Yeremias 14
14:1
Loke a yega na Jeremias komo e palabra di SEÑOR tokante di e sekura:
14:2
"Juda ta lamentá, i su portanan ta kologá. E hendenan ta sinta abou na suela ta tene rou, i e klamor di Jerusalèm a subi bai ariba.
14:3
I nan nobelnan a manda nan sirbidónan pa buska awa; nan a yega na e rembaknan i no a haña awa. Nan a bolbe ku purún bashí; nan a keda na bèrguensa i a sinti nan mes umiyá, i nan a tapa nan kabes.
14:4
Tera a sker, pasobra no tin awaseru riba tera; kunukeronan a keda na bèrguensa; nan a tapa nan kabes.
14:5
Asta e biná den mondi a wèrp i a bandoná su yu, pasobra no tin yerba.
14:6
Burikunan di mondi ta para riba serunan pelon; nan ta snùif bientu meskos ku chakál; nan wowo ta bira skur, pasobra no tin yerba.
14:7
"Maske nos inikidatnan ta testiguá kontra nos, aktua, O SEÑOR, pa kousa di Bo nòmber! Di bèrdat, nos apostasia ta grandi, nos a peka kontra Bo.
14:8
Abo, Speransa di Israel, su Salbador den tempu di angustia, pakiko Bo ta manera un stranhero den e tera, òf manera un biahero ku a span su tènt pa pasa nochi?
14:9
Pakiko Bo ta manera un hòmber desanimá, manera un hòmber poderoso ku no por salba? O SEÑOR, tòg Bo ta meimei di nos, i nos ta wòrdu yamá na Bo nòmber; no bandoná nos!"
14:10
Asina SEÑOR ta bisa tokante di e pueblo aki: "Nan tabata gusta kana dwal; no a importá nan na unda nan pia tabata hiba nan. Pesei SEÑOR no ta aseptá nan; awor E lo kòrda nan inikidat i kastigá nan pikánan."
14:11
Asina SEÑOR a bisami: "No hasi orashon pa bienestar di e pueblo aki.
14:12
Ora nan yuna, lo Mi no skucha nan klamor. I ora nan ofresé ofrenda kimá i ofrenda di mainshi, lo Mi no aseptá nan. Alkontrario, Mi ta bai kaba ku nan pa medio di spada, hamber i pèst."
14:13
Ma mi a bisa: "Ai, Señor DIOS! At'e profetanan ta bisa nan: 'Boso lo no mira spada, ni boso lo no pasa hamber, ma Ami lo duna pas bèrdadero den e lugá aki.'"
14:14
Anto SEÑOR a bisami: "E profetanan ta profetisá mentira den Mi nòmber. Mi no a manda nan, ni a duna nan òrdu, ni a papia ku nan; un vishon falsu, adivinashon, kos sin ningun balor i desepshon di nan mes mente nan ta profetisá na boso.
14:15
Pesei, asina SEÑOR ta bisa tokante di e profetanan ku ta profetisá den Mi nòmber, sin ku ta Ami a manda nan, i ku tòg ta sigui bisa: 'Lo no tin ni spada ni hamber den e tera aki.' Pa medio di spada i hamber e profetanan ei lo yega na nan fin!
14:16
E pueblo tambe, na kende nan ta profetisá, lo keda bentá abou den e kayanan di Jerusalèm, pa motibu di hamber i spada. Lo no tin ningun hende pa dera nan--ni nan, ni nan esposanan, ni nan yu hòmbernan, ni nan yu muhénan, pasobra lo Mi basha nan mes maldat riba nan.
14:17
"I abo lo bisa nan e palabra aki: 'Laga lágrima basha for di mi wowo di dia i anochi sin stòp; pasobra e yu muhé birgen di mi pueblo a wòrdu destrosá ku un sla duru, ku un herida masha infektá mes.
14:18
Si mi bai pafó di stat, mi ta mira esnan matá ku spada! Of si mi bai den stat, mi ta mira esnan ku ta malu pa motibu di hamber! Pasobra tantu profeta komo saserdote ta dwal rònt den un tera ku nan no konosé.'"
14:19
Bo a rechasá Juda kompletamente? Bo a aboresé Sion? Pakiko Bo a dal nos di tal manera ku no tin kura mas pa nos? Nos tabata spera pas, ma nada bon no a bin, i tempu pa kura, ma ata, teror!
14:20
O SEÑOR, nos ta rekonosé nos maldat, e inikidat di nos tatanan, pasobra nos a peka kontra Bo.
14:21
No despresiá nos pa kousa di Bo mes nòmber; no desonrá e trono di Bo gloria; rekòrdá, i no anulá Bo aliansa ku nos.
14:22
Tin sikiera ún entre e ídolonan di e nashonnan ku ta duna awaseru? Of e shelunan por duna yobida? No ta Abo, O SEÑOR nos Dios? Pesei nos ta spera den Bo, pasobra ta Abo ta Esun ku a hasi tur e kosnan aki.