Marko 14

BSNP Edit

Marko 14

14:1 I tabata falta dos dia pa e Fiesta di Pasku i di Pan Sin Zürdeg; i e saserdotenan prinsipal i e eskribanan tabata buska kon pa na skondí nan gar'E i mat'E.

14:2 Pasobra nan tabata bisa: "No durante di e Fiesta, pa no lanta desòrdu den e pueblo."

14:3 I mientras ku E tabata na Betania, na kas di Simon e leproso, sintá na mesa, a bin un muhé ku un butishi di alabaster ku perfume di nardo puru di gran balor aden, i el a kibra e butishi i a bash'é riba Su kabes.

G963 -- I mientras ku E tabata na Betania -> While He was in Bethany
G3614 -- na kas -> at the home
G4613 -- di Simon -> of Simon
G3015 -- e leproso -> the leper
G2621 -- sintá -> and reclining
G2064 -- na mesa, a bin -> ], there came
G1135 -- un muhé -> a woman
G211 -- ku un butishi di alabaster -> with an alabaster
G211 -- butishi -> vial
G4185 -- ku perfume di nardo puru di gran balor aden -> of very
G4185 -- perfume -> costly
G3464 -- di nardo -> perfume
G4101 -- puru -> of pure
G3487 -- di gran balor -> nard
G4937 -- aden, i el a kibra -> ] she broke
G211 -- e butishi -> the vial
G2708 -- i a bash'é -> and poured
G2708 -- riba -> it over
G2776 -- Su kabes -> His head

14:4 Ma algun, ku indignashon, tabata bisa otro: "Pakiko e perfume aki a wòrdu drispidí?

14:5 Pasobra e perfume aki por a wòrdu bendí pa mas ku tres shen denario, i e plaka duná na hende pober." I nan a lanta kuné.

14:6 Ma Jesus a bisa: "Lagu'é; pakiko boso ta molesti'é? El a hasi un bon obra na Mi.

14:7 Pasobra e pobernan boso tin semper serka boso, i ki ora ku boso kier boso por hasi bon na nan; ma Ami boso no tin semper.

14:8 El a hasi loke e tabata por. Di antemano el a ungi Mi kurpa pa deramentu.

14:9 I di bèrdat Mi ta bisa boso, unda ku e evangelio wòrdu prediká den henter mundu, loke ku e muhé aki a hasi tambe lo wòrdu kontá na su rekuèrdo."

14:10 I Judas Iskariot, kende tabata un di e diesdosnan, a bai serka e saserdotenan prinsipal, pa entregu'E na nan.

14:11 I nan a keda kontentu ora nan a tende esaki i a primintí pa dun'é plaka. I e tabata buska un bon oportunidat pa entregu'E.

14:12 I riba e promé dia di e Fiesta di Pan Sin Zürdeg, ora ku e lamchi di Pasku tabata wòrdu sakrifiká, Su disipelnan a puntr'E: "Unda Bo kier pa nos bai i prepará pa Bo pa kome e Pasku?"

14:13 I El a manda dos di Su disipelnan i a bisa nan: "Bai den stat i un hòmber ku ta karga un purún di awa lo kontra ku boso; siguié;

14:14 i kaminda ku e drenta, bisa doño di e kas: 'E Maestro ta bisa: "Unda Mi sala kaminda Mi por kome e Pasku huntu ku Mi disipelnan ta?"'

14:15 I e mes lo mustra boso un sala grandi ariba, mueblá i tur kla; prepará pa nos ayanan."

14:16 I e disipelnan a sali bai i a yega na e stat, i a haña tur kos presis manera El a bisa nan. I nan a prepará e Pasku.

14:17 I ora ku a bira nochi El a bin ku e diesdosnan.

14:18 I ora nan tabata sintá na mesa i tabata kome, Jesus a bisa: "Di bèrdat Mi ta bisa boso ku un di boso ku ta kome huntu ku Mi lo traishonáMi."

14:19 Nan a kuminsá bira tristu i un pa un nan tabata puntr'E: "No ta ami tòg?"

