Yeremias 13
13:1
Asina SEÑOR a bisami: "Bai kumpra un faha di lino i pon'é na bo sintura, ma no hink'é den awa."
13:2
Anto mi a kumpra e faha, di akuèrdo ku e palabra di SEÑOR, i a pon'é na mi sintura.
13:3
E ora ei e palabra di SEÑOR a yega na mi pa di dos biaha, bisando:
13:4
"Kohe e faha ku bo a kumpra i ku ta rònt di bo sintura, i bai mesora na Riu Eufrates, i skond'é ayanan den un spleit den baranka."
13:5
Asina mi a bai skond'é banda di Riu Eufrates, manera SEÑOR a ordenámi.
13:6
I a sosodé ku despues di hopi dia SEÑOR a bisami: "Bai mesora na Riu Eufrates i kohe for djei e faha ku Mi a ordenábo pa skonde einan."
13:7
E ora ei mi a bai na Riu Eufrates i a koba, i mi a kohe e faha for di e lugá kaminda mi a skond'é; i at'e faha tabata tur dañá! E no tabata sirbi pa nada mas.
13:8
E ora ei e palabra di SEÑOR a yega na mi, bisando:
13:9
"Asina SEÑOR ta bisa: 'Na e mesun manera lo Mi destruí e orguyo di Juda i e gran orguyo di Jerusalèm.
13:10
Laga e pueblo malbado aki, ku ta nenga di skucha Mi palabranan, ku ta kana segun e kapricho di nan mes kurason i ta sigui tras di otro diosnan pa sirbi nan i pa bùig dilanti di nan, ta meskos ku e faha aki ku no ta sirbi pa nada mas.
13:11
Pasobra meskos ku un faha ta pega na sintura di un hende, asina Mi a hasi henter e kas di Israel i henter e kas di Juda pega na Mi, pa nan ta un pueblo pa Mi, pa fama, pa alabansa i pa gloria; ma nan no a skucha,' SEÑOR ta deklará.
13:12
"Pesei, bisa nan e palabra aki: 'Asina SEÑOR, e Dios di Israel, ta bisa: "Tur butishi mester wòrdu yená ku biña."' I ora nan bisabo: 'Nos no sa masha bon ku tur butishi mester wòrdu yená ku biña?'
13:13
e ora ei bisa nan: 'Asina SEÑOR ta bisa: "Mira, Mi ta bai yena tur habitante di e tera aki ku buracheria--e reinan ku ta sinta pa David riba su trono, e saserdotenan, e profetanan i tur habitante di Jerusalèm!
13:14
I lo Mi dal nan un kontra otro, tatanan i yu hòmbernan tur huntu," SEÑOR ta deklará. "Lo Mi no tene piedat, ni duele ni kompashon, ma lo Mi destruí nan."'"
13:15
Skucha i paga tino, no sea arogante, pasobra SEÑOR a papia.
13:16
Duna gloria na SEÑOR boso Dios promé ku E trese skuridat, i promé ku boso pia trompeká riba e serunan skur, i mientras ku boso ta spera riba klaridat, E ta hasi esaki bira skuridat profundo i ta hasié bira tiniebla.
13:17
Ma si boso no kier skucha esaki, mi alma lo yora den sekreto pa motibu di boso orguyo; mi wowonan lo yora amárgamente i basha lágrima, pasobra e tou di SEÑOR a wòrdu kapturá.
13:18
Bisa rei i reina mama: "Baha for di boso trono, pasobra boso korona bunita a kai for di boso kabes."
13:19
E statnan di Negèv a wòrdu será, i no tin ningun hende pa habri nan; henter Juda a wòrdu hibá den eksilio, kompletamente hibá den eksilio.
13:20
"Hisa boso kara i wak esnan ku ta bin for di nòrt. Unda e tou ta ku a wòrdu duná na bo, bo karnénan bunita?
13:21
Kiko lo bo bisa ora ku E nombra kompañeronan di antes, ku bo mes a siña, pa manda riba bo? Doló lo no serabo manera doló di un muhé na ora di parto?
13:22
I si bo bisa den bo kurason: 'Pakiko e kosnan aki a sosodé ku mi?' Pa motibu di e magnitut di bo inikidat bo sayanan a wòrdu kitá i bo hilchinan a keda bisto.
13:23
Un etiope por kambia su kueru òf un leopardo su manchanan? E ora ei boso tambe por hasi loke ta bon, boso ku ta kustumbrá di hasi malu.
13:24
"Pesei lo Mi plama nan manera yerba seku ku ta bula bai ku bientu di desierto.
13:25
Esaki ta bo suerte, e porshon ku Mi a midi pa bo," SEÑOR ta deklará, "pasobra bo a lubidáMi i a konfia den mentira.
13:26
Asina tambe Mi mes a hisa bo sayanan tapa bo kara kuné, pa hende mira bo bèrguensa.
13:27
Pa loke ta bo adulterionan i bo relinchanan, e maldat di bo prostitushon riba e serunan den kunuku, Mi a mira bo abominashonnan. Ai di bo, O Jerusalèm! Kuantu tempu mas lo bo keda impuru?"