Isaias 45
45:1
Asina SEÑOR ta bisa Siro, Su ungí, esun ku Mi a kohe na su man drechi, pa hasi nashonnan someté nan mes su dilanti, i pa kita arma for di reinan, pa habri portanan su dilanti, asina ku e portanan di stat lo no wòrdu será:
45:2
"Lo Mi bai bo dilanti i hasi e kamindanan malu bira lizu; lo Mi kibra e portanan di bròns, i kòrta pasa dor di nan baranan di heru.
45:3
Lo Mi dunabo e tesoronan di skuridat, i rikesa skondí di lugánan sekreto, pa bo sa ku ta Ami, SEÑOR, e Dios di Israel, ta yamabo na bo nòmber.
45:4
Pa kousa di Mi sirbidó Jakòb i Israel, Mi skohí, Mi a yama abo tambe na bo nòmber; Mi a dunabo un título di onor, ounke bo no tabata konoséMi.
45:5
Ami ta SEÑOR i no tin ningun otro; fuera di Mi no tin Dios. Lo Mi fahabo, ounke bo no a konoséMi,
45:6
pa hende por sa for di ora solo sali te ora ku e drenta, ku no tin ni un otro fuera di Mi. Ami ta SEÑOR, i no tin ningun otro,
45:7
Esun ku ta forma klaridat i ta krea skuridat, Esun ku ta trese prosperidat i ta krea kalamidat; Ami ta e SEÑOR ku ta hasi tur e kosnan aki.
45:8
"Gotia for di ariba, O shelunan, i laga e nubianan basha hustisia; laga tera habri i salbashon produsí fruta, i laga hustisia spreit huntu kuné. Ami, SEÑOR, a krea esaki.
45:9
"Ai di esun ku ta pleita ku Esun ku a trah'é-- un tinashi di klei entre e tinashinan di klei! Akaso e klei ta puntra e alfarero: 'Kiko bo ta hasi?' Of un kos ku bo ta trahando ta bisa: 'E no tin man'?
45:10
Ai di esun ku ta puntra un tata: 'Kiko bo ta engendrá?' Of ku ta puntra un muhé: 'Na kiko bo ta duna lus?'"
45:11
Asina SEÑOR, Esun Santu di Israel, i Esun ku a trah'é, ta bisa: "Bo kier puntraMi tokante di e kosnan ku lo bin, relashoná ku Mi yu hòmbernan; bo kier ordenáMi tokante di e obra di Mi mannan?
45:12
Ta Ami a traha tera, i a krea hende riba djé. Mi a span e shelunan ku Mi mannan, i Mi a ordená henter nan ehérsito.
45:13
Ta Ami a lant'é den hustisia, i lo Mi hasi tur su kamindanan pareu; e lo traha Mi stat i laga Mi eksiliadonan sali liber, sin ningun pago i sin rekompensa," e SEÑOR di ehérsitonan ta bisa.
45:14
Asina SEÑOR ta bisa: "E produktonan di Egipto i e merkansia di Etiopia, i e sabeonan, hòmbernan di estatura haltu, lo pasa pa bo banda, i nan lo bira di bo; nan lo kana bo tras; na kadena nan lo pasa pa bo banda, i lo bùig bo dilanti; nan lo suplikábo, bisando: 'Siguramente Dios ta ku bo i no tin ningun otro, ni un otro Dios.'"
45:15
Di bèrdat, Bo ta un Dios ku ta skonde Su mes, O Dios di Israel, Salbador!
45:16
Tur e trahadónan di ídolo lo keda na bèrguensa i lo wòrdu umiyá; huntu nan lo bai den konfushon.
45:17
SEÑOR a salba Israel ku un salbashon etèrno; boso lo no wòrdu brongosá ni umiyá pa tur etèrnidat.
45:18
Pasobra, asina SEÑOR, Kende a krea e shelunan, ta bisa (E ta e Dios, Kende a forma tera i a trah'é; El a stables'é, i no a krea esaki pa e keda bashí, ma El a form'é pa e wòrdu habitá): "Ami ta SEÑOR, i no tin ningun otro.
45:19
Mi no a papia na sekreto den kualke tera skur; Mi no a bisa e yunan di Jakòb: 'BuskaMi den un lugá bandoná'; Ami, SEÑOR, ta papia hustisia, i ta deklará loke ta rekto.
45:20
"Boso reuní i bin; boso, fugitivonan di e nashonnan, hala serka; esnan ku ta kana rònt ku nan ídolonan di palu, i ta hasi orashon na un dios ku no por salba, no tin konosementu.
45:21
Konta i presentá boso kaso; di bèrdat, laga nan konsultá ku otro. Ken a anunsiá esaki for di tempunan aya? Ken a konta esaki for di tempunan pasá? No ta Ami, e SEÑOR? I no tin otro Dios fuera di Mi, un Dios hustu i un Salbador; no tin otro sino Ami so.
45:22
"Mira na Mi i sea salbá, tur e finnan di tera, pasobra Ami ta Dios i no tin ningun otro.
45:23
Mi a hura pa Mi mes; e palabra a sali for di Mi boka den hustisia, i lo no bolbe-- ku tur rudia lo dobla pa Mi, tur lenga lo hura lealtat na Mi.
45:24
Tokante di Mi nan lo bisa: 'Solamente den SEÑOR tin hustisia i fortalesa.' Hende lo bin serka djE, i tur esnan ku tabata rabiá kunE lo wòrdu brongosá.
45:25
Den SEÑOR tur e yunan di Israel lo ta hustifiká i lo gloria."