Isaias 13

BSNP Edit

Isaias 13

13:1 Un profesia tokante di Babilonia, ku Isaias, yu hòmber di Amos, a mira.

13:2 Lanta un emblema riba e seru pelon, halsa boso bos yama nan. Hasi seña ku boso man pa nan drenta e portanan di e nobelnan.

13:3 Mi a duna òrdu na esnan konsagrá na Mi, i Mi a yama Mi guereronan poderoso, Mi hendenan ku ta regosihá ku orguyo, pa ehekutá Mi rabia.

13:4 Un zonidu di tumulto riba e serunan, manera e tumulto di hopi hende! Un zonidu di e tumulto di reinonan, di nashonnan ku a reuní huntu! E SEÑOR di ehérsitonan ta mobilisá e ehérsito pa bataya.

13:5 Nan ta bin for di un tera leu, for di fin di e shelunan, SEÑOR i Su instrumèntnan di indignashon, pa destruí henter e tera.

13:6 Lamentá, pasobra e dia di SEÑOR ta serka! E lo bin manera destrukshon for di e Todopoderoso.

13:7 Pesei tur man lo bira slap, i kurason di tur hende lo dirti.

13:8 Nan lo yena ku teror, doló i ansha lo poderá di nan; nan lo trose manera un muhé na ora di parto; tur turdí nan lo wak otro, ku kara manera flam di kandela.

13:9 Mira, e dia di SEÑOR ta bin, kruel, ku furia i ku rabia ardiente, pa hasi e tera un desolashon; i E lo kaba ku e pekadónan ku tin den djé.

13:10 Pasobra e streanan di shelu i nan konstelashonnan lo no duna nan klaridat; solo lo ta skur ora e sali, i luna lo no duna su klaridat.

13:11 Asina lo Mi kastigá mundu pa su maldat, i e malbadonan pa nan inikidat. Tambe lo Mi pone un fin na e arogansia di e orguyosonan, i rebahá e orguyo di hende kruel.

13:12 Lo Mi hasi hende mortal mas skars ku oro puru, i humanidat mas skars ku oro di Ofir.

13:13 Pesei lo Mi hasi e shelunan tembla, i tera lo wòrdu sakudí for di su lugá den e furia di e SEÑOR di ehérsitonan, den e dia di Su rabia ardiente.

13:14 I lo sosodé ku manera un gasèl ku yagdó ta pèrsiguí, òf manera karné sin wardadó, kada un lo bolbe serka su mes hendenan, i kada un lo hui bai su mes tera.

13:15 Ken ku nan haña lo wòrdu traspasá, i ken ku nan kapturá lo kai pa medio di spada.

13:16 Nan muchanan chikitu tambe lo wòrdu plèchá dilanti di nan bista; nan kasnan lo wòrdu geplùnder i nan esposanan violá.

13:17 Mira, Mi ta bai lanta e medonan kontra nan, kendenan no ta interesá den plata ni tin plaser den oro.

13:18 Nan bognan lo plècha e hobennan; nan lo no tene kompashon ku e fruta di barika, ni nan wowo lo no tene duele di mucha.

13:19 I Babilonia, e bunitesa di reinonan, e gloria di e orguyo di e kaldeonan, lo ta manera Sodoma i Gomora, tempu ku Dios a destruí nan.

13:20 Di generashon pa generashon nunka mas e lo wòrdu habitá ni poblá; ni arabir lo no arma su tènt ayanan, ni wardadó di karné lo no pone su tou di karné drumi ayanan.

13:21 Ma bestianan di desierto lo sosegá ayanan, i nan kasnan lo ta yen di palabrua; abestrus tambe lo biba ayanan, i kabritu di mondi lo bula rònt ayanan.

13:22 I hiena lo yora den nan torennan fortifiká i chakál den nan palasionan luhoso. Tambe su tempu lo bin pronto i su dianan lo no wòrdu prolongá.

Isaias 12 Isaias 14