Yonas 3

BSNP Edit

Yonas 3

3:1 Awor e palabra di SEÑOR a yega na Jonas pa di dos biaha, bisando:

3:2 "Lanta bai Nínive, e stat grandi, i proklamá den djé e mensahe ku Mi ta bai dunabo."

3:3 Asina Jonas a lanta bai Nínive, konforme e palabra di SEÑOR. Awor Nínive tabata un stat masha grandi mes; tabata tuma tres dia pa por a pasa dor di djé.

3:4 Anto Jonas a kuminsá pasa dor di e stat riba e promé dia di kaminda; i el a prediká i a bisa: "Aki kuarenta dia Nínive lo wòrdu destruí."

3:5 E ora ei e hendenan di Nínive a kere den Dios, i nan a proklamá un yunamentu i a bisti paña-di-saku, for di esun di mas haltu te na esun di mas umilde.

3:6 Ora ku e rei di Nínive a haña e notisia, el a lanta for di su trono, a kita su mantel, a bisti paña-di-saku, i a bai sinta den shinishi.

3:7 I el a saka un dekreto ku tabata bisa: "Den Nínive, pa e dekreto di rei i su nobelnan: "No laga ningun hende, ni bestia, ni baka, ni karné kome nada. No laga nan kome, ni bebe awa.

3:8 Ma laga tantu hende komo bestia wòrdu tapá ku paña-di-saku; i laga hende sklama na Dios ku tur sinseridat, pa kada un bira for di su mal kaminda i for di e violensia ku tin den su man.

3:9 Bo no sa nunka. Ainda Dios por bira i repentí, i kita Su rabia ardiente, asina ku nos lo no peresé?"

3:10 Ora Dios a mira nan echonan, ku nan a bira for di nan mal kaminda, e ora ei Dios a repentí di e kalamidat ku El a deklará ku E lo trese riba nan. I E no a hasié.

Yonas 2 Yonas 4