14:20 Ma El a kontestá nan: "Ta un di e diesdosnan, un ku ta dòp den e kòmchi huntu ku Mi.

14:21 Pasobra e Yu di Hende mester bai, manera ta pará skirbí di djE, ma ai di e hòmber ei dor di kende e Yu di Hende ta wòrdu traishoná! Lo tabata bon pa e hòmber ei si e no a nase nunka."

14:22 I mientras ku nan tabata kome, El a kohe pan, i despues di a bendishon'é, El a kibr'é i a duna nan, i a bisa: "Tuma; esaki ta Mi kurpa."

14:23 I El a kohe un kopa, i despues di a duna gradisimentu, El a duna nan esei; i nan tur a bebe for di djé.

14:24 I El a bisa nan: "Esaki ta Mi sanger di e aliansa, ku ta wòrdu dramá pa hopi.

14:25 Di bèrdat Mi ta bisa boso, lo Mi no bebe mas di e fruta di e mata di wendrùif, te na e dia ei ku Mi beb'é nobo den e reino di Dios."

14:26 I despues di a kanta un himno, nan a sali bai Seru di Oleifi.

14:27 I Jesus a bisa nan: "Boso tur lo trompeká, pasobra ta pará skirbí: 'Lo Mi dal e Wardadó mata i e karnénan lo wòrdu plamá.'

14:28 Ma despues ku Mi a wòrdu lantá, lo Mi bai Galilea boso dilanti."

14:29 I Pedro a bis'E: "Maske tur trompeká, ami sí no."

14:30 I Jesus a bis'é: "Di bèrdat Mi ta bisabo, ku awe nochi mes, promé ku un gai kanta dos biaha, abo lo nengaMi tres biaha."

14:31 Ma Pedro a keda insistí, bisando: "Asta si mi mester muri huntu ku Bo, lo mi no nengaBo!" I nan tur tabata bisa meskos.

14:32 I nan a yega na un lugá ku yama Getsemané; i El a bisa Su disipelnan: "Sinta akinan te ora Mi kaba di hasi orashon."

14:33 I El a hiba Pedro i Santiago i Juan huntu kunE, i a kuminsá bira mashá angustiá i intrankil.

14:34 I El a bisa nan: "Mi alma ta masha tristu mes, te na morto; keda akinan i vigilá."

14:35 I El a bai un poko mas leu for di nan, i a tira Su kurpa abou na suela, i a hasi orashon, ku si esei tabata posibel, ku e ora ei por a pas'E forbei.

14:36 I El a bisa: "Abba! Tata! Tur kos ta posibel pa Bo; kita e kopa aki for di Mi; sinembargo, no loke Ami kier, ma loke Abo kier."

14:37 I El a bin i a haña nan ta drumi, i a bisa Pedro: "Simon, bo ta na soño? Bo no por a keda vigilá ni ún ora?

14:38 Keda vigilá i hasi orashon, pa boso no kai den tentashon; e spiritu ta boluntario, ma e karni ta debil."

14:39 I El a bai atrobe i a hasi orashon, bisando e mesun palabranan.

14:40 I El a bolbe bin i a haña nan ta drumi, pasobra nan wowo tabata masha pisá. I nan no tabata sa kiko pa kontest'E.

14:41 I El a bolbe bin pa di tres biaha, i a bisa nan: "Ainda boso ta drumi i ta sosegá? Ta basta; e ora a yega; mira, e Yu di Hende ta wòrdu entregá den man di pekadó.

14:42 Lanta, laga nos ban; ata, esun ku ta traishonáMi ta serka!"

14:43 I mesora, mientras ku E tabata papia ainda, Judas, un di e diesdosnan, a bin, i huntu kuné un multitut ku spada i klòp, mandá dor di e saserdotenan prinsipal i e eskribanan i e ansianonan.

14:44 Awor esun ku tabata traishon'E a duna nan un señal, bisando: "Esun ku mi duna un sunchi, esei t'E; gar'E bai kunE bon sigurá."

14:45 I asina ku el a yega, el a bai serka djE mesora, i a bisa: "Rabi!" i a dun'E un sunchi.

14:46 I nan a tira man riba djE i a gar'E.

