Mateo 15

BSNP Edit

Mateo 15

15:1 E ora ei algun fariseo i eskriba a bin serka Jesus for di Jerusalèm, bisando:

15:2 "Pakiko Bo disipelnan ta kibra e tradishon di e ansianonan? Pasobra nan no ta laba man ora nan ta kome pan."

15:3 I El a kontestá i a bisa nan: "I pakiko boso mes ta kibra e mandamentu di Dios pa motibu di boso tradishon?

15:4 Pasobra Dios a bisa: 'Onra bo tata i bo mama'; i 'Esun ku maldishoná tata òf mama, lagu'é wòrdu matá.'

15:5 Ma boso ta bisa: 'Ken ku bisa su tata òf su mama: "Tur loke mi tin, ku mi por a yuda boso kuné, a wòrdu duná na Dios,"

15:6 no tin mester di onra su tata òf su mama.' I asina boso a hasi e palabra di Dios bira inefektivo pa kousa di boso tradishon.

15:7 Boso, hipokrítnan, ku rason Isaias a profetisá di boso, bisando:

15:8 'E pueblo aki ta onraMi ku nan lepnan, ma nan kurason ta leu for di Mi.

15:9 I ta en bano nan ta adoráMi, siñando preseptonan di hende komo doktrina.'"

15:10 I El a yama e multitut serka djE i a bisa nan: "Tende i komprendé!

15:11 No ta loke ta bai den boka ta kontaminá hende, ma loke ta sali for di boka, ta esei ta kontaminá hende."

15:12 E ora ei e disipelnan a bin i a bis'E: "Bo sa ku e fariseonan a sinti nan mes ofendí ora nan a tende e palabra aki?"

15:13 Ma El a kontestá i a bisa: "Tur mata ku Mi Tata selestial no a planta lo wòrdu ranká ku rais ku tur.

15:14 Laga nan numa; nan ta guiadó siegu di e siegunan. I si siegu guia siegu, tur dos lo kai den buraku."

15:15 I Pedro a kontestá i a bis'E: "Splika nos e parábola aki."

15:16 I Jesus a bisa: "Boso tambe ainda ta sin komprendementu?

15:17 Boso no ta komprendé ku tur loke bai den boka ta baha bai den barika i ta wòrdu eliminá?

15:18 Ma e kosnan ku ta sali for di boka ta bin for di kurason, i ta esei ta kontaminá hende.

15:19 Pasobra for di kurason ta sali pensamentu malu, matamentu, adulterio, fornikashon, ladronisia, testimonio falsu, kalumnia.

15:20 Esakinan ta e kosnan ku ta kontaminá hende; ma kome sin laba man no ta kontaminá hende."

15:21 I Jesus a bai for di einan, i a retirá bai na e distrikto di Tiro i Sidon.

15:22 I ata un muhé kananeo a bin for di e region ei, i tabata grita, bisando: "Tene miserikòrdia di mi, O Señor, Yu di David. Mi yu muhé ta kruelmente poseí pa demoño."

15:23 Ma E no a kontest'é ni un palabra. I Su disipelnan a bin serka djE i a keda rogu'E, bisando: "Mand'é bai, pasobra e ta grita nos tras."

15:24 Ma El a kontestá i a bisa: "Ta serka e karnénan pèrdí di e kas di Israel so Mi a wòrdu mandá."

15:25 Ma e muhé a bin i a bùig te na suela Su dilanti, bisando: "Señor, yudami!"

15:26 I El a kontestá i a bisa: "No ta pas pa kohe pan di e yunan tir'é pa e kachónan."

15:27 Ma e muhé a bisa: "Sí, Señor; ma asta e kachónan ta kome e garnachinan ku ta kai for di mesa di nan shon."

15:28 E ora ei Jesus a kontestá i a bis'é: "O muhé, bo fe ta grandi; laga sosodé ku bo manera bo ta deseá." I su yu muhé a kura mesora.

15:29 I saliendo for di einan, Jesus a pasa kantu di laman di Galilea, i El a subi bai riba seru i a kai sinta einan.

15:30 I multitutnan grandi a bin serka djE, i a trese huntu ku nan esnan ku tabata lam, mankaron, siegu, mudo, i hopi otronan, i nan tabata pone nan na Su pia; i E tabata kura nan,

15:31 asina ku e multitut a keda atmirá ora nan a mira e mudonan ta papia, e mankaronnan bon di salú, e lamnan ta kana i e siegunan ta mira; i nan a glorifiká e Dios di Israel.

15:32 I Jesus a yama Su disipelnan serka djE i a bisa: "Mi tin kompashon di e multitut, pasobra ya ta tres dia kaba ku nan ta serka Mi, i nan no tin nada di kome; i Mi no kier manda nan bai ku hamber, pa nan no desmayá na kaminda."

15:33 I e disipelnan a bis'E: "Unda nos lo por haña asina tantu pan den un lugá desolá, pa duna un multitut asina grandi sufisiente di kome?"

15:34 I Jesus a puntra nan: "Kuantu pan boso tin?" I nan a kontestá: "Shete, i algun piská chikitu."

15:35 I El a manda e multitut sint'abou na suela;

15:36 i El a kohe e shete pannan i e piskánan, i despues ku El a gradisí, El a kibra nan i a kuminsá duna nan na e disipelnan, i e disipelnan a duna e multitutnan.

15:37 I nan tur a kome keda barika yen, i nan a rekohé loke a resta di e pida-pidanan, shete makutu grandi yen-yen.

15:38 I esnan ku a kome tabata kuater mil hende hòmber, sin konta hende muhé i mucha.

15:39 I despues di a manda e multitutnan bai, El a bai den e boto i a yega na e region di Magdala.

Mateo 14 Mateo 16