Huan 1

BSNP Edit

Huan 1

1:1 Na prinsipio tabata e Palabra, i e Palabra tabata ku Dios, i e Palabra tabata Dios.

1:2 E tabata na prinsipio ku Dios.

1:3 Tur kos a bin na eksistensia pa medio di djE, i fuera di djE nada di loke ta eksistí no a bin na eksistensia.

1:4 Den djE bida tabata, i e bida tabata e lus di hende.

1:5 I e lus ta lusa den e skuridat, i e skuridat no a komprendé esaki.

1:6 Tabatin un hòmber, mandá di Dios, ku tabata yama Juan.

1:7 El a bin komo testigu pa e duna testimonio di e lus, pa tur kere pa medio di djé.

1:8 E no tabata e lus, ma el a bin pa duna testimonio di e lus.

1:9 Esaki tabata e lus bèrdadero, ku ta lusa tur hende ku ta bin den mundu.

1:10 E tabata den mundu, i e mundu a wòrdu trahá dor di djE, i e mundu no tabata konos'E.

1:11 El a bin serka esnan ku tabata di djE, i esnan ku tabata di djE no a risibiE.

1:12 Ma tur esnan ku a risibiE, na nan El a duna e derecho pa bira yunan di Dios, esnan ku ta kere den Su nòmber,

1:13 ku no a nase di sanger, ni di e boluntat di karni, ni di e boluntat di hende, ma di Dios.

1:14 I e Palabra a bira karni i a biba meimei di nos, i nos a mira Su gloria, gloria manera di e unigénito di e Tata, yen di grasia i bèrdat.

1:15 Juan a duna testimonio di djE i a grita, bisando: "Esaki tabata Esun di Kende mi a bisa: 'Esun ku ta bin despues di mi ta mas ku mi, pasobra E tabata eksistí promé ku mi.'"

1:16 Pasobra di Su plenitut nos tur a risibí, i grasia riba grasia.

1:17 Pasobra e Lei a wòrdu duná pa medio di Moisés; ma grasia i bèrdat a bin pa medio di Jesu-Cristo.

1:18 Ningun hende no a mira Dios nunka; e Yu unigénito, Kende ta den skochi di e Tata, ta E a hasiE konosí.

1:19 I esaki ta e testimonio di Juan, ora ku e hudiunan a manda saserdotenan i levitanan for di Jerusalèm serka djé pa puntr'é: "Ta ken bo ta?"

1:20 El a konfesá i no a nenga, i el a konfesá: "Ami no ta e Cristo."

1:21 I nan a puntr'é: "Kiko anto? T'abo ta Elias?" I el a bisa: "Ami no ta." "T'abo ta e Profeta?" I el a kontestá: "Nò."

1:22 E ora ei nan a puntr'é: "Ta ken bo ta anto, pa nos por duna kontesta na esnan ku a manda nos? Kiko bo ta bisa di bo mes?"

1:23 El a bisa: "Ami ta e bos di un ku ta grita den desierto: 'Hasi e kaminda di SEÑOR stret,' manera profeta Isaias a bisa."

1:24 Awor nan a wòrdu mandá dor di e fariseonan.

1:25 I nan a puntr'é i a bis'é: "Pakiko anto bo ta batisá, si bo no ta e Cristo, ni Elias, ni e Profeta?"

1:26 Juan a kontestá nan, bisando: "Mi ta batisá ku awa, ma meimei di boso tin Un ku boso no konosé.

1:27 E ta Esun ku ta bin despues di mi, Kende mi no ta digno pa lòs strèp di Su sandalia."

1:28 E kosnan aki a tuma lugá na Betania na e otro banda di Jordan, kaminda Juan tabata batisá.

1:29 E siguiente dia Juan a mira Jesus ta bin serka djé i a bisa: "Ata e Lamchi di Dios ku ta kita piká di mundu!

1:30 Esaki ta Esun di kende mi a bisa: 'Despues di mi ta bin un Hòmber ku ta promé ku mi, pasobra E tabata eksistí promé ku mi.'

1:31 I mi no tabata konos'E, ma pa E por wòrdu manifestá na Israel, mi a bin ta batisá ku awa."

1:32 I Juan a duna testimonio, bisando: "Mi a mira e Spiritu ta baha for di shelu manera un palomba, i El a keda riba djE.

1:33 Mi no tabata konos'E, ma Esun ku a mandami batisá ku awa a bisami: 'Esun ku bo mira e Spiritu baha i keda riba djE, ta esaki ta Esun ku ta batisá ku Spiritu Santu.'

1:34 I mi a mira i a duna testimonio ku esaki ta e Yu di Dios."

1:35 I e siguiente dia Juan tabata pará einan atrobe ku dos di su disipelnan.

1:36 I ora ku el a mira Jesus ta pasa, el a bisa: "Ata e Lamchi di Dios!"

1:37 I e dos disipelnan a tend'é papia i nan a sigui Jesus.

1:38 I Jesus a drai wak i a mira ku nan tabata siguiE, i a bisa nan: "Ta kiko boso ta buska?" I nan a kontest'E: "Rabi (ku tradusí ta nifiká Maestro), na unda Bo ta keda?"

1:39 El a bisa nan: "Bin i boso lo mira." Asina nan a bai i a mira na unda E tabata keda. I nan a keda e dia ei serka djE, pasobra tabata mas o menos kuat'or di atardi.

1:40 Un di e dosnan ku a tende Juan papia, i ku a siguiE, tabata Andres, ruman hòmber di Simon Pedro.

1:41 Promé el a topa su mes ruman hòmber Simon i a bis'é: "Nos a haña e Mesias" (ku tradusí ta nifiká Cristo).

1:42 El a hib'é serka Jesus. Jesus a wak é i a bisa: "Abo ta Simon, yu hòmber di Jonas; lo bo wòrdu yamá Sefas" (ku tradusí ta nifiká Pedro).

1:43 E siguiente dia Jesus a disidí di bai Galilea, i El a haña Felipe i a bis'é: "SiguiMi!"

1:44 Awor Felipe tabata di Bètsaida, e stat di Andres i Pedro.

1:45 Felipe a haña Natanael i a bis'é: "Nos a haña Esun di Kende Moisés a skirbi den e Lei i di Kende e Profetanan tambe a skirbi-- Jesus di Nazarèt, yu di Jose."

1:46 I Natanael a puntr'é: "Por sali algu bon for di Nazarèt?" Felipe a bis'é: "Bin i mira."

1:47 Jesus a mira Natanael ta bin serka djE i a bisa di djé: "Ata un bèrdadero israelita, den kende no tin mentira!"

1:48 Natanael a puntr'E: "Di unda Bo konosémi?" Jesus a kontestá i a bis'é: "Promé ku Felipe a yamabo, ora bo tabata bou di e palu di figo, Mi a mirabo."

1:49 Natanael a kontest'E: "Rabi, Abo ta e Yu di Dios; Abo ta e Rei di Israel."

1:50 Jesus a kontestá i a bis'é: "Ta pasobra Mi a bisabo ku Mi a mirabo bou di e palu di figo, bo ta kere? Lo bo mira kosnan mas grandi ku esakinan."

1:51 I El a bis'é: "Di bèrdat, di bèrdat, Mi ta bisa boso, boso lo mira e shelunan habrí i e angelnan di Dios ta subi baha riba e Yu di Hende."

Lukas 24 Huan 2