Isaias 62

BSNP Edit

Isaias 62

62:1 Pa motibu di Sion lo mi no keda ketu, i pa motibu di Jerusalèm lo mi no sosegá, te ora ku su hustisia sali manera splendor, i su salbashon manera flambeu sendí.

62:2 I e nashonnan lo mira bo hustisia, i tur rei bo gloria. Lo bo haña un nòmber nobo ku boka di SEÑOR lo duna.

62:3 Tambe lo bo ta un korona di bunitesa den e man di SEÑOR, i un diadema real den e man di bo Dios.

62:4 Nan lo no bisabo mas: "Bandoná," ni nan lo no bisa bo tera mas: "Desolá"; ma lo bo wòrdu yamá: "Mi delisia ta den djé," i nan lo yama bo tera: "Kasá"; pasobra SEÑOR tin delisia den bo, i bo tera lo ta kasá kunE.

62:5 Pasobra manera un yònkuman ta kasa ku un birgen, asina bo yu hòmbernan lo kasa ku bo; i manera brùidehòm tin goso den su brùit, asina bo Dios lo tin goso den bo.

62:6 Mi a pone guardianan riba bo murayanan, O Jerusalèm; henter dia i henter anochi nan lo no keda ketu ni un ora so. Boso ku ta kòrda SEÑOR, no buska sosiegu pa boso mes;

62:7 i no dun'E sosiegu te ora ku E stablesé i hasi Jerusalèm bira un alabansa riba tera.

62:8 SEÑOR a hura pa medio di Su man drechi i pa medio di Su brasa fuerte: "Nunka mas lo Mi no duna bo mainshi komo kuminda pa bo enemigunan, ni stranheronan lo no bebe bo biña nobo, pa kual bo a traha mata kurpa."

62:9 Ma esnan ku ta kosech'é lo kom'é, i alabá SEÑOR; i esnan ku ta rekoh'é lo beb'é den e plenchinan di Mi santuario.

62:10 Pasa, pasa dor di e portanan di stat; prepará e kaminda pa e pueblo; drecha, drecha e kaminda grandi; kita e piedranan, lanta un emblema pa e pueblonan.

62:11 Mira, SEÑOR a proklamá te na fin di tera: Bisa e yu muhé di Sion: "Ata bo salbashon ta bin; mira, Su rekompensa ta huntu kunE, i Su pago ta Su dilanti."

62:12 I nan lo yama nan "E pueblo santu, e redimínan di SEÑOR"; i lo bo wòrdu yamá "Un stat buská i no bandoná."

Isaias 61 Isaias 63