Isaias 46

BSNP Edit

Isaias 46

46:1 Bèl a bùig; Nebo a bùk; nan a pone nan imagennan riba bestia di karga i baka, pa esakinan karga nan. E kosnan ku boso ta karga ta pisá, un karga pisá pa e bestianan kansá.

46:2 Nan a bùk; tur huntu nan a bùig; nan no por a reskatá e karga, ma nan mes a bai den koutiverio.

46:3 "SkuchaMi, O kas di Jakòb, i henter e restante di e kas di Israel, boso ku Mi a karga for di dia di konsepshon, i ku a wòrdu kargá for di dia di nasementu.

46:4 Te na boso biehes Ami lo ta meskos, i te na boso añanan di kabei blanku lo Mi karga boso! Mi a traha boso i lo Mi sostené boso; lo Mi karga boso i lo Mi libra boso.

46:5 "Ku ken boso kier komparáMi, i konsideráMi igual i similar, pa nos por ta meskos?

46:6 Esnan ku ta basha oro for di saku i ta pisa plata den balansa ta kontratá un platé pa e traha un dios kuné; nan ta bùig te na suela, di bèrdat, nan ta ador'é.

46:7 Nan ta his'é pone riba skouder i ta kargu'é; nan ta pon'é na su lugá i einan e ta keda para. E no ta kita for di su lugá. Maske un hende sklama na djé, e no por kontestá; E no por libr'é for di su angustia.

46:8 "Kòrda esaki, i hink'é bon den boso kabes; tum'é na kuenta, boso, transgresornan.

46:9 Kòrda e kosnan di antes, kosnan di hopi tempu pasá, pasobra Ami ta Dios, i no tin ningun otro Dios. Ami ta Dios, i no tin ningun manera Mi,

46:10 Kende ta deklará e fin for di prinsipio, i for di tempunan antiguo, kosnan ku no a wòrdu hasí ainda, bisando: 'Mi propósito lo wòrdu stablesí, i lo Mi kumpli ku tur loke ta agradáMi';

46:11 for di pariba Mi ta yama un parha di rapiña, for di un tera leu un hòmber pa ehekutá Mi propósito. Di bèrdat Mi a papia; di bèrdat lo Mi kumpli kuné. Mi a plania esaki, siguramente lo Mi hasié.

46:12 SkuchaMi, boso, kabesuranan, boso ku ta leu di hustisia.

46:13 Lo Mi trese Mi hustisia serka, e no ta leu; i Mi salbashon lo no tarda. Lo Mi duna salbashon den Sion i Mi gloria pa Israel.

Isaias 45 Isaias 47