Isaias 35

BSNP Edit

Isaias 35

35:1 Tera seku i desierto lo ta kontentu, i Arabá lo regosihá i floria manera rosa.

35:2 E lo floria abundantemente, i regosihá ku goso i gritu di alegria. E gloria di Líbano lo wòrdu duná na djé, e mahestat di Karmelo i Saron. Nan lo mira e gloria di SEÑOR, e mahestat di nos Dios.

35:3 Enkurashá esnan agotá, i fortalesé esnan debil.

35:4 Bisa esnan ku nan kurason ta yen di ansha: "Tene kurashi, no tene miedu. Mira, boso Dios lo bin ku vengansa, ku e pago di Dios, ma E lo salba boso."

35:5 E ora ei wowo di e siegunan lo mira, i orea di e sordonan lo tende.

35:6 Anto e kohonan lo bula manera biná, i lenga di e mudo lo grita di alegria. Pasobra awa lo basha den desierto, i koridanan di awa den Arabá.

35:7 Tera seku, kimá dor di solo, lo bira plas di awa, i e tera ku tin set lo bira fuentenan di awa; den e lugá pa chakál biba aden, esta, su lugá di sosegá, yerba ta bira richi i kabana.

35:8 I lo tin un kaminda grandi ayanan, un karetera, i esaki lo wòrdu yamá e Kaminda Grandi di Santidat. Hende impuru lo no pasa riba djé, ma e lo ta pa esun ku ta kana den e kaminda ei, i hende bobo lo no kana pariba pabou riba djé.

35:9 Lo no tin ningun leon ayanan, ni ningun bestia feros lo no subi e kaminda ei; esakinan lo no wòrdu hañá ayanan. Ma esnan redimí lo kana ayanan,

35:10 i esnan redimí di SEÑOR lo bolbe; nan lo bin Sion ku gritu di goso, ku goso etèrno riba nan kabes. Nan lo haña alegria i goso, i tristesa i suspiro lo hui bai.

Isaias 34 Isaias 36