Yeremias 38
38:1
Awor Sefatias, yu hòmber di Matan, i Gedalias, yu hòmber di Pasur, Jukal, yu hòmber di Selemias, i Pasur, yu hòmber di Malkias, a tende e palabranan ku Jeremias tabata papia ku henter e pueblo, bisando:
38:2
"Asina SEÑOR ta bisa: 'Esun ku keda den e stat aki lo muri pa medio di spada, pa medio di hamber i pa medio di pèst; ma esun ku pasa ofer pa e kaldeonan lo biba i lo skapa su mes bida komo botín, i keda na bida.'
38:3
Asina SEÑOR ta bisa: 'E stat aki sigur lo wòrdu entregá den man di e ehérsito di rei di Babilonia, i e lo kaptur'é.'"
38:4
E ora ei e ofisialnan a bisa rei: "Laga mata e hòmber, pasobra e ta deskurashá e hòmbernan di guera ku a keda den e stat aki, i henter e pueblo, dor di papia sorto di palabranan asina ku nan; pasobra e hòmber aki no ta buska bienestar di e pueblo aki, sino su destrukshon."
38:5
Asina rei Sedekias a bisa: "Mira, e ta den boso man; pasobra rei no por hasi nada kontra boso."
38:6
E ora ei nan a kohe Jeremias i nan a tir'é den e rembak di Malkias, yu hòmber di rei, kual tabata keda den plenchi di e guardianan; i nan a baha Jeremias na kabuya. I no tabatin awa den e rembak, solamente lodo, i Jeremias a senk den e lodo.
38:7
Ma Ebed-melek e etiope, un eunuko ku tabata den palasio di rei, a tende ku nan a baha Jeremias den e rembak. I rei tabata sintá na Porta Benjamin.
38:8
I Ebed-melek a sali for di palasio di rei i a papia ku rei, bisando:
38:9
"Señor mi rei, e hendenan aki a aktua ku malisia den tur loke nan a hasi ku profeta Jeremias. Nan a tir'é den rembak; i e lo muri di hamber eiden, pasobra no tin mas pan den stat."
38:10
E ora ei rei a duna òrdu na Ebed-melek e etiope, bisando: "Bai ku trinta hòmber bou di bo mando, i saka profeta Jeremias for di e rembak promé ku e muri."
38:11
Asina Ebed-melek a hiba e hòmbernan bou di su mando i a bai den palasio di rei na un lugá bou di e depósito. I for di einan el a kohe bistí bieu i paña kibrá, i na kabuya nan a baha eseinan den e rembak pa Jeremias.
38:12
E ora ei Ebed-melek e etiope a bisa Jeremias: "Awor pone e bistínan bieu i paña kibrá aki bou di bo brasanan, bou di e kabuyanan." I Jeremias a hasi asina.
38:13
Asina nan a hala Jeremias ariba na e kabuyanan i a sak'é for di e rembak, i Jeremias a keda den plenchi di e guardianan.
38:14
E ora ei rei Sedekias a laga trese profeta Jeremias serka djé na e di tres entrada di e kas di SEÑOR; i rei a bisa Jeremias: "Mi ta bai puntrabo algu; no skonde nada pa mi."
38:15
E ora ei Jeremias a bisa Sedekias: "Si mi bisabo, no t'asina ku lo bo matami sigur? Ademas, si mi dunabo konseho, bo no ta skuchami tòg."
38:16
Ma rei Sedekias a hura Jeremias na sekreto, bisando: "Manera SEÑOR ta biba, Kende a duna nos e bida aki, sea sigur ku lo mi no matabo, ni entregábo den man di e hòmbernan aki ku ta buskabo pa mata."
38:17
E ora ei Jeremias a kontestá Sedekias: "Asina SEÑOR, e Dios di ehérsitonan, e Dios di Israel, ta bisa: 'Si di bèrdat bo bai entregá bo mes na e ofisialnan di rei di Babilonia, e ora ei lo bo biba, e stat aki lo no wòrdu kimá ku kandela i abo i bo kas lo sobrebibí.
38:18
Ma si bo no entregá bo mes na e ofisialnan di rei di Babilonia, e ora ei e stat aki lo wòrdu entregá den man di e kaldeonan; i nan lo kim'é ku kandela, i abo mes lo no skapa for di nan man.'"
38:19
Anto rei Sedekias a bisa Jeremias: "Mi tin miedu di e hudiunan ku a pasa ofer pa e kaldeonan, pa nan no entregámi den nan man i nan maltratámi."
38:20
Ma Jeremias a kontestá: "Nan lo no entregábo. Pa fabor, obedesé SEÑOR den loke mi ta bisabo, pa bai bo bon i bo keda na bida.
38:21
Ma si bo sigui nenga di entregá bo mes, esaki ta e palabra ku SEÑOR a mustrami:
38:22
'Mira, tur e muhénan ku a ked'atras den palasio di rei di Juda lo wòrdu tresí pa e ofisialnan di rei di Babilonia; i e muhénan ei lo bisa: "Bo amigunan íntimo a gañabo i a prevalesé kontra bo; mientras ku bo pianan tabata hundí den lodo, nan a bira bai lagabo."
38:23
'Nan lo saka tambe tur bo esposanan i bo yunan pa e kaldeonan, i abo mes lo no skapa for di nan man, ma man di rei di Babilonia lo garabo, i e stat aki lo wòrdu kimá ku kandela.'"
38:24
Anto Sedekias a bisa Jeremias: "No laga ningun hende sa nada di e palabranan aki, i lo bo no muri.
38:25
Ma si e ofisialnan tende ku mi a papia ku bo, i nan bin serka bo i bisabo: 'Bisa nos awor kiko bo a bisa rei, i kiko rei a bisabo; no skonde esei pa nos, i nos lo no matabo,'
38:26
e ora ei bo tin ku bisa nan: 'Mi tabata presentá mi petishon dilanti di rei, pa no mandami bèk na e kas di Jonatan pa muri ayanan.'"
38:27
I tur e ofisialnan a bin serka Jeremias i a hasié pregunta. I el a duna kuenta na nan segun tur e palabranan aki ku rei a ordená; i nan no a bis'é nada mas, ya ku ningun hende no a skucha e kombersashon.
38:28
Asina Jeremias a keda den plenchi di e guardianan te dia ku Jerusalèm a wòrdu kapturá.