Marko 9

BSNP Edit

Marko 9

9:1 I El a bisa nan: "Di bèrdat Mi ta bisa boso, tin algun di esnan ku ta pará akinan ku lo no eksperensiá morto promé ku nan mira e reino di Dios bin ku poder."

9:2 I seis dia despues Jesus a hiba Pedro, Santiago i Juan huntu kunE, i a bai ku nan riba un seru haltu kaminda nan tabata nan so. I El a wòrdu transfigurá nan dilanti;

9:3 i Su pañanan a bira radiante i blanku-blanku, manera ningun labadó-di-paña riba tera por hasi.

9:4 I Elias a paresé na nan huntu ku Moisés; i nan tabata kombersá ku Jesus.

9:5 I Pedro a kontestá i a bisa Jesus: "Rabi, ta bon pa nos ta akinan; i laga nos traha tres tabernakel, un pa Bo, un pa Moisés i un pa Elias."

9:6 Pasobra e no tabata sa kiko pa bisa; pasobra nan tabata tur spantá.

9:7 E ora ei a forma un nubia ku a sombra nan, i a sali un bos for di e nubia, bisando: "Esaki ta Mi Yu stimá; tende na djE!"

9:8 I direpiente, ora nan a wak rònt, nan no a mira ni un hende mas huntu ku nan, sino Jesus so.

9:9 I ora nan tabata baha for di e seru El a ordená nan pa no konta ningun hende loke nan a mira, te ora ku e Yu di Hende lo a lanta for di e mortonan.

9:10 I nan a tene e palabra aki pa nan mes, i tabata diskutí ku otro kiko lanta for di e mortonan por ta nifiká.

9:11 I nan tabata hasiE pregunta, bisando: "Ta pakiko e eskribanan ta bisa ku Elias mester bin promé?"

9:12 I El a kontestá nan: "Elias tá bin promé i ta restorá tur kos. Ma kon anto ta pará skirbí di e Yu di Hende ku E lo mester sufri hopi kos i wòrdu tratá ku despresio?

9:13 Ma Ami ta bisa boso ku Elias di bèrdat a bin, i nan a hasi kuné manera nan a haña ta bon, manera ta pará skirbí di djé."

9:14 I ora nan a yega serka e disipelnan, nan a mira un multitut grandi rònt di nan, i algun eskriba ta diskutí ku nan.

9:15 I asina ku henter e multitut a mir'E, nan a keda masha asombrá, i a kore bin pa kumind'E.

9:16 I El a puntra nan: "Ta kiko boso ta diskutí ku nan?"

9:17 I un hende for di e multitut a kontest'E: "Maestro, mi a trese serka Bo mi yu hòmber ku ta poseí pa un spiritu ku ta hasié mudo;

9:18 i unda ku esaki koh'é, e ta tir'é abou na suela, i e ta skuma i morde riba djente i ta bira tur steif. I mi a bisa Bo disipelnan pa saka e spiritu afó, ma nan no tabata por."

9:19 I El a kontestá nan i a bisa: "O generashon inkrédulo, kuantu tempu mas lo Mi ta serka boso? Kuantu tempu mas Mi mester soportá boso? Tres'é pa Mi!"

9:20 I nan a trese e mucha hòmber p'E. I ora ku el a mir'E, mesora e spiritu a pon'é haña steipi, i el a dal abou i tabata lora bai bin ta skuma.

9:21 I El a puntra su tata: "Kuantu tempu e kos aki ta pasando kuné?" I el a kontestá: "Di tempu ku e ta mucha.

9:22 I hopi biaha el a tir'é den kandela i den awa pa destruié. Ma si Bo por hasi algu, tene kompashon ku nos i yuda nos!"

9:23 I Jesus a bis'é: "'Si Bo por!' Tur kos ta posibel pa esun ku ta kere."

9:24 Mesora tata di e mucha a dal un gritu bisa: "Mi ta kere; yudami den mi inkredulidat!"

9:25 I ora Jesus a mira ku tabatin un multitut ta kore hala serka, El a reprendé e spiritu impuru, bisando é: "Abo, spiritu mudo i sordo, Mi ta ordenábo, sali for di djé i no bai nunka mas den djé."

9:26 I e spiritu a grita i a pone e mucha haña steipi pisá, i a sali. I e mucha a bira meskos ku un hende morto, asina ku hopi hende tabata bisa: "El a muri!"

9:27 Ma Jesus a koh'é na su man i a lant'é; i el a lanta para.

9:28 I ora ku El a bai den kas, Su disipelnan a puntr'E ora nan tabata nan so kunE: "Pakiko nos no por a sak'é?"

9:29 I El a bisa nan: "E sorto aki no por sali pa medio di nada otro sino ku orashon so."

9:30 I for di einan nan a sali i a pasa dor di Galilea, i E no tabata kier pa ningun hende haña sa di esei.

9:31 Pasobra E tabata siña Su disipelnan i bisa nan: "E Yu di Hende lo wòrdu entregá den man di hende, i nan lo mat'E; i despues ku El a wòrdu matá, E lo resusitá riba e di tres dia."

9:32 Ma nan no a komprendé e palabranan aki, i nan tabatin miedu di puntr'E.

9:33 I nan a yega Kapernaum; i ora ku E tabata den kas, El a puntra nan: "Ta kiko boso tabata diskutí na kaminda?"

9:34 Ma nan a keda ketu, pasobra na kaminda nan a diskutí ku otro kual di nan tabata esun di mas grandi.

9:35 I ora ku El a kai sinta, El a yama e diesdosnan i a bisa nan: "Si un hende kier ta esun di promé, lagu'é ta e último di tur, i sirbidó di tur."

9:36 I El a kohe un mucha i a pon'é para meimei di nan; i ora ku El a tum'é den Su brasa, El a bisa nan:

9:37 "Ken ku risibí un mucha manera esaki den Mi nòmber, ta Ami e ta risibí; i ken ku risibíMi, no ta Ami e ta risibí, sino Esun ku a mandaMi."

9:38 Juan a bis'E: "Maestro, nos a mira un hende ta saka demoño den Bo nòmber, i nos a tah'é, pasobra e no ta sigui nos."

9:39 Ma Jesus a bisa: "No tah'é, pasobra no tin ni un hende ku lo hasi milager den Mi nòmber, i djis despues papia malu di Mi.

9:40 Pasobra esun ku no ta kontra nos ta ku nos.

9:41 Pasobra ken ku duna boso un kopa di awa bebe den Mi nòmber, pasobra boso ta pertenesé na Cristo, di bèrdat Mi ta bisa boso, di ningun manera e lo no pèrdè su rekompensa.

9:42 "I ken ku hasi un di e chikitunan aki ku ta kere den Mi, trompeká, lo tabata mihó p'é si un piedra di mulina pisá a wòrdu kologá na su garganta, i e wòrdu tirá den laman.

9:43 I si bo man hasibo trompeká, kòrt'é kit'afó; mihó bo drenta bida mankaron, ku teniendo bo dos mannan bo bai den fièrnu, den e kandela ku no ta paga nunka,

9:44 [kaminda nan bichi no ta muri i e kandela no ta paga.]

9:45 I si bo pia hasibo trompeká, kòrt'é kit'afó; mihó bo drenta bida lam, ku teniendo bo dos pianan bo wòrdu tirá den fièrnu, den e kandela ku no ta paga nunka,

9:46 [kaminda nan bichi no ta muri i e kandela no ta paga.]

9:47 I si bo wowo hasibo trompeká, sak'é tir'afó; mihó bo drenta e reino di Dios ku un wowo so ku, teniendo dos wowo, bo wòrdu tirá den kandela di fièrnu,

9:48 kaminda 'nan bichi no ta muri i e kandela no ta paga.'

9:49 Pasobra tur hende lo wòrdu salá ku kandela.

9:50 "Salu ta bon; ma si salu pèrdè su smak, ku kiko lo bo hasié salu atrobe? Pèrkurá pa tin salu den boso mes, i tene pas ku otro."

Marko 8 Marko 10