Lukas 17

BSNP Edit

Lukas 17

17:1 I El a bisa Su disipelnan: "Ta inevitabel ku tentashonnan lo bin, ma ai di esun pa medio di kende nan ta bin!

17:2 Lo tabata mihó p'é si un piedra-di-mulina a wòrdu kologá na su garganta i el a wòrdu tirá den laman, ku si e mester hasi un di e chikitunan aki trompeká.

17:3 Tene kuidou! "Si bo ruman peka, reprend'é; i si e repentí, pordon'é.

17:4 I si e peka shete biaha pa dia kontra bo, i bolbe serka bo shete biaha, bisando: 'Mi ta repentí,' pordon'é."

17:5 I e apòstelnan a bisa Señor: "Oumentá nos fe!"

17:6 I Señor a bisa: "Si boso tabatin fe manera un simia di mòster, boso lo a bisa e palu di sikamor aki: 'Sea ranká ku rais ku tur i sea plantá den laman'; i esei lo a obedesé boso.

17:7 "Ma kual di boso ku tin un esklabu ku ta plug òf ku ta kuida karné, ora ku e yega di kunuku lo bis'é: 'Bin mesora i sinta na mesa kome'?

17:8 Ma lo e no bis'é: 'Prepará algu pa mi kome, i faha bo mes i sirbimi te ora ku ami a kaba di kome i bebe; i despues abo por kome i bebe'?

17:9 E no ta gradisí e esklabu pasobra el a hasi loke el a wòrdu ordená pa hasi, no t'asina?

17:10 Asina boso tambe, ora boso hasi tur loke boso a wòrdu ordená, bisa: 'Nos ta esklabunan inútil; nos a hasi solamente loke nos mester a hasi.'"

17:11 I a sosodé ku mientras E tabata na kaminda pa Jerusalèm, Jesus tabata pasa entre Samaria i Galilea.

17:12 I ora ku El a drenta den un sierto pueblito, dies hòmber leproso, ku tabata pará na un distansia, a bin kontr'E;

17:13 i nan a halsa nan bos, bisando: "Jesus, Maestro, tene miserikòrdia di nos!"

17:14 I ora ku El a mira nan, El a bisa nan: "Bai i mustra boso mes na e saserdotenan." I a sosodé ku ora nan tabata bai, nan a bira limpi.

17:15 Awor un di nan, ora ku el a mira ku el a wòrdu kurá, a bolbe, glorifikando Dios na bos haltu,

17:16 i el a tira su kurpa abou ku su kara te na suela na pia di Jesus, i a duna gradisimentu na djE. I esaki tabata un samaritano.

17:17 I Jesus a kontestá i a bisa: "No ta dies a wòrdu hasí limpi? Awor e nuebenan, unda nan ta?

17:18 No tabatin ni un otro ku a bolbe pa duna gloria na Dios, sino e stranhero aki so?"

17:19 I El a bis'é: "Lanta i bai; bo fe a salbabo."

17:20 Awor ora ku e fariseonan a puntr'E tokante di ki tempu e reino di Dios lo a bin, El a kontestá nan i a bisa: "E reino di Dios no ta bin ku señalnan ku por wòrdu mirá;

17:21 tampoko hende lo no bisa: 'Mira, at'é aki!' òf: 'At'é aya!' Pasobra ata e reino di Dios ta meimei di boso."

17:22 I El a bisa e disipelnan: "E dianan lo bin ku boso lo anhelá pa mira un di e dianan di e Yu di Hende, i boso lo no mira esei.

17:23 I nan lo bisa boso: 'Mir'aki! Mir'ayá!' No bai, i no kore nan tras.

17:24 Pasobra meskos ku lamper, ora ku e ta kòrta for di un parti di shelu, ta lusa te na e otro parti di shelu, asina e Yu di Hende lo ta den Su dia.

17:25 Ma promé E mester sufri hopi kos i wòrdu rechasá dor di e generashon aki.

17:26 "I meskos ku a sosodé den e dianan di Noe, asina lo ta tambe den e dianan di e Yu di Hende:

17:27 nan tabata kome, nan tabata bebe, nan tabata kasa, nan tabata wòrdu duná pa kasa, te na e dia ku Noe a drenta e arka, i e diluvio a bin i a destruí nan tur.

17:28 "Tabata meskos ku a sosodé den e dianan di Lòt: nan tabata kome, nan tabata bebe, nan tabata kumpra, nan tabata bende, nan tabata planta, nan tabata traha kas;

17:29 ma riba e dia ku Lòt a sali for di Sodoma a yobe kandela i swafel for di shelu i a destruí nan tur.

17:30 "Lo ta meskos riba e dia ku e Yu di Hende wòrdu revelá.

17:31 Riba e dia ei no laga esun ku ta riba dak, i kende su biennan ta den kas, baha pa kohe nan bai ku nan; i meskos, no laga esun ku ta den kunuku bai bèk.

17:32 Kòrda riba Lòt su esposa.

17:33 Ken ku buska pa salba su bida lo pèrd'é, i ken ku pèrdè su bida lo preserv'é.

17:34 Mi ta bisa boso, riba e anochi ei lo tin dos hende riba un kama; un lo wòrdu tumá i e otro lo keda.

17:35 Lo tin dos muhé ta mula na e mesun lugá; un lo wòrdu tumá i e otro lo wòrdu lagá atras.

17:36 [Dos hòmber lo ta den kunuku; un lo wòrdu tumá i e otro lo wòrdu lagá atras."]

17:37 I nan a kontestá i a bis'E: "Unda, Señor?" I El a bisa nan: "Kaminda e kadaver ta, einan e águilanan tambe lo reuní."

Lukas 16 Lukas 18