Isaias 52

BSNP Edit

Isaias 52

52:1 Spièrta! Spièrta! Bisti bo fortalesa, O Sion; bisti bo paña bunita, O Jerusalèm, stat santu. Pasobra esnan insirkumsidá i impuru lo no drenta mas den bo.

52:2 Sakudí e stòf for di bo kurpa; lanta i sinta riba bo trono, O Jerusalèm; libra bo mes for di e kadenanan ku tin rònt di bo garganta, O yu muhé katibu di Sion.

52:3 Pasobra, asina SEÑOR ta bisa, "Boso a wòrdu bendí pòrnada, i sin plaka boso lo wòrdu redimí."

52:4 Pasobra, asina Señor DIOS ta bisa, "Den tempu pasá Mi pueblo a baha bai Egipto pa biba ayanan, anto e asirionan a oprimí nan sin motibu.

52:5 "Awor anto, kiko Mi tin aki," SEÑOR ta deklará, "siendo ku Mi pueblo a wòrdu hibá sin motibu?" Atrobe SEÑOR ta deklará, "Esnan ku ta goberná riba nan ta hasi bofon di nan, i henter dia, kontinuamente, Mi nòmber ta wòrdu blasfemá.

52:6 Pesei Mi pueblo lo konosé Mi nòmber; pesei den e dia ei ta Ami ta Esun ku ta bisa: 'At'Ami aki.'"

52:7 Ki bunita riba e serunan ta e pianan di esun ku ta trese bon nobo, ku ta anunsiá pas i ta trese bon nobo di felisidat, ku ta anunsiá salbashon i ku ta bisa Sion: "Bo Dios ta reina!"

52:8 Skucha! Boso guardianan ta halsa nan bos; tur huntu nan ta grita di goso, pasobra ku nan mes wowo nan lo mira ora SEÑOR restorá Sion.

52:9 Dal gritu di goso, kanta huntu, boso, lugánan desolá di Jerusalèm; pasobra SEÑOR a konsolá Su pueblo; el a redimí Jerusalèm.

52:10 SEÑOR a hasi Su brasa santu sunú den bista di tur e nashonnan, pa tur e finnan di tera por mira e salbashon di nos Dios.

52:11 Sali, sali, bai for di einan, no mishi ku nada impuru; sali for di meimei di djé, purifiká boso mes, boso ku ta karga e artíkulonan-di-uzo di SEÑOR.

52:12 Ma boso lo no sali den purá, ni sali manera fugitivo; pasobra SEÑOR lo bai boso dilanti, i e Dios di Israel lo ta boso protekshon di patras.

52:13 Mira, Mi Sirbidó lo prosperá; E lo ta haltu, elevá, sí, grandemente eksaltá.

52:14 Meskos ku hopi a keda stòm di mirabo, Mi pueblo, asina Su aparensia a keda desfigurá, mas ku di kualke hende, i Su forma mas ku di e yunan di hende.

52:15 Asina E lo sprèngu hopi nashon; reinan lo sera nan boka pa Su motibu, pasobra loke no a wòrdu kontá na nan, nan lo mira, i loke nan no a tende, nan lo komprendé.

Isaias 51 Isaias 53