Huesnan 7
7:1
E ora ei Jerobaal, (esta, Gideon) i henter e pueblo ku tabata huntu kuné a lanta tempran i a kampa banda di e fuente di Harod; i e kampamentu di Madian tabata keda panòrt di nan, banda di e seru di Moré den e vaye.
7:2
I SEÑOR a bisa Gideon: "E hendenan ku ta huntu ku bo ta muchu hopi pa Mi entregá Madian den nan man; pa Israel no gaba, bisando: 'Mi mes poder a librami.'
7:3
Pesei anto, bin, proklamá pa e hendenan tende, bisando: 'Ken ku tin miedu i ta tembla, lagu'é bolbe i bandoná Seru Galaad.'" Asina bint'i dos mil hende a bolbe, ma dies mil a keda.
7:4
E ora ei SEÑOR a bisa Gideon: "Ainda e hendenan ta muchu hopi; hiba nan na e awa i ayanan lo Mi tèst nan pa bo. Pesei lo t'asina ku esun di kual Mi bisabo: 'Esun aki lo bai ku bo,' e lo bai ku bo; ma tur esnan di kual Mi bisabo: 'Esun aki lo no bai ku bo,' e lo no bai."
7:5
Asina el a hiba e pueblo na e awa. I SEÑOR a bisa Gideon: "Separá tur esnan ku ta bebe awa ku nan lenga, manera kachó ta hasi, for di tur esnan ku ta hinka rudia pa bebe awa."
7:6
Awor e kantidat di esnan ku a bebe awa manera kachó, ku nan man na nan boka, tabata tres shen hòmber; ma tur e restu di e hendenan a hinka rudia pa bebe awa.
7:7
I SEÑOR a bisa Gideon: "Ku e tres shen hòmbernan ku a bebe awa manera kachó ta hasi lo Mi libra boso, i lo Mi entregá e madianitanan den boso man; pesei, laga tur e otro hendenan bai, kada hòmber pa su kas."
7:8
Asina e tres shen hòmbernan a kohe e provishonnan di e hendenan i nan tròmpètnan den nan man. I Gideon a manda tur e otro hòmbernan di Israel bai, kada un pa su tènt, ma a keda ku e tres shen hòmbernan; i e kampamentu di Madian tabata den e vaye, bou di kaminda Gideon tabata.
7:9
Awor e mesun anochi ei SEÑOR a bis'é: "Lanta, baha bai kontra e kampamentu, pasobra Mi a entregu'é den bo man.
7:10
Ma si bo tin miedu di baha bai, anto bai na e kampamentu ku bo sirbidó Pura,
7:11
i lo bo tende kiko nan ta bisa; i despues bo mannan lo wòrdu fortalesí pa bo baha bai kontra e kampamentu." Asina é ku su sirbidó Pura a baha bai na e pòstnan pafó di e ehérsito ku tabata den e kampamentu.
7:12
Awor e madianitanan i e amalekitanan i tur e yu hòmbernan di oriente tabata drumí abou den e vaye, mes numeroso ku tirakochi; i nan kamelnan tabata asina hopi ku no por a konta nan; nan tabata mes numeroso ku e santu kantu di laman.
7:13
Ora Gideon a yega, mira, un hòmber tabata konta su amigu un soño. I el a bisa: "Mira, mi tabatin un soño; un pan di puspas tabata lora bin den e kampamentu di Madian, i a yega na e tènt i a gòlpia esaki di tal manera ku el a kai, i a bir'é bok'abou, asina ku e tènt a kai plat abou."
7:14
I su amigu a kontestá i a bisa: "Esaki no ta nada otro ku e spada di Gideon, yu di Joas, un hòmber di Israel; Dios a entregá Madian i henter e kampamentu den su man."
7:15
I a sosodé ku ora Gideon a tende e relato di e soño i su interpretashon, el a bùig pa adorá Dios. El a bolbe na e kampamentu di Israel i a bisa: "Lanta, pasobra SEÑOR a entregá e kampamentu di Madian den boso man."
7:16
I el a parti e tres shen hòmbernan den tres grupo, i el a duna nan tur tròmpèt i kanika bashí den nan man, ku flambeu den e kanikanan.
7:17
I el a bisa nan: "Wak mi i hasi meskos. I mira, ora mi yega na rant di e kampamentu, hasi meskos ku mi.
7:18
Ora ku ami, i tur esnan ku ta huntu ku mi, supla tròmpèt, boso tambe supla tròmpèt tur rònt di e kampamentu, i bisa: 'Pa SEÑOR i pa Gideon.'"
7:19
Asina Gideon, i e shen hòmbernan ku tabata huntu kuné, a yega na rant di e kampamentu na kuminsamentu di e di dos warda, ora nan a kaba di kambia warda; i nan a supla e tròmpètnan i a dal e kanikanan, ku nan tabatin den nan man, kibra.
7:20
Ora ku e tres gruponan a supla e tròmpètnan i a kibra e kanikanan, nan a tene e flambeunan den nan man robes, i e tròmpètnan den nan man drechi kla pa supla, i a grita: "Un spada pa SEÑOR i pa Gideon!"
7:21
I kada un tabata pará na su lugá rònt di e kampamentu; i henter e ehérsito tabata kore ta grita segun nan tabata hui.
7:22
I ora nan a supla e tres shen tròmpètnan, SEÑOR a pone spada di esun kontra e otro den henter e ehérsito; i e ehérsito a hui bai te na Bèt-sita den direkshon di Zerera, te na e frontera di Abel-mehola, banda di Tabat.
7:23
I nan a manda yama e hòmbernan di Israel for di Nèftalí i Aser i henter Manasés, i nan a pèrsiguí Madian.
7:24
I Gideon a manda mensaheronan den tur e serunan di Efrain, bisando: "Baha bin kontra Madian i poderá di e awanan ku tin nan dilanti te na Bèt-bara i Jordan." Asina nan a manda yama tur e hòmbernan di Efrain, i nan a poderá di e awanan te na Bèt-bara i Jordan.
7:25
I nan a kapturá e dos lidernan di Madian, Oreb i Zeeb; i nan a mata Oreb na e baranka di Oreb, i nan a mata Zeeb na e baki-di-pèrs-wendrùif di Zeeb, ora ku nan tabata pèrsiguí Madian; i for di e otro banda di Jordan nan a trese e kabesnan di Oreb i Zeeb pa Gideon.