Mateo 24

BSNP Edit

Mateo 24

24:1 I Jesus a sali for di tèmpel i tabata kana bai ora Su disipelnan a bin serka djE pa mustr'E e edifisionan di tèmpel.

24:2 I El a kontestá i a bisa nan: "Boso no ta mira tur e kosnan aki? Di bèrdat Mi ta bisa boso, akinan lo no keda ni un piedra riba otro, ku lo no wòrdu bashá abou."

24:3 I ora ku E tabata sintá riba Seru di Oleifi, e disipelnan a bin nan so serka djE, bisando: "Bisa nos, ki tempu e kosnan aki lo sosodé, i kiko lo ta e señal di Bo binida i di e fin di tempu?"

24:4 I Jesus a kontestá i a bisa nan: "Mira pa ningun hende no gaña boso.

24:5 Pasobra hopi lo bin den Mi nòmber, bisando: 'Ta ami ta e Cristo,' i lo gaña hopi hende.

24:6 I boso lo tende di gueranan i rumornan di gueranan; mira pa boso no spanta, pasobra e kosnan ei mester tuma lugá, ma ainda no ta e fin.

24:7 Pasobra nashon lo lanta kontra nashon, i reino kontra reino. I na varios lugá lo tin hamber i temblor.

24:8 Ma tur e kosnan aki ta e prinsipio di dolónan di parto.

24:9 "E ora ei nan lo entregá boso na tribulashon i lo mata boso, i tur nashon lo odia boso pa kousa di Mi nòmber.

24:10 I na e tempu ei hopi lo trompeká i lo entregá otro i odia otro.

24:11 I hopi profeta falsu lo lanta i lo gaña hopi hende.

24:12 I pasobra inikidat ta oumentá, amor di hopi hende lo fria.

24:13 Ma esun ku pèrseverá te na fin, esei lo ta salbá.

24:14 I e evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.

24:15 "Pesei, ora boso mira e ABOMINASHON DI DESOLASHON, ku profeta Daniel a papia di djé, ta para den e lugá santu (laga esun ku ta lesa, komprendé),

24:16 e ora ei laga esnan ku ta na Judea hui bai na e serunan;

24:17 no laga esun ku ta riba dak baha pa saka e kosnan ku ta den su kas bai kuné;

24:18 i no laga esun ku ta den kunuku bai bèk pa kohe su mantel.

24:19 Ma ai di esnan ku ta na estado i esnan ku ta kria yu na pechu den e dianan ei!

24:20 Ma hasi orashon pa boso huída no sosodé den wenter, ni riba un dia di Sabat;

24:21 pasobra e ora ei lo tin un gran tribulashon, manera nunka tabatin for di prinsipio di mundu te awor aki, i ku lo no tin nunka mas tampoko.

24:22 I si e dianan ei no a wòrdu hasí mas kòrtiku, ningun bida lo no a wòrdu salbá; ma pa kousa di e eligínan e dianan ei lo wòrdu hasí mas kòrtiku.

24:23 E ora ei, si un hende bisa boso: 'Mira, ata e Cristo aki,' òf 'At'E aya,' no ker'é.

24:24 Pasobra Cristonan falsu i profetanan falsu lo lanta, i lo hasi señalnan i maraviyanan grandi pa gaña, si ta posibel, asta e eligínan.

24:25 Mira, Mi a bisa boso di antemano.

24:26 "Pesei, si nan bisa boso: 'At'E ta den desierto,' no sali bai, òf: 'At'E ta den e kambernan mas paden,' no kere nan.

24:27 Pasobra meskos ku lamper ta bin for di pariba, i ta kòrta te pabou, asina binida di e Yu di Hende lo ta.

24:28 Kaminda e kadaver ta, einan e águilanan lo reuní.

24:29 "Ma mesora, despues di e tribulashon di e dianan ei, 'solo lo bira skur i luna lo no duna su klaridat i e streanan lo kai for di shelu, i e podernan di e shelunan lo wòrdu sakudí.'

24:30 "E ora ei e señal di e Yu di Hende lo paresé na shelu, i e ora ei tur e tribunan di riba tera lo lamentá, i nan lo mira e Yu di Hende ta bin riba e nubianan di shelu ku poder i gran gloria.

24:31 I E lo manda Su angelnan ku un zonidu duru di tròmpèt i nan lo reuní Su eligínan for di e kuater bientunan, for di esun ekstremo di shelu te na e otro.

24:32 "Awor siña e parábola aki for di e palu di figo: ora su rama a bira moli kaba, i e saka su blachinan, boso sa ku zomer ta serka;

24:33 asina boso tambe, ora boso mira tur e kosnan aki, sabi ku E ta serka, dilanti di porta.

24:34 Di bèrdat Mi ta bisa boso ku e generashon aki lo no pasa promé ku tur e kosnan aki tuma lugá.

24:35 Shelu i tera lo pasa, ma Mi palabranan lo no pasa.

24:36 "Ma di e dia i e ora ei ningun hende no sa, ni e angelnan di shelu tampoko, ni e Yu, sino e Tata so.

24:37 Pasobra e binida di e Yu di Hende lo ta meskos ku e dianan di Noe.

24:38 Pasobra meskos ku den e dianan ei ku tabata promé ku e diluvio, nan tabata kome i bebe, nan tabata kasa i duna pa kasa, te dia ku Noe a bai den e arka,

24:39 i nan no a komprendé te ora ku e diluvio a bin i a bai ku nan tur, asina e binida di e Yu di Hende lo ta.

24:40 E ora ei lo tin dos hòmber den kunuku; ún lo wòrdu tumá i e otro lo wòrdu lagá atras.

24:41 Dos muhé lo ta mula na mulina; ún lo wòrdu tumá i e otro lo wòrdu lagá atras.

24:42 "Sea alerta anto, pasobra boso no sa ki dia boso Señor ta bin.

24:43 Ma sea sigur di esaki, ku si e kabes di kas tabata sa den ki ora di anochi e ladron tabata di bin, e lo a keda alerta i lo no a pèrmití pa kibra drenta su kas.

24:44 Pa e motibu aki boso tambe sea prepará, pasobra e Yu di Hende lo bin na un ora ku boso no ta pensa.

24:45 "Ken anto ta e esklabu fiel i prudente ku su shon a laga enkargá ku su kas pa duna nan nan kuminda na su debido tempu?

24:46 Bendishoná ta e esklabu ei, ku su shon ta haña ta hasi asina ora ku e bin.

24:47 Di bèrdat Mi ta bisa boso ku e lo lagu'é keda na enkargo di tur su propiedatnan.

24:48 Ma si e esklabu malbado ei bisa den su kurason: 'Mi shon lo no bin p'awor,'

24:49 i e kuminsá bati su kompañeronan-esklabu i kome i bebe huntu ku burachénan,

24:50 e shon di e esklabu ei lo bin riba un dia ku e no ta sper'é i na un ora ku e no sa,

24:51 i lo kòrt'é na pida-pida i lo dun'é un lugá huntu ku e hipokrítnan; ayanan lo tin yoramentu i mordementu riba djente.

Mateo 23 Mateo 25