14:47 I un di esnan ku tabata pará einan a saka su spada, i a dal e esklabu di e sumosaserdote, i a kap su orea kit'afó.

14:48 I Jesus a kontestá i a bisa nan: "Boso a bin ku spada i klòp pa arestáMi, komo si fuera ta ladron Mi ta?

14:49 Tur dia Mi tabata serka boso den tèmpel ta siña e hendenan, i boso no a garaMi; ma esaki a sosodé pa e Skrituranan por keda kumplí."

14:50 I nan tur a bandon'E i a hui bai.

14:51 I un hoben ku tabatin solamente un klechi di lino lorá rònt di su kurpa pa tapa su sunú tabata siguiE; i nan a gar'é.

14:52 Ma el a laga e klechi di lino atras, i sunú el a hui bai.

14:53 I nan a hiba Jesus pa e sumosaserdote; i tur e saserdotenan prinsipal i e ansianonan i e eskribanan a reuní.

14:54 I Pedro a siguiE na un distansia te riba plenchi di e sumosaserdote; i e tabata sintá huntu ku e ofisialnan, i tabata keinta su kurpa na e kandela.

14:55 Awor e saserdotenan prinsipal i henter e Konsilio tabata purba haña testimonio kontra Jesus, pa nan por a laga mat'E; i nan no a haña ningun.

14:56 Pasobra hopi hende tabata duna testimonio falsu kontra djE, ma nan testimonio no tabata kuadra ku otro.

14:57 I algun hende a lanta para i a kuminsá duna testimonio falsu kontra djE, bisando:

14:58 "Nos a tend'E bisa: 'Lo Mi destruí e tèmpel aki ku ta trahá ku man, i den tres dia lo Mi lanta un otro ku no ta trahá ku man.'"

14:59 Ma ni den esaki nan testimonio no tabata kuadra ku otro.

14:60 I e sumosaserdote a lanta bin dilanti i a puntra Jesus, bisando: "Bo no ta kontestá nada? Ta kiko e hòmbernan aki ta testifiká kontra Bo?"

14:61 Ma El a keda ketu, i no a kontestá nada. Atrobe e sumosaserdote tabata hasiE pregunta, i tabata bis'E: "Ta Abo ta e Cristo, e Yu di Esun Bendishoná?"

14:62 I Jesus a bisa: "Ami ta; i boso lo mira e Yu di Hende sintá na man drechi di Poder, i biniendo ku e nubianan di shelu."

14:63 I e sumosaserdote a sker su paña i a bisa: "Pakiko nos tin mester di mas testigu?

14:64 Boso a tende e blasfemia; kon boso ta haña esei?" I nan tur a konden'E di ta meresé morto.

14:65 I algun di nan a kuminsá skupi riba djE, i tapa Su kara, i dal E ku moketa, i bis'E: "Profetisá!" I e ofisialnan a bòft'E den Su kara.

14:66 I mientras ku Pedro tabata abou riba plenchi, un di e sirbidónan muhé di e sumosaserdote a bin,

14:67 i ora ku el a mira Pedro ta keinta su kurpa, el a keda wak e, i a bisa: "Abo tambe tabata huntu ku Jesus di Nazarèt."

14:68 Ma el a nenga esei, bisando: "Mi no sa, ni mi no ta komprendé di kiko bo ta papia." I el a sali bai pafó den veranda, i un gai a kanta.

14:69 I e kriá a mir'é, i a bolbe kuminsá bisa esnan ku tabata pará einan: "Esaki ta un di nan!"

14:70 Ma el a bolbe nenga esei. I un ratu despues esnan ku tabata pará einan atrobe tabata bisa Pedro: "Siguramente abo ta un di nan, pasobra bo tambe ta un galileo."

14:71 Ma el a kuminsá maldishoná i hura: "Mi no konosé e hòmber aki ku boso ta papia di djE!"

14:72 I mesora un gai a kanta pa di dos biaha. I Pedro a kòrda kon Jesus a bis'é: "Promé ku e gai kanta dos biaha, lo bo nengaMi tres biaha." I el a kuminsá yora.

Marko 13 Marko 15