6:17
Ma abo, ora bo ta yuna, hunta bo kabes ku zeta i laba bo kara,
6:18
pa hende no mira ku bo ta yuna, sino solamente bo Tata ku ta den skondí; i bo Tata, ku ta mira den skondí, lo rekompensábo.
6:19
"No montoná tesoro pa boso mes riba tera, kaminda mòt i frustu ta destruí nan, i kaminda ladron ta kibra drenta i hòrta;
6:20
ma montoná tesoro pa boso mes den shelu, kaminda ni mòt ni frustu no ta destruí nan, i kaminda ladron no ta kibra drenta ni hòrta;
6:21
pasobra kaminda boso tesoro ta, einan boso kurason lo ta tambe.
6:22
"Lampi di e kurpa ta e wowo; asina ku si bo wowo ta bon, henter bo kurpa lo ta yen di lus.
6:23
Ma si bo wowo ta malu, henter bo kurpa lo ta yen di skuridat. Asina anto, si e lus ku ta den bo ta skuridat, ki grandi e skuridat ei ta!
6:24
"Ningun hende no por sirbi dos shon; pasobra òf e lo odia esun i stima e otro, òf e lo ta leal na esun i despresiá e otro. Boso no por sirbi Dios i rikesa.
6:25
"Pa e motibu aki Mi ta bisa boso, no preokupá boso mes pa boso bida, kiko boso lo kome òf kiko boso lo bebe; tampoko pa boso kurpa, kiko boso lo bisti. Bida no ta mas ku kuminda, i kurpa mas ku paña di bisti?
6:26
Mira e parhanan di shelu ku no ta sembra ni kosechá, ni ta warda den mangasina, i tòg boso Tata selestial ta alimentá nan. Boso no tin muchu mas balor ku nan?
6:27
I kual di boso, dor di preokupá, por añadí ún kodo na su haltura?
6:28
"I pakiko boso ta preokupá boso mes ku bistimentu? Mira kon e lelinan di sabana ta krese; nan no ta traha mata kurpa, ni nan no ta hila,
6:29
ma Mi ta bisa boso ku asta Salomon den tur su gloria no tabata bistí manera un di esakinan.
6:30
Ma si di tal manera Dios ta bisti e yerba di sabana, ku awe t'ei i mañan ta wòrdu tirá den fòrnu, lo E no hasi muchu mas pa boso, O hendenan di poko fe?
6:31
No preokupá boso mes anto, bisando: 'Kiko nos lo kome?' òf 'Kiko nos lo bebe?' òf 'Kiko nos lo bisti?'
6:32
Pasobra tur e kosnan aki e paganonan ta buska; ma boso Tata selestial sa ku boso tin mester di tur e kosnan aki.
6:33
Ma buska promé e reino di Dios i Su hustisia, i tur e kosnan aki lo wòrdu añadí na boso.
6:34
Pesei, no preokupá boso mes pa e dia di mañan; pasobra e dia di mañan lo pèrkurá pa su mes. Kada dia tin sufisiente problema di su mes.