Mateo 11

BSNP Edit

Mateo 11

11:1 I a sosodé ku ora Jesus a kaba di duna instrukshon na Su diesdos disipelnan, El a bai for di einan pa siña i prediká den nan statnan.

11:2 Awor ora Juan a tende den prizon di e obranan di Cristo, el a manda dos di su disipelnan,

11:3 i a bis'E: "Ta Abo ta Esun ku mester bin, òf nos mester spera un otro?"

11:4 I Jesus a kontestá i a bisa nan: "Bai konta Juan loke boso ta tende i mira:

11:5 e siegunan ta mira, e lamnan ta kana, e leprosonan ta wòrdu hasí limpi, i e sordonan ta tende, e mortonan ta wòrdu lantá i na e pobernan e evangelio ta wòrdu prediká.

11:6 I bendishoná ta esun ku no ta sinti su mes ofendí pa Mi motibu."

11:7 I mientras ku esakinan tabata kana bai, Jesus a kuminsá papia ku e multitutnan tokante di Juan: "Ta kiko boso a sali bai wak den desierto? Un richi sakudí dor di bientu?

11:8 Ma ta kiko boso a sali bai wak? Un hòmber bistí na paña fini? Mira, esnan ku ta bisti paña fini ta den palasionan di rei.

11:9 Ma ta pakiko boso a sali bai? Pa wak un profeta? Sí, Mi ta bisa boso, i ún ku ta mas ku un profeta.

11:10 Esaki ta esun di kende ta pará skirbí: 'Mira, Mi ta manda Mi mensahero dilanti di Bo kara, kende lo prepará Bo kaminda Bo dilanti.'

11:11 Di bèrdat Mi ta bisa boso, entre esnan ku a nase for di muhé no a lanta ningun otro mas grandi ku Juan Boutista; sinembargo, esun di mas chikitu den e reino di shelu ta mas grandi kuné.

11:12 I for di e dianan di Juan Boutista te awor e reino di shelu ta sufri violensia, i hendenan violento ta gar'é.

11:13 Pasobra tur e profetanan i e Lei a profetisá te na Juan.

11:14 I si boso kier aseptá esaki, ta e mes ta Elias, kende mester a bin.

11:15 Esun ku tin orea pa tende, lagu'é tende.

11:16 "Ma ku kiko lo Mi kompará e generashon aki? E ta manera mucha chikitu ku ta sinta na marshé i ta grita otro,

11:17 i ta bisa: 'Nos a toka flùit pa boso, i boso no a balia; nos a kanta un kantika di rou, i boso no a yora.'

11:18 Pasobra Juan a bin i no tabata kome ni bebe, i nan ta bisa: 'E tin un demoño!'

11:19 E Yu di Hende a bin i tabata kome i bebe, i nan ta bisa: 'Ata un hòmber golos i un buraché, un amigu di publikano i pekadó!' Ma sabiduria ta wòrdu hustifiká pa medio di su obranan."

11:20 E ora ei El a kuminsá reprendé e statnan den kualnan mayoria di Su milagernan a wòrdu hasí, pasobra nan no a repentí:

11:21 "Ai di bo, Korazin! Ai di bo, Bètsaida! Pasobra si na Tiro i na Sidon a sosodé e milagernan ku a sosodé den boso, ya pa hopi tempu kaba nan lo a repentí den paña-di-saku i shinishi.

11:22 Ma Mi ta bisa boso, riba e dia di huisio lo ta mas tolerabel pa Tiro i Sidon ku pa boso.

11:23 I abo, Kapernaum, ta te na shelu bo kier wòrdu halsá? Te na fièrnu lo bo baha; pasobra si e milagernan ku a sosodé den bo lo a sosodé na Sodoma, e lo a permanesé te dia djawe.

11:24 Ma Mi ta bisa boso, riba e dia di huisio lo ta mas tolerabel pa tera di Sodoma ku pa bo."

11:25 E tempu ei Jesus a kontestá i a bisa: "Mi ta alabáBo, O Tata, Señor di shelu i tera, ku Bo a skonde e kosnan aki pa sabínan i inteligentenan i a revelá nan na mucha chikitu.

11:26 Sí, Tata, pasobra asina tabata agradabel den Bo bista.

11:27 "Tur kos a wòrdu entregá na Mi dor di Mi Tata; i ningun hende no konosé e Yu, sino e Tata so; ni ningun hende no konosé e Tata, sino e Yu so, i esun na kende e Yu kier revel'E.

11:28 "Bin serka Mi tur ku ta kansá i kargá, i lo Mi duna boso sosiegu.

11:29 Tuma Mi yugo riba boso, i siña di Mi, pasobra Mi ta mansu i umilde di kurason; i boso lo haña sosiegu pa boso alma.

11:30 Pasobra Mi yugo ta suave i Mi karga ta lihé."

Mateo 10 Mateo 12