Lukas 14

BSNP Edit

Lukas 14

14:1 I a sosodé ku ora El a bai den kas di un di e lidernan di e fariseonan riba dia di Sabat pa kome pan, nan tabata ten'E bon na bista.

14:2 I mira, dilanti di djE tabatin un hòmber ku tabata sufri di dewater.

14:3 I Jesus a kontestá i a papia ku e ekspertonan di Lei i e fariseonan, bisando: "Lei ta pèrmití pa kura riba dia di Sabat, sí òf nò?"

14:4 Ma nan a keda ketu. I El a koh'é tene, i a kur'é i a mand'é bai.

14:5 I El a bisa nan: "Kual di boso, si su yu òf su buey kai den pos, lo no sak'é mesora riba dia di Sabat?"

14:6 I nan no por a kontestá riba esaki.

14:7 I ora ku El a ripará kon e invitadonan tabata skohe e lugánan di onor na mesa, El a kuminsá konta nan un parábola, bisando:

14:8 "Ora ku un hende invitábo pa un fiesta di kasamentu, no bai sinta na e lugá di onor, pa no sosodé ku el a invitá un hende mas distinguí ku bo,

14:9 i esun ku a invitá boso tur dos bin bisabo: 'Traha lugá pa e hòmber aki'; i e ora ei abo, ku bèrguensa, bai tuma e último lugá.

14:10 Ma ora bo wòrdu invitá, bai sinta na e último lugá, pa ora ku esun ku a invitábo bin, e bisabo: 'Amigu, subi bai mas ariba'; e ora ei lo bo wòrdu onrá den bista di tur esnan ku ta na mesa huntu ku bo.

14:11 Pasobra ken ku halsa su mes lo wòrdu umiyá, i esun ku umiyá su mes lo wòrdu halsá."

14:12 I tambe El a bisa esun ku a invit'E: "Ora bo tene un komementu mèrdia òf anochi, no invitá bo amigunan, ni bo rumannan, ni bo famianan, ni bisiñanan riku, pa nan tambe, na nan turno, no invitábo i bo haña bo pago bèk.

14:13 Ma ora bo tene un bankete, invitá e pobernan, e mankaronnan, e lamnan, i e siegunan,

14:14 i lo bo ta bendishoná, pasobra nan no tin manera pa pagabo bèk; pasobra lo bo wòrdu pagá bèk na e resurekshon di e hustunan."

14:15 I ora ku un di esnan ku tabata sintá na mesa huntu kunE a tende esaki, el a bis'E: "Bendishoná ta tur esnan ku lo kome pan den e reino di Dios!"

14:16 Ma El a bis'é: "Un hòmber tabata tene un bankete grandi, i el a invitá hopi hende;

14:17 i na ora di kome el a manda su esklabu pa bisa esnan ku a wòrdu invitá: 'Bin, pasobra tur kos ta kla awor.'

14:18 "Ma nan tur a kuminsá diskulpá nan mes. Esun di promé a bis'é: 'Mi a kumpra pida tereno i mi mester sali bai wak é; mi ta pidibo despensámi.'

14:19 "I un otro a bisa: 'Mi a kumpra sinku yugo di buey i mi ta bai tèst nan; mi ta pidibo despensámi.'

14:20 "I un otro a bisa: 'Mi a kaba di kasa i pa e motibu ei mi no por bin.'

14:21 "I e esklabu a bolbe i a konta su shon esaki. E ora ei e kabes di kas a rabia i a bisa su esklabu: 'Sali bai mesora den e kayanan i hanchinan di stat i trese akiden e pobernan, e mankaronnan, e siegunan i e lamnan.'

14:22 "I e esklabu a bisa: 'Mi shon, loke bo a ordená a wòrdu hasí, i ainda tin mas lugá.'

14:23 "I e shon a bisa e esklabu: 'Bai na tur e kamindanan grandi i banda di e serkánan, i obligá nan drenta, pa mi kas por ta yen.

14:24 Pasobra mi ta bisa boso, ningun di e hòmbernan ei ku a wòrdu invitá lo no purba mi kuminda.'"

14:25 Awor multitutnan grandi tabata kana huntu kunE; i El a drai wak i a bisa nan:

14:26 "Si un hende bin serka Mi, i no odia su tata i mama i esposa i yunan i ruman hòmbernan i ruman muhénan, sí, asta su mes bida, e no por ta Mi disipel.

14:27 Esun ku no karga su krus i bin Mi tras no por ta Mi disipel.

14:28 "Pasobra kual di boso, ora ku e kier traha un toren, no ta sinta kalkulá e gastunan promé, pa mira si e tin sufisiente pa kab'é?

14:29 Sino, ora ku el a pone fundeshi i no por kab'é, tur ku mira esaki lo kuminsá hasi bofon di djé,

14:30 bisando: 'E hòmber aki a kuminsá konstruí i no tabata por a kaba.'

14:31 "Of kual rei, ora ku e ta sali pa bai guera kontra un otro rei, lo no sinta pensa bon promé si e ta sufisiente fuerte ku dies mil, pa enfrentá esun ku ta bin kontra djé ku binti mil?

14:32 Of si e no por, e ta manda un delegashon, mientras ku e otro ta leu ainda, i ta pidi kondishonnan di pas.

14:33 Asina anto, ningun di boso ku no ta renunsiá tur loke e tin no por ta Mi disipel.

14:34 "Pesei, salu ta bon; ma asta salu, si e pèrdè smak, ku kiko lo e wòrdu sasoná?

14:35 E no ta sirbi ni pa tera ni pa seru di mèst; nan ta tir'é afó. "Esun ku tin orea pa tende, lagu'é tende."

Lukas 13 Lukas 15