Yozue 11
11:1
E ora ei a sosodé ku ora Jabin, rei di Hazor, a tende di esaki, el a manda rospondi pa Jobab, rei di Madon, i pa rei di Simron i pa rei di Aksaf,
11:2
i pa e reinan di nòrt den e serunan i den Arabá--pasùit di Kineret i den e sabananan i den e serunan haltu di Dor, pabou--
11:3
pa e kananeo ku tabata pariba i pabou, i e amoreo i e heteo i e ferezeo i e jebuseo den e serunan, i e heveo na pia di Hermon na tera di Mizpa.
11:4
I nan a sali, nan i tur nan ehérsitonan huntu ku nan--mes tantu hende ku e santu ku tin kantu di laman, ku masha hopi kabai i garoshi.
11:5
Asina tur e reinan aki ku a bai di akuèrdo pa topa ku otro a bin kampa huntu na e awanan di Merom, pa bringa kontra Israel.
11:6
E ora ei SEÑOR a bisa Josué: "No tene miedu pa nan motibu, pasobra mañan, na e mesun ora aki lo Mi entregá nan tur morto dilanti di Israel; boso mester kòrta kabuya-di-pia di nan kabainan i kima nan garoshinan ku kandela."
11:7
Asina Josué, i tur e hendenan di guera huntu kuné, a bin direpiente riba nan banda di e awanan di Merom, i a ataká nan.
11:8
I SEÑOR a entregá nan den man di Israel, asina ku nan a derotá nan i a pèrsiguí nan te na Gran Sidon i Misrefot-maim i e vaye di Mizpa bai pariba; i nan a mata nan te ora no a keda ni un sobrebibiente.
11:9
I Josué a hasi ku nan manera SEÑOR a bis'é; el a kòrta kabuya-di-pia di nan kabainan i a kima nan garoshinan ku kandela.
11:10
E ora ei Josué a bira bai bèk na e mesun tempu ei, i a kapturá Hazor, i a dal su rei ku spada, pasobra antes Hazor tabata kabes di tur e reinonan aki.
11:11
I nan a dal tur hende ku tabata den djé ku filo di spada, i a destruí nan kompletamente; no a keda nada ku tabata hala rosea. I el a kima Hazor ku kandela.
11:12
I Josué a kapturá tur e statnan di e reinan aki i tur nan reinan, i el a dal nan ku filo di spada, i a destruí nan kompletamente, meskos ku Moisés, e sirbidó di SEÑOR, a ordená.
11:13
Sinembargo, ningun di e statnan, ku tabata keda riba nan serunan, Israel no a kima, ku eksepshon di Hazor, ku Josué a kima.
11:14
I henter e botín di e statnan aki, i e bestianan, e yunan di Israel a kohe pa nan mes; ma nan a dal tur hende ku filo di spada, te ora nan a destruí nan. Nan no a laga nada ku tabata hala rosea.
11:15
Meskos ku SEÑOR a ordená Su sirbidó Moisés, asina Moisés a ordená Josué, i asina Josué a hasi; e no a keda sin hasi nada di tur loke SEÑOR a ordená Moisés.
11:16
Asina Josué a kohe henter e tera ei: e serunan i henter Negèv, henter e tera ei di Gosen, e sabananan, Arabá, e serunan di Israel ku su sabananan
11:17
for di Seru Halak, ku ta subi bai den direkshon di Seir, te na Baal-gad den e vaye di Líbano, na pia di Seru Hermon. I el a kapturá tur nan reinan i a dal nan mata.
11:18
Josué a hasi guera pa hopi tempu ku tur e reinan aki.
11:19
No tabatin ni un stat ku a hasi pas ku e yunan di Israel, ku eksepshon di e heveonan ku tabata biba na Gabaon; nan a kohe nan tur den bataya.
11:20
Pasobra esaki a bin di SEÑOR pa hasi nan kurason duru, pa sali kontra Israel den bataya, pa e por a destruí nan kompletamente, pa nan no haña miserikòrdia, ma pa e por a destruí nan, meskos ku SEÑOR a ordená Moisés.
11:21
Anto Josué a bin e tempu ei i a kaba ku e anakeonan for di e serunan, for di Hebròn, for di Debir, for di Anab, for di tur e serunan di Juda i for di tur e serunan di Israel. Josué a destruí nan ku nan statnan kompletamente.
11:22
No a keda ni un anakeo den e tera di e yunan di Israel; solamente na Gaza, na Gat i na Asdod a keda algun.
11:23
Asina Josué a kohe henter e tera, konforme tur loke SEÑOR a papia ku Moisés; i Josué a entregu'é na Israel komo erensia, segun nan divishonnan, segun nan tribunan. Asina e tera a deskansá di guera.