Yeremias 39
39:1
Awor a sosodé ku tempu ku Jerusalèm a wòrdu kapturá den e di nuebe aña di Sedekias, rei di Juda, den e di dies luna, Nabukodonosor, rei di Babilonia, i henter su ehérsito a bin Jerusalèm i a rondon'é;
39:2
den e di diesun aña di Sedekias, den e di kuater luna, riba e di nuebe dia di luna, nan a kibra muraya di e stat traha un buraku.
39:3
E ora ei tur e ofisialnan di rei di Babilonia a drenta i a sinta na Porta Meimei: Nergal-sarezer, Samgar-nebo, Sarsekim e Rabsaris, Nergal-sarezer e Rabmag, i tur e otro ofisialnan di rei di Babilonia.
39:4
I a sosodé ku ora Sedekias, rei di Juda, i tur e hòmbernan di guera a mira nan, nan a hui den anochi sali for di e stat, dor di pasa den e hòfi di rei via e porta meimei di e dos murayanan; i el a sali bai den direkshon di Arabá.
39:5
Ma e ehérsito di e kaldeonan a pèrsiguí nan i a alkansá Sedekias den e sabananan di Jeriko; i nan a gar'é hiba pa Nabukodonosor, rei di Babilonia, na Ribla den e tera di Hamat, i Nabukodonosor a sentensi'é.
39:6
E ora ei rei di Babilonia a mata e yu hòmbernan di Sedekias dilanti di su bista na Ribla; tambe rei di Babilonia a mata tur e nobelnan di Juda.
39:7
I el a saka Sedekias su wowonan i a mar'é ku bui di bròns pa hib'é Babilonia.
39:8
Tambe e kaldeonan a kima e palasio di rei ku kandela i e kasnan di e pueblo, i nan a basha e murayanan di Jerusalèm abou.
39:9
I pa loke ta e pueblo ku a keda den e stat, esnan ku a pasa ofer pa su banda, i e restu di e pueblo ku a keda, Nabuzaradan, e kapitan di guardia, a hiba nan Babilonia den eksilio.
39:10
Ma algun di e hendenan di mas pober, ku no tabatin nada, Nabuzaradan, e kapitan di guardia, a laga ked'atras na tera di Juda, i den e dianan ei el a duna nan plantashonnan di wendrùif i kunukunan.
39:11
Awor Nabukodonosor, rei di Babilonia, a duna Nabuzaradan, e kapitan di guardia, òrdu tokante di Jeremias, bisando:
39:12
"Tum'é bou di bo kuido i no hasié ningun daño, ma mas bien hasi tur loke e bisabo."
39:13
Asina Nabuzaradan, e kapitan di guardia, huntu ku Nabusazban e Rabsaris, Nergal-sarezer e Rabmag, i tur e ofisialnan prinsipal di rei di Babilonia,
39:14
a duna òrdu pa saka Jeremias for di e plenchi di e guardianan i a lagu'é na enkargo di Gedalias, yu hòmber di Ahikam, yu hòmber di Safan, pa hib'é su kas. Asina el a keda meimei di e pueblo.
39:15
Awor e palabra di SEÑOR a yega na Jeremias, mientras ku e tabata prezo den e plenchi di e guardianan, bisando:
39:16
"Bai papia ku Ebed-melek e etiope, i bisa: 'Asina e SEÑOR di ehérsitonan, e Dios di Israel, ta bisa: "Mira, Mi ta kla pa kumpli ku Mi palabranan riba e stat aki, pa desaster i no pa prosperidat; i esaki lo sosodé den bo presensia riba e dia ei.
39:17
Ma lo Mi librabo riba e dia ei," SEÑOR ta deklará, "i lo bo no wòrdu entregá den man di e hòmbernan di kendenan bo tin miedu.
39:18
Pasobra lo Mi reskatábo sigur, i lo bo no muri pa medio di spada, ma lo bo tin bo mes bida komo botín, pasobra bo a konfia den Mi," SEÑOR ta deklará.'"