Marko 16

BSNP Edit

Marko 16

16:1 I ora Sabat a pasa, Maria Magdalena i Maria, mama di Santiago, i Salomé, a kumpra speserei pa nan bai ungiE.

16:2 I mainta bon tempran, riba e promé dia di siman, ora solo a sali, nan a bin na e tumba.

16:3 I nan tabata bisa otro: "Ken lo lora e piedra kit'é for di entrada di e tumba pa nos?"

16:4 I ora nan a hisa kara wak, nan a mira ku e piedra a wòrdu kitá, apesar ku e tabata masha grandi mes.

16:5 I ora nan a bai den e tumba, nan a mira un hoben, bistí na paña blanku largu, sintá na banda drechi, i nan a keda masha asombrá.

16:6 I el a bisa nan: "No tene miedu. Boso ta buska Jesus di Nazarèt, Kende a wòrdu krusifiká. El a resusitá; E no t'aki; mira e lugá kaminda nan a pon'E.

16:7 Ma bai, bisa Su disipelnan i Pedro: 'E ta bai Galilea boso dilanti; ayanan boso lo mir'E, manera El a bisa boso.'"

16:8 I nan a sali pafó i a hui bai for di e tumba, pasobra nan tabata tembla i tabata tur asombrá; i nan no a bisa ningun hende nada, pasobra nan tabatin miedu.

16:9 [Awor despues ku El a lanta mainta tempran riba e promé dia di siman, El a paresé promé na Maria Magdalena, for di kende El a saka shete demoño.

16:10 El a bai i a hiba e notisia pa esnan ku tabata huntu kunE, i kendenan tabata lamentá i yora.

16:11 I ora nan a tende ku E tabata bibu i ku Maria Magdalena a mir'E, nan no kier a kere.

16:12 I despues El a paresé den un otro figura na dos di nan, ora ku, na pia, nan tabata na kaminda pa kunuku.

16:13 I nan a bai i a hiba e notisia pa e otronan, ma esakinan tampoko no a kere nan.

16:14 I despues El a paresé na e diesunnan mes, ora nan tabata sintá na mesa, i El a reprendé nan inkredulidat i duresa di kurason, pasobra nan no a kere esnan ku a mir'E despues ku El a wòrdu lantá.

16:15 I El a bisa nan: "Bai den henter mundu i prediká e evangelio na tur kriatura.

16:16 Esun ku a kere i a wòrdu batisá lo ta salbá; ma esun ku no a kere lo ta kondená.

16:17 I e señalnan aki lo kompañá esnan ku kere: den Mi nòmber nan lo saka demoño, nan lo papia den lenga nobo;

16:18 nan lo kohe kolebra ku man, i si nan bebe kualkier veneno mortal, esei lo no hasi nan daño; nan lo pone man riba hende malu i esakinan lo bira bon."

16:19 Asina anto, ora Señor Jesus a kaba di papia ku nan, El a wòrdu risibí ariba den shelu, i a sinta na man drechi di Dios.

16:20 I nan a sali bai i a prediká tur kaminda, i Señor tabata traha huntu ku nan, i tabata konfirmá e palabra pa medio di e señalnan ku tabata sigui. Amèn.]

Marko 15 Lukas 1