Lukas 1

BSNP Edit

Lukas 1

1:1 Ya ku hopi hende a trata di kompilá un relato di e kosnan ku a sosodé meimei di nos,

1:2 meskos ku esnan ku for di prinsipio tabata testigu ku nan mes wowo i ku tabata sirbidónan di e palabra a entregá nan na nos,

1:3 a parsemi bon tambe despues di a investigá tur kos kuidadosamente for di prinsipio, pa skirbi esaki pa bo den un forma ordená, O ekselentísimo Teófilo,

1:4 pa bo por sa e bèrdat eksakto tokante di e kosnan ku bo a wòrdu siñá.

1:5 Den e dianan di Herodes, rei di Judea, tabatin un sierto saserdote ku yama Zakarias, di e divishon di Abias; i e tabatin un esposa for di e yu muhénan di Aaron, i su nòmber tabata Elisabèt.

1:6 I nan tur dos tabata hustu den bista di Dios i tabata kana ireprochabel den tur e mandamentunan i ordenansanan di Señor.

1:7 I nan no tabatin yu, pasobra Elisabèt tabata steril, i nan tur dos tabata di edat hopi avansá.

1:8 Awor a sosodé ku mientras Zakarias tabata ehersé su sirbishi saserdotal dilanti di Dios segun e òrdu di su divishon,

1:9 konforme e kustumber di e sirbishi saserdotal, el a wòrdu skohí dor di tira lòt pa bai den e tèmpel di Señor i kima sensia.

1:10 I henter e multitut di pueblo tabata hasi orashon pafó na e ora di ofresé sensia.

1:11 I un angel di Señor a paresé na djé, pará na banda drechi di e altar di sensia.

1:12 I Zakarias a turdi ora ku el a mir'é, i miedu a drent'é.

1:13 Ma e angel a bis'é: "No tene miedu, Zakarias, pasobra bo petishon a wòrdu tendí, i bo esposa Elisabèt lo haña un yu hòmber pa bo, i lo bo dun'é e nòmber Juan.

1:14 I lo bo tin goso i alegria, i hopi lo regosihá pa motibu di su nasementu.

1:15 Pasobra e lo ta grandi den bista di Señor, i e lo no bebe biña ni bibida stèrki; i e lo wòrdu yená ku Spiritu Santu for di den barika di su mama.

1:16 I e lo hasi hopi di e yunan di Israel bolbe serka Señor nan Dios.

1:17 I ta e ta esun ku lo bai dilanti di djE den e spiritu i poder di Elias, pa restorá kurason di e tatanan na e yunan, i e desobedesidonan na e aktitut di e hustunan, pa asina forma un pueblo bon prepará pa Señor."

1:18 I Zakarias a bisa e angel: "Kon mi por ta sigur di esaki? Pasobra mi ta un hòmber bieu i mi esposa ta di edat avansá."

1:19 I e angel a kontestá i a bis'é: "Ami ta Gabriel, kende ta para den e presensia di Dios; i mi a wòrdu mandá pa papia ku bo, i pa trese e bon nobo aki pa bo.

1:20 I mira, lo bo keda mudo i sin por papia te dia ku e kosnan aki tuma lugá, pasobra bo no a kere mi palabranan ku lo wòrdu kumplí na nan debido tempu."

1:21 I e pueblo tabata warda riba Zakarias, i a haña straño ku el a tarda asina tantu den tèmpel.

1:22 Ma ora ku el a sali e no tabata por a papia ku nan; i nan a realisá nan mes ku el a mira un vishon den tèmpel; i el a keda hasi seña ku nan i a keda mudo.

1:23 I a sosodé ku ora e dianan di su sirbishi saserdotal a keda kumplí, el a bai kas bèk.

1:24 I despues di e dianan aki su esposa Elisabèt a sali na estado; i sinku luna largu el a tene su mes skondí, bisando:

1:25 "Esaki ta e manera ku Señor a trata ku mi den e dianan ku El a mustra Su grasia na mi, pa kita mi reproche for di meimei di hende."

1:26 Awor den e di seis luna angel Gabriel a wòrdu mandá pa Dios na un stat den Galilea ku yama Nazarèt,

1:27 serka un birgen ku tabata komprometí ku un hòmber ku yama Jose, di e desendientenan di David; i nòmber di e birgen tabata Maria.

1:28 I ora ku e angel a drenta bai serka djé, el a bis'é: "Saludo, abo ku ta altamente faboresí! Señor ta ku bo."

1:29 Ma Maria a keda mashá turdí ora ku el a tende e palabranan aki, i a keda pensa kiko e saludo ei por ta nifiká.

1:30 I e angel a bis'é: "No tene miedu, Maria, pasobra bo a haña grasia serka Dios.

1:31 I mira, lo bo konsebí den bo matris i duna lus na un yu hòmber, i lo bo yam'E Jesus.

1:32 E lo ta grandi i lo wòrdu yamá Yu di e Haltísimo; i Señor Dios lo dun'E e trono di Su tata David;

1:33 i E lo reina riba e kas di Jakòb pa semper, i Su reino lo no tin fin."

1:34 I Maria a bisa e angel: "Kon esaki por ta, siendo ku mi ta un birgen?"

1:35 I e angel a kontestá i a bis'é: "Spiritu Santu lo bin riba bo, i e poder di e Haltísimo lo sombrabo; i pa e motibu ei Esun Santu ku tin ku nase lo wòrdu yamá e Yu di Dios.

1:36 I mira, bo pariente Elisabèt tambe a konsebí un yu hòmber den su biehes; i esaki, kende tabata wòrdu yamá steril, awor ta den su di seis luna.

1:37 Pasobra pa Dios nada lo no ta imposibel."

1:38 I Maria a bisa: "Ata e sirbidó di Señor; laga sosodé ku mi segun bo palabra." I e angel a kita bai lagu'é.

1:39 Awor den e dianan ei Maria a lanta i a bai purá na e serunan, na un stat di Juda,

1:40 i a bai den e kas di Zakarias i a saludá Elisabèt.

1:41 I a sosodé ku ora Elisabèt a tende Maria su saludo, e bebi a bula den su barika; i Elisabèt a wòrdu yená ku Spiritu Santu.

1:42 I el a grita na bos haltu i a bisa: "Bendishoná bo ta entre muhénan, i bendishoná ta e fruta di bo barika!

1:43 I di unda mi ta meresé esaki, ku mama di mi Señor ta bin serka mi?

1:44 Pasobra mira, ora ku e zonidu di bo saludo a yega na mi orea e bebi a bula di goso den mi barika.

1:45 I bendishoná ta esun ku a kere ku loke Señor a bis'é lo wòrdu kumplí."

1:46 I Maria a bisa: "Mi alma ta engrandesé Señor,

1:47 i mi spiritu a regosihá den Dios mi Salbador.

1:48 Pasobra El a mira e estado umilde di Su sirbiente; pasobra mira, for di awor tur generashon lo yamami bendishoná.

1:49 Pasobra Esun Poderoso a hasi kosnan grandi pa mi; i santu ta Su nòmber.

1:50 I Su miserikòrdia ta di generashon pa generashon pa ku esnan ku tin temor p'E.

1:51 El a hasi echonan poderoso ku Su brasa; El a plama esnan ku tabata orguyoso den e pensamentunan di nan kurason.

1:52 El a baha gobernantenan for di nan trono, i a halsa esnan ku tabata umilde.

1:53 El a yena esnan ku tin hamber ku kosnan bon; i a manda e rikunan bai man bashí.

1:54 El a duna yudansa na Su sirbidó Israel, pa rekòrdá Su miserikòrdia,

1:55 manera El a papia ku nos tatanan, ku Abraham i su desendientenan pa semper."

1:56 I Maria a keda komo tres luna serka Elisabèt i despues a bai su kas bèk.

1:57 Awor e tempu a yega pa Elisabèt duna lus, i el a duna lus na un yu hòmber.

1:58 I su bisiñanan i famianan a tende ku Señor a demostrá Su gran miserikòrdia na djé; i nan tabata regosihá huntu kuné.

1:59 I a sosodé ku riba e di ocho dia nan a bin pa sirkumsidá e yu, i nan kier a yam'é Zakarias, meskos ku su tata.

1:60 Ma su mama a kontestá i a bisa: "Nò, e mester yama Juan."

1:61 I nan a bis'é: "No tin ni un hende den bo famia ku tin e nòmber ei."

1:62 I ku seña nan a puntra su tata kon e tabata kier pa e yu wòrdu yamá.

1:63 I el a pidi un bòrchi i a skirbi lo siguiente: "Su nòmber ta Juan." I nan tur a keda asombrá.

1:64 I mesora su boka a wòrdu habrí i su lenga a lòs, i el a kuminsá papia, alabando Dios.

1:65 I temor a baha riba tur esnan ku tabata biba rònt di nan; i tur e asuntonan aki a wòrdu papiá den tur e serunan di Judea.

1:66 I tur esnan ku a tende esakinan a warda nan den nan kurason, bisando: "Kiko e yu aki lo bira anto?" Pasobra e man di Señor siguramente tabata kuné.

1:67 I su tata Zakarias a wòrdu yená ku Spiritu Santu, i a profetisá, bisando:

1:68 "Bendishoná sea Señor Dios di Israel, pasobra El a bishitá nos i a trese redenshon pa Su pueblo,

1:69 i a lanta un kachu di salbashon pa nos den kas di Su sirbidó David--

1:70 manera El a papia pa medio di boka di Su profetanan santu for di promé aya--

1:71 salbashon for di nos enemigunan, i for di man di tur esnan ku ta odia nos;

1:72 pa demostrá miserikòrdia na nos tatanan, i pa rekòrdá Su aliansa santu,

1:73 e huramentu ku El a hasi na nos tata Abraham,

1:74 pa konsedé nos pa nos, siendo librá for di man di nos enemigunan, por a sirbiE sin temor,

1:75 den santidat i hustisia dilanti di djE, tur e dianan di nos bida.

1:76 I abo, mi yu, lo wòrdu yamá profeta di e Haltísimo; pasobra abo lo bai dilanti di SEÑOR pa prepará Su kamindanan;

1:77 pa duna Su pueblo konosementu di salbashon pa medio di pordon di nan pikánan,

1:78 pa motibu di e miserikòrdia tierno di nos Dios, ku kual e Salida di Solo for di ariba lo bishitá nos,

1:79 pa resplandesé riba esnan ku ta biba den skuridat i den e sombra di morto, pa dirigí nos pianan hiba riba e kaminda di pas."

1:80 I e yu a krese i a bira fuerte den spiritu, i e tabata biba den e desiertonan te na e dia ku el a presentá públikamente na Israel.

Marko 16 Lukas 2