Hoseas 5

BSNP Edit

Hoseas 5

5:1 Tende esaki, O saserdotenan! Paga tino, O kas di Israel! Skucha, O kas di rei! Pasobra e huisio ta toka boso, pasobra boso tabata un trampa na Mizpa, i un reda habrí riba Tabor.

5:2 I e rebeldenan a hundi nan mes den korupshon, ma lo Mi kastigá nan tur.

5:3 Mi konosé Efrain, i Israel no ta skondí pa Mi; pasobra awor, O Efrain, bo a kometé prostitushon; Israel a profaná su mes.

5:4 Nan echonan lo no pèrmití nan bolbe na nan Dios. Pasobra un spiritu di prostitushon ta biba den nan, i nan no konosé SEÑOR.

5:5 Ademas, e orguyo di Israel ta testifiká kontra djé, i Israel ku Efrain ta trompeká den nan inikidat; Juda tambe a trompeká huntu ku nan.

5:6 Nan lo bai ku nan karnénan i bakanan pa buska SEÑOR, ma nan lo no hañ'E; El a apartá Su mes for di nan.

5:7 Nan a trata SEÑOR ku traishon, pasobra nan a engendrá yunan ilegítimo. Awor fiesta di luna nobo lo devorá nan huntu ku nan tera.

5:8 Supla kachu na Gabaa i tròmpèt na Rama. Zona alarma na Bèt-aven: "Tras di bo, Benjamin!"

5:9 Efrain lo bira un desolashon den e dia di huisio; entre e tribunan di Israel Mi ta deklará loke ta sigur.

5:10 E prensnan di Juda a bira manera esnan ku ta hala un frontera; riba nan lo Mi basha Mi furia manera awa.

5:11 Efrain ta oprimí, kibrá na pida-pida den huisio, pasobra e tabata desidido di sigui òrdu di hende.

5:12 Pesei Mi ta manera un mòt pa Efrain, i manera kos putrí pa e kas di Juda.

5:13 Ora Efrain a mira su malesa, i Juda su herida, e ora ei Efrain a bai Asiria i a manda pidi yudansa serka rei Jareb. Ma e no por sanabo ni kurabo di bo herida.

5:14 Pasobra lo Mi ta manera un leon pa Efrain, i manera un leon chikitu pa e kas di Juda. Ami, Ami mes lo sker nan na pida-pida i bai; lo Mi kohe nan bai kuné, i lo no tin ningun hende pa libra.

5:15 Lo Mi bai i bolbe na Mi lugá te ora nan rekonosé nan kulpa i buska Mi kara; den nan aflikshon nan lo buskaMi ku sinseridat.

Hoseas 4 Hoseas 6