Lukas 4

BSNP Edit

Lukas 4

4:1 I Jesus, yen di Spiritu Santu, a bolbe for di Jordan i a wòrdu hibá dor di e Spiritu den desierto

4:2 pa kuarenta dia, i El a wòrdu tentá dor di diabel. I E no a kome nada durante di e dianan ei; i ora ku e dianan a pasa, El a haña hamber.

4:3 I diabel a bis'E: "Si Bo ta e Yu di Dios, bisa e piedra aki pa e bira pan."

4:4 I Jesus a kontest'é: "Ta pará skirbí: 'Hende lo no biba di pan so.'"

4:5 I el a hib'E na un lugá haltu i a mustr'E tur e reinonan di mundu den ún momento di tempu.

4:6 I diabel a bis'E: "Lo mi dunaBo henter e dominio aki i su gloria; pasobra esei a wòrdu entregá na mi, i mi ta dun'é na esun ku mi kier.

4:7 Pesei, si Bo adorámi, tur esaki lo ta di Bo."

4:8 I Jesus a kontestá i a bis'é: "Ta pará skirbí: 'Adorá SEÑOR bo Dios i sirbi E so.'"

4:9 I el a hib'E Jerusalèm i a pon'E para riba e pinákulo di e tèmpel i a bis'E: "Si Bo ta e Yu di Dios, tira Bo kurpa abou for di aki;

4:10 pasobra ta pará skirbí: 'E lo duna Su angelnan enkargo tokante di Bo pa nan wardabo,'

4:11 i, 'Den nan mannan nan lo kargaBo, pa Bo no dal Bo pia na piedra.'"

4:12 I Jesus a kontestá i a bis'é: "Ta bisá: 'No tenta SEÑOR bo Dios.'"

4:13 I ora diabel a kaba ku tur tentashon, el a lagu'E pa un tempu.

4:14 I Jesus a bolbe na Galilea den e poder di e Spiritu; i Su fama a plama den henter e distrikto eibanda.

4:15 I El a kuminsá siña e hendenan den nan snoanan i tur hende tabata elogi'E.

4:16 I El a bin Nazarèt, kaminda El a lanta komo mucha. I manera tabata Su kustumber El a bai den snoa riba dia di Sabat, i a lanta para pa lesa.

4:17 I nan a dun'é e buki di profeta Isaias. I El a habri e buki i a haña e lugá kaminda tabata pará skirbí:

4:18 "E Spiritu di SEÑOR ta riba Mi, pasobra El a ungiMi pa prediká evangelio na e pobernan; El a mandaMi pa proklamá libertat na e prezonan, i restorashon di bista na e siegunan, pa duna libertat na esnan ku ta wòrdu oprimí,

4:19 pa proklamá e aña agradabel di SEÑOR."

4:20 I El a sera e buki i a duna esaki bèk na e sirbidó i a sinta; i bista di tur hende den snoa tabata fihá riba djE.

4:21 I El a kuminsá bisa nan: "Awe e Skritura aki a keda kumplí boso dilanti."

4:22 I tur tabata duna bon testimonio di djE, i tabata keda strañá di e palabranan agradabel ku tabata sali for di Su boka; i nan tabata puntra: "No ta yu di Jose esaki ta?"

4:23 I El a bisa nan: "Sin duda boso lo sita e proverbio aki pa Mi: 'Dòkter, kura bo mes! Tur kos ku nos a tende ku a wòrdu hasí na Kapernaum, hasi nan aki den Bo mes stat tambe.'"

4:24 I El a bisa: "Di bèrdat Mi ta bisa boso: Ningun profeta no ta wòrdu aseptá den su mes stat.

4:25 Ma di bèrdat Mi ta bisa boso, tabatin hopi biuda na Israel den e dianan di Elias, tempu ku shelu tabata será pa tres aña i seis luna, tempu ku a bin un hamber pisá den henter e tera;

4:26 i tòg Elias no a wòrdu mandá serka ningun di nan, sino solamente na Sarepta, na tera di Sidon, serka un muhé biuda.

4:27 I tabatin hopi leproso na Israel den e tempu di profeta Elisa; i ningun di nan no a wòrdu hasí limpi, sino solamente Naaman di Siria."

4:28 I tur ku tabata den snoa a yena ku furia ora nan a tende e kosnan aki,

4:29 i nan a lanta i a sak'E for di e stat, i a hib'E na rant di e seru, riba kual nan stat tabata trahá, pa tir'E abou for di e baranka steil.

4:30 Ma El a pasa meimei di nan sigui Su kaminda.

4:31 I El a yega Kapernaum, un stat di Galilea, i E tabata siña nan riba dia di Sabat;

4:32 i nan a keda strañá di Su siñansa, pasobra Su palabra tabata ku outoridat.

4:33 I tabatin un hende den snoa ku tabata poseí pa e spiritu di un demoño impuru, i el a grita na bos haltu:

4:34 "Laga nos! Kiko nos tin di hasi ku Bo, Jesus di Nazarèt? Bo a bin pa destruí nos? Mi sa ken Bo ta: Esun Santu di Dios!"

4:35 I Jesus a reprend'é, bisando: "Keda ketu, i sali for di djé!" I ora ku e demoño a bent'é abou na suela meimei di nan, el a sali bai for di djé sin hasié ningun daño.

4:36 I nan tur a keda asombrá, i nan tabata diskutí nan ku nan, bisando: "Ta ki palabra esaki ta? Pasobra ku outoridat i poder E ta ordená e spiritunan impuru, i nan ta sali."

4:37 I e notisia tokante di djE tabata plama den tur bario di e distrikto eibanda.

4:38 I El a lanta, a sali for di snoa i a bai kas di Simon. Awor Simon su suegra tabata malu ku keintura haltu, i nan a hasi un petishon na Jesus p'é.

4:39 I El a bai para na kabes di su kama i a reprendé e keintura, i e keintura a lagu'é; i mesora el a lanta i a sirbi nan.

4:40 I ora solo tabata baha, tur ku tabatin hende malu ku tur sorto di malesa a trese nan serka djE; i poniendo Su mannan riba kada un di nan E tabata kura nan.

4:41 I tambe demoñonan tabata sali for di hopi hende, i nan tabata grita i bisa: "Abo ta e Yu di Dios!" I E tabata reprendé nan i no tabata pèrmití nan papia, pasobra nan tabata sa ku E ta e Cristo.

4:42 I ora dia a habri, El a sali bai na un lugá solitario; i e multitutnan tabata busk'E, i tabata bin serka djE, i tabata purba ten'E pa E no bai for di nan.

4:43 Ma El a bisa nan: "Mi mester prediká e reino di Dios na e otro statnan tambe, pasobra ta pa e propósito aki Mi a wòrdu mandá."

4:44 I El a sigui prediká den e snoanan di Galilea.

Lukas 3 Lukas 5