Isaias 22

BSNP Edit

Isaias 22

22:1 Un profesia tokante di e vaye di vishon. Kiko a pasa boso awor, ku boso tur a subi bai riba dak di kas?

22:2 Abo ku tabata yen di boroto, abo, stat di buya, abo, stat di alegria; bo mortonan no a wòrdu matá ku spada, ni nan no a muri den bataya.

22:3 Tur bo gobernantenan a hui bai huntu; nan a wòrdu kapturá sin ku mester a uza bog; tur ku a wòrdu hañá den bo a wòrdu kapturá huntu, maske nan a hui bai masha leu.

22:4 Pesei mi ta bisa: "Kita bo bista for di mi, lagami yora amárgamente; no purba di konsolámi tokante di e destrukshon di e yu muhé di mi pueblo."

22:5 Pasobra e Señor DIOS di ehérsitonan tin un dia di pániko, angustia i konfushon den e vaye di vishon, un bashamentu abou di murayanan i un gritamentu na e seru.

22:6 Anto Elam a kohe su muchila-pa-karga-flecha, huntu ku garoshi, sòldánan-na-pia i koredónan di kabai; i Kir a saka eskudo.

22:7 Bo vayenan di mas bunita tabata yen di garoshi, i e koredónan di kabai a pone nan mes den òrdu di bataya na e porta di stat.

22:8 I El a kita e defensa di Juda. Den e dia ei bo tabata dependé riba e armanan di e kas di mondi-será,

22:9 i boso a mira ku e kibránan den muraya di e stat di David tabata hopi; i boso a rekohé awa for di e tanki mas abou.

22:10 E ora ei boso a konta e kasnan di Jerusalèm, i boso a tumba kasnan pa fortifiká e muraya.

22:11 I meimei di e dos murayanan boso a traha un rembak, pa e awa di e tanki bieu. Ma boso no a dependé di Esun ku a trah'é, ni boso no a tuma den konsiderashon Esun ku a plania esaki hopi tempu pasá.

22:12 Pesei den e dia ei e Señor DIOS di ehérsitonan a yama boso pa yora, pa lamentá, pa feita kabes i pa bisti paña-di-saku.

22:13 Ma na lugá di esei tin goso i alegria, matamentu di baka i matamentu di karné, komementu di karni i bebementu di biña: "Laga nos kome i bebe, pasobra mañan nos ta muri."

22:14 Ma e SEÑOR di ehérsitonan a revelá Su mes na mi: "Siguramente, te dia ku boso muri boso lo no ta pordoná pa e inikidat aki," e Señor DIOS di ehérsitonan ta bisa.

22:15 Asina e Señor DIOS di ehérsitonan ta bisa: "Bai serka e mayordomo aki, serka Sebna, kende tin enkargo di e kas di rei:

22:16 'Ta ki derecho bo tin akinan, i ta ken bo tin akinan, ku bo a traha un tumba pa bo mes akinan, abo ku a traha un tumba na haltu, abo ku a kap un lugá di sosegá pa bo mes den baranka?

22:17 'Mira, SEÑOR ta bai bentabo afó ku violensia, O hòmber; E ta kla pa garabo duru,

22:18 i lorabo firme manera un bala, pa wòrdu tirá den un pais inmenso; ayanan lo bo muri, i ayanan bo garoshinan luhoso lo keda, abo, bèrguensa pa kas di bo maestro.'

22:19 Lo Mi bahabo for di bo lugá, i lo Mi rankabo bahabo for di bo puesto.

22:20 "Anto lo sosodé den e dia ei ku lo Mi yama Mi sirbidó Eliakim, yu hòmber di Hilkias,

22:21 i lo Mi bistié bo túnika i mara bo faha bon mará na su barika. Lo Mi entregá bo outoridat na djé, i e lo bira un tata pa e habitantenan di Jerusalèm i pa e kas di Juda.

22:22 E ora ei lo Mi pone e yabi di kas di David riba su skouder. Ora ku e habri, ningun hende lo no sera; ora ku e sera, ningun hende lo no habri.

22:23 Lo Mi klab'é manera un klabu den un lugá firme, i e lo bira un trono di gloria pa e kas di su tata.

22:24 Asina nan lo kologá tur e gloria di e kas di su tata na djé, yunan i nietunan, tur artíkulo-di-uzo di mas chikitu, for di kòmchi te na tur sorto di butishi.

22:25 "Den e dia ei," e SEÑOR di ehérsitonan ta deklará, "e klabu klabá den un lugá firme lo lòs; e lo kibra kit'afó i kai, i e karga ku ta kologá na djé lo wòrdu kit'afó, pasobra SEÑOR a papia."

Isaias 21 Isaias 23