Isaias 26

BSNP Edit

Isaias 26

26:1 Den e dia ei e kantika aki lo wòrdu kantá na tera di Juda: "Nos tin un stat fuerte; Dios ta lanta murayanan i baluartenan pa siguridat.

26:2 Habri e portanan di stat pa e nashon hustu drenta, esun ku ta keda fiel.

26:3 Lo Bo warda den pas perfekto esun ku su pensamentu ta permanesé den Bo, pasobra e ta konfia den Bo.

26:4 Konfia den SEÑOR pa semper, pasobra den DIOS e SEÑOR nos tin un Baranka etèrno.

26:5 Pasobra El a rebahá esnan ku ta biba na haltu, e stat impenetrabel; E ta umiy'é, E ta umiy'é te na suela, E ta tir'é den stòf.

26:6 Pia lo trap'é, e pianan di esnan afligí, e pasonan di esnan sin yudansa."

26:7 Kaminda di e hustu ta rekto; O Esun Rekto, hasi kaminda di e hustu pareu.

26:8 Di bèrdat, mientras ku nos tabata sigui e kaminda di Bo huisionan, O SEÑOR, nos a spera riba Bo; Bo nòmber, e rekuèrdo di Bo, ta e deseo di nos alma.

26:9 Anochi mi alma ta anhelá na Bo, di bèrdat, mi spiritu den mi ta buskaBo ku diligensia; pasobra ora Bo huisionan bin riba tera, e habitantenan di mundu ta siña hustisia.

26:10 Maske miserikòrdia wòrdu mustrá na e malbado, e no ta siña hustisia; e ta trata inhustu den e tera di rektitut, i no kier mira e mahestat di SEÑOR.

26:11 O SEÑOR, Bo man ta halsá, ma nan no ta mira esaki. Nan ta mira Bo zelo pa e pueblo i nan ta wòrdu brongosá; di bèrdat, kandela lo kaba ku Bo enemigunan.

26:12 SEÑOR, lo Bo stablesé pas pa nos, pasobra Bo a hasi tur nos obranan pa nos.

26:13 O SEÑOR nos Dios, otro señornan fuera di Bo a manda riba nos, ma pa medio di Bo so nos ta konfesá Bo nòmber.

26:14 Nan ta morto awor, nan no ta biba mas, nan a muri, nan no ta lanta mas; pesei Bo a kastigá i a destruí nan, i Bo a kita tur rekuèrdo di nan.

26:15 Bo a hasi e nashon oumentá, O SEÑOR, Bo a hasi e nashon oumentá, Bo ta wòrdu glorifiká; Bo a ekstendé tur e fronteranan di e tera.

26:16 O SEÑOR, nan a buskaBo den angustia; apenas nan por a flùister un orashon; Bo kastigu tabata riba nan.

26:17 Manera ora di duna lus ta yega pa un muhé na estado, i e ta trose i ta grita den su doló di parto, asina nos tabata dilanti di Bo, O SEÑOR.

26:18 Nos tabata na estado, nos tabata trose den doló di parto, ma tabata komo si fuera ta bientu nos a pari. Nos no por a trese liberashon pa e tera, ni habitantenan di mundu no a nase.

26:19 Bo mortonan lo biba; nan kadavernan lo lanta. Boso ku ta drumi den stòf, spièrta i grita di goso, pasobra bo serena ta manera serena di ourora, i tera lo duna lus na su mortonan.

26:20 Bin, mi pueblo, drenta den bo kambernan i sera bo portanan bo tras; skonde pa un poko tempu, te ora indignashon pasa.

26:21 Pasobra mira, SEÑOR ta serka di sali for di Su lugá di biba, pa kastigá e habitantenan di tera pa nan inikidat; i tera lo revelá e sanger ku el a drama, i lo no tapa su mortonan mas.

Isaias 25 Isaias 27