Isaias 50
50:1
Asina SEÑOR ta bisa: "Unda e karta di diborsio ta, ku kual Mi a repudiá boso mama? Of ku kual di esnan ku Mi ta debe Mi a bende boso? Mira, ta pa boso inikidatnan boso a wòrdu bendí, i ta pa boso transgreshonnan boso mama a wòrdu repudiá.
50:2
Pakiko no tabatin ni un hende ora Mi a bin? Ora Mi a yama, pakiko no tabatin ni un hende pa kontestá? Akaso Mi man ta muchu kòrtiku ku e no por redimí? Of Mi no tin poder pa libra? Mira, Mi ta seka laman ku Mi reprendementu, Mi ta hasi riunan bira desierto; nan piská ta hole stinki pa falta di awa, i ta muri di set.
50:3
Mi ta bisti e shelunan ku skuridat, i Mi ta hasi paña-di-saku nan ko'i tapa."
50:4
Señor DIOS a dunaMi un lenga ku a wòrdu siñá, pa Mi sa kon pa sostené ku palabra esun ku ta kansá. E ta spièrtaMi mainta tras mainta; E ta spièrta Mi orea pa tende manera un ku ta wòrdu siñá.
50:5
Señor DIOS a habri Mi orea; Mi no tabata desobedesido, ni Mi no a hal'atras.
50:6
Mi a entregá Mi lomba na esnan ku ta gòlpiaMi, i Mi band'i kara na esnan ku ta ranka Mi barba kit'afó; Mi no a skonde Mi kara pa umiyashon i skupimentu.
50:7
Pasobra Señor DIOS ta yudaMi, pesei Mi no ta wòrdu brongosá; pesei Mi a hasi Mi kara manera piedra duru, i Mi sa ku lo Mi no wòrdu brongosá.
50:8
Esun ku ta hustifikáMi ta serka; ken lo pleita ku Mi? Laga nos konfrontá otro. Ken tin un kaso kontra Mi? Lagu'é aserkáMi.
50:9
Mira, Señor DIOS ta yudaMi; ken ta esun ku ta kondenáMi? Mira, nan tur lo gasta manera un bistí; mòt lo kome nan.
50:10
Ken entre boso ta teme SEÑOR, ken ta obedesé e bos di Su Sirbidó, ken ta kana den skuridat i no tin lus? Lagu'é konfia den e nòmber di SEÑOR i dependé riba su Dios.
50:11
Mira, boso tur ku ta pega kandela, ku ta rondoná boso mes ku flambeu: kana den e lus di boso kandela i meimei di e flambeunan ku boso a sende. Esaki boso lo haña for di Mi man, i boso lo kai drumi abou den tormento.