Hoseas 12

BSNP Edit

Hoseas 12

12:1 Efrain ta biba di bientu, i ta pèrsiguí bientu di pariba kontinuamente; e ta multipliká mentira i violensia. Ademas, e ta sera un aliansa ku Asiria, i zeta ta wòrdu hibá na Egipto.

12:2 Tambe SEÑOR tin un pleitu ku Juda, i lo kastigá Jakòb konforme su kondukta; E lo pagu'é konforme su echonan.

12:3 Den matris el a kohe su ruman hòmber tene na su hilchi, i den su madures el a pleita ku Dios.

12:4 Sí, el a lucha ku e Angel i a prevalesé; el a yora i a roga pa Su grasia. El a hañ'E na Bèt-èl, i ayanan El a papia ku nos,

12:5 esta, SEÑOR, e Dios di ehérsitonan; SEÑOR ta Su nòmber.

12:6 Pesei, bolbe serka bo Dios, tene miserikòrdia i hasi hustisia, i spera kontinuamente riba bo Dios.

12:7 Un negoshante, ku balansa engañoso den su man, ta gusta oprimí.

12:8 I Efrain a bisa: "Siguramente mi a bira riku, mi a haña rikesa pa mi mes; den tur mi trabounan nan lo no haña den mi ningun inikidat ni piká."

12:9 "Ma Mi tabata SEÑOR bo Dios for di tera di Egipto; lo Mi hasibo biba den tènt atrobe, manera den e dianan di e fiesta stipulá.

12:10 Tambe Mi a papia ku e profetanan, i Mi a duna hopi vishon; i pa medio di e profetanan Mi a duna parábolanan."

12:11 Tin inikidat na Galaad? Siguramente nan ta pèrvèrso. Na Gilgal nan ta sakrifiká bishé machu, sí, nan altarnan ta manera montonnan di piedra banda di e hoyonan di e kunuku geplug.

12:12 Awor Jakòb a hui bai na tera di Aram, i Israel a traha pa e haña un esposa, i pