Levitiko 24

BSNP Edit

Levitiko 24

24:1 E ora ei SEÑOR a papia ku Moisés, bisando:

24:2 "Ordená e yunan di Israel pa nan trese pa bo zeta puru di oleifi batí pa e lus, pa laga un lampi sende kontinuamente.

24:3 Pafó di e velo di testimonio den e tènt di reunion Aaron mester pèrkurá pa esaki for di atardi te mainta dilanti di SEÑOR, kontinuamente; esaki mester ta un statuto perpetuo durante di tur boso generashonnan.

24:4 E mester pèrkurá pa e lampinan riba e kandelá di oro puru dilanti di SEÑOR, kontinuamente.

24:5 "E ora ei bo mester kohe hariña fini i hòrna diesdos pan buskuchi kuné; mester tin dos désimo parti di un efa den kada pan buskuchi.

24:6 I bo mester pone nan den dos kareda, seis den kada kareda, riba e mesa di oro puru dilanti di SEÑOR.

24:7 I pone sensia puru riba kada kareda, pa e ta un porshon di konmemorashon pa e pan, un ofrenda di kandela na SEÑOR.

24:8 Tur dia di sabat e mester pèrkurá pa esaki dilanti di SEÑOR, kontinuamente; ta un aliansa etèrno pa e yunan di Israel.

24:9 I e mester ta pa Aaron ku su yu hòmbernan, i nan mester kom'é den un lugá santu; pasobra pa Aaron esaki ta algu masha santu mes di e ofrendanan di kandela di SEÑOR, su porshon pa semper."

24:10 Awor e yu hòmber di un muhé israelita, kende su tata tabata un egipsio, a sali bai entre e yunan di Israel; i e yu hòmber di e muhé israelita i un hòmber di Israel tabata bringa ku otro den e kampamentu.

24:11 I e yu hòmber di e muhé israelita tabata blasfemá e Nòmber i tabata maldishoná. Pesei nan a hib'é serka Moisés. (Awor nòmber di su mama tabata Selomit, yu muhé di Dibri, di e tribu di Dan.)

24:12 I nan a ser'é den prizon te ora ku e òrdu di SEÑOR a wòrdu hasí kla na nan.

24:13 E ora ei SEÑOR a papia ku Moisés, bisando:

24:14 "Saka esun ku a maldishoná for di e kampamentu, i tur ku a tend'é mester pone nan mannan riba su kabes; anto henter e kongregashon mester piedr'é.

24:15 I papia ku e yunan di Israel, bisando: 'Ken ku maldishoná su Dios mester karga su piká.

24:16 Ademas, esun ku blasfemá e nòmber di SEÑOR mester wòrdu matá sigur; siguramente henter e kongregashon mester piedr'é. Tantu stranhero komo yu di tera, si e blasfemá e Nòmber, e mester wòrdu matá.

24:17 'I si un hòmber kita bida di un ser humano, e mester wòrdu matá sigur.

24:18 I esun ku kita bida di un bestia mester hasi restitushon: bida pa bida.

24:19 I si un hende hasi daño na su próhimo, meskos ku el a hasi, asina mester hasi kuné tambe:

24:20 fraktura pa fraktura, wowo pa wowo, djente pa djente; meskos ku el a hasi daño na un hende, asina mester hasi kuné tambe.

24:21 Asina esun ku mata un bestia mester hasi restitushon, ma esun ku mata un hende mester wòrdu matá.

24:22 Mester tin ún lei pa boso; e mester ta tantu pa stranhero komo pa yu di tera, pasobra Ami ta SEÑOR boso Dios.'"

24:23 E ora ei Moisés a papia ku e yunan di Israel, i nan a saka esun ku a maldishoná for di e kampamentu i a piedr'é ku piedra. Asina e yunan di Israel a hasi meskos ku SEÑOR a ordená Moisés.

Levitiko 23 Levitiko 25