Lukas 22

BSNP Edit

Lukas 22

22:1 Awor e Fiesta di Pan Sin Zürdeg, ku ta wòrdu yamá Pasku, tabata aserkando.

22:2 I e saserdotenan prinsipal i e eskribanan tabata buska kon nan por a laga mat'E; pasobra nan tabatin miedu di e pueblo.

22:3 I Satanás a drenta den Judas, kende tabata wòrdu yamá Iskariot, siendo un di e diesdosnan.

22:4 I el a bai i a deliberá ku e saserdotenan prinsipal i e ofisialnan kon e lo por a entregu'E na nan.

22:5 I nan tabata kontentu i a kumbiní pa dun'é plaka.

22:6 I el a konsentí i a kuminsá buska un bon oportunidat pa entregu'E na nan ora ku e multitut no ta presente.

22:7 Anto e dia di Pan Sin Zürdeg a yega, riba kual e lamchi di Pasku mester a wòrdu sakrifiká.

22:8 I El a manda Pedro i Juan, bisando: "Bai i prepará e Pasku pa nos, pa nos por kom'é."

22:9 I nan a bis'E: "Unda Bo kier pa nos prepar'é?"

22:10 I El a bisa nan: "Mira, ora boso drenta e stat, boso lo kontra ku un hòmber ku ta karga un purún di awa; siguié bai den e kas kaminda e drenta.

22:11 I boso lo bisa doño di e kas: 'E Maestro ta bisabo: "Unda e sala kaminda Mi tin di kome e Pasku huntu ku Mi disipelnan ta?"'

22:12 I e lo mustra boso un sala grandi ariba, tur mueblá; prepar'é ayanan."

22:13 I nan a bai i a haña tur kos manera El a bisa nan; i nan a prepará e Pasku.

22:14 I ora ku e momento a yega El a sinta na mesa, i e apòstelnan huntu kunE.

22:15 I El a bisa nan: "Mi a deseá mashá di kome e Pasku aki huntu ku boso promé ku Mi sufri;

22:16 pasobra Mi ta bisa boso, ku lo Mi no kom'é nunka mas te ora ku e ta kumplí den e reino di Dios."

22:17 I ora ku El a kohe un kopa i a duna gradisimentu, El a bisa: "Tuma esaki i partié entre boso;

22:18 pasobra Mi ta bisa boso, lo Mi no bebe di e fruta di e mata di wendrùif mas te ora ku e reino di Dios bin."

22:19 I ora ku El a kohe pan i a duna gradisimentu, El a kibr'é, i a duna nan esaki, bisando: "Esaki ta Mi kurpa ku ta duná pa boso; hasi esaki na Mi rekuèrdo."

22:20 I di e mesun manera El a kohe e kopa despues ku nan a kaba di kome, bisando: "E kopa aki, ku a wòrdu dramá pa boso, ta e aliansa nobo den Mi sanger.

22:21 Ma mira, man di esun ku ta traishonáMi ta huntu ku Mi na mesa.

22:22 Pasobra di bèrdat e Yu di Hende ta bai manera a wòrdu determiná, ma ai di e hòmber ei dor di kende E ta wòrdu traishoná!"

22:23 I nan a kuminsá diskutí nan ku nan, kual di nan esei por ta ku lo a bai hasi e kos aki.

22:24 I tambe a lanta un diskushon entre nan tokante kual di nan tabata wòrdu konsiderá di ta esun di mas grandi.

22:25 I El a bisa nan: "E reinan di e paganonan ta goberná nan; i esnan ku tin outoridat riba nan ta wòrdu yamá 'Shonnan bondadoso.'

22:26 Ma entre boso no mester t'asina; alkontrario, laga esun di mas grandi meimei di boso ta manera esun di mas hoben, i esun ku ta goberná manera esun ku ta sirbi.

22:27 Pasobra ta ken ta mas grandi: esun ku ta sinta na mesa òf esun ku ta sirbi? No ta esun ku ta sinta na mesa? Ma Ami ta meimei di boso manera esun ku ta sirbi.

22:28 I boso ta esnan ku a keda na Mi lado den Mi pruebanan;

22:29 i meskos ku Mi Tata a laga un reino pa Mi, Mi ta laga pa boso,

22:30 pa boso kome i bebe na Mi mesa den Mi reino, i boso lo sinta riba trononan pa huzga e diesdos tribunan di Israel.

22:31 "Simon, Simon, mira, Satanás a pidi pèrmit pa sefta boso manera trigo,

22:32 ma Ami a hasi orashon pa bo, pa bo fe no faya; i abo, unabes ku bo a kombèrtí, fortalesé bo rumannan."

22:33 I el a bis'E: "Señor, ku Bo mi ta dispuesto pa no solamente bai prizon, ma pa muri tambe!"

22:34 Ma El a bisa: "Pedro, Mi ta bisabo, gai lo no kanta awe promé ku bo a nenga tres biaha ku bo konoséMi."

22:35 I El a bisa nan: "Tempu ku Mi a manda boso sali bai sin bolsa i sin saku i sin sandalia, boso tabatin falta di algu?" I nan a bisa: "Di nada-nada."

22:36 I El a bisa nan: "Ma awor, esun ku tin un bolsa, lagu'é bai kuné, i tambe un saku; i esun ku no tin spada, lagu'é bende su paña i kumpra un.

22:37 Pasobra Mi ta bisa boso, ku loke ta pará skirbí aki mester keda kumplí den Mi: 'I El a wòrdu kontá huntu ku transgresornan'; pasobra loke ta pará skirbí di Mi mester wòrdu kumplí."

22:38 I nan a bisa: "Señor, mira, ata dos spada aki." I El a bisa nan: "Ta basta."

22:39 I El a sali i a bai Seru di Oleifi manera tabata Su kustumber; i e disipelnan tambe tabata siguiE.

22:40 I ora ku El a yega na e lugá ei, El a bisa nan: "Hasi orashon pa boso no kai den tentashon."

22:41 I El a retirá Su mes for di nan na un distansia di un tirá di piedra, i El a hinka rudia i a kuminsá hasi orashon,

22:42 bisando: "Tata, si ta Bo boluntat, kita e kopa aki for di Mi; sinembargo, no Mi boluntat, ma di Bo sosodé."

22:43 Awor a paresé un angel for di shelu na djE pa fortales'E.

22:44 I siendo den ansha di morto E tabata hasi orashon masha ferviente. I Su sodó a bira manera gotanan di sanger ku tabata kai abou na suela.

22:45 I ora ku El a kaba di hasi orashon, El a bin serka Su disipelnan i a haña nan na soño pa motibu di tristesa,

22:46 i El a bisa nan: "Pakiko boso ta drumi? Lanta i hasi orashon pa boso no kai den tentashon."

22:47 Mientras ku E tabata papia ainda, ata, un multitut a bin, i esun ku yama Judas, un di e diesdosnan, tabata kana nan dilanti, i el a kana bin serka Jesus pa dun'E un sunchi.

22:48 I Jesus a bis'é: "Judas, bo ta traishoná e Yu di Hende ku un sunchi?"

22:49 I ora esnan ku tabata pará rònt di djE a mira kiko tabata bai sosodé, nan a bisa: "Señor, Bo kier pa nos dal ku spada?"

22:50 I un di nan a dal e esklabu di e sumosaserdote i a kap su orea drechi kit'afó.

22:51 Ma Jesus a kontestá i a bisa: "Stòp! No sigui mas." I El a mishi ku su orea i a kur'é.

22:52 I Jesus a bisa e saserdotenan prinsipal i e ofisialnan di tèmpel i e ansianonan ku a bin kontra djE: "Boso a sali bin ku spada i klòp manera ta kontra un ladron boso a bin?

22:53 Mientras ku Mi tabata tur dia den tèmpel serka boso, boso no a tira man riba Mi; ma e ora aki i e poder di skuridat ta di boso."

22:54 I despues di a arest'E, nan a bai kunE i a hib'E na kas di e sumosaserdote; i Pedro tabata sigui na un distansia.

22:55 I ora nan a sende un kandela meimei di e plenchi i a sinta huntu, Pedro a bai sinta meimei di nan.

22:56 I un sirbidó muhé, ku a mir'é sintá den klaridat di e kandela, a wak é bon i a bisa: "E hòmber aki tambe tabata huntu kunE."

22:57 Ma Pedro a nenga esaki, bisando: "Muhé, mi no konos'E."

22:58 I un ratu despues un otro a mir'é i a bisa: "Bo tambe ta un di nan!" Ma Pedro a bisa: "Hòmber, no ta bèrdat!"

22:59 I mas o menos un ora despues un otro hòmber a insistí, bisando: "Sigur-sigur e hòmber aki tambe tabata huntu kunE, pasobra e tambe ta un galileo."

22:60 Ma Pedro a bisa: "Hòmber, mi no sa di kiko bo ta papia." I mesora, mientras ku e tabata papia ainda, un gai a kanta.

22:61 I Señor a drai wak Pedro. I Pedro a kòrda e palabra di Señor, kon El a bis'é: "Promé ku un gai kanta awe, lo bo nengaMi tres biaha."

22:62 I Pedro a bai pafó, i a yora amárgamente.

22:63 I e hòmbernan ku tabata tene Jesus prezo tabata hasi bofon di djE i tabata sut'E,

22:64 i nan tabata tapa Su kara i tabata puntr'E, bisando: "Profetisá, ta ken t'esun ku a dal Bo?"

22:65 I hopi otro kos mas nan tabata bisa kontra djE, blasfemando.

22:66 I ora dia a habri, e ansianonan di e pueblo a reuní, tantu saserdote prinsipal komo eskriba, i nan a hib'E na nan sala di konsilio, bisando:

22:67 "Si ta Abo ta e Cristo, bisa nos." Ma El a bisa nan: "Si Mi bisa boso, boso lo no kere;

22:68 i si Mi hasi un pregunta, boso lo no kontestáMi ni lagaMi bai.

22:69 Ma for di awor padilanti e Yu di Hende lo ta sintá na man drechi di e poder di Dios."

22:70 I nan tur a bisa: "Ta Abo ta e Yu di Dios anto?" I El a bisa nan: "Si, Ami ta."

22:71 I nan a bisa: "Ki testimonio mas nos mester? Pasobra nos mes a tende esaki for di Su mes boka."

Lukas 21 Lukas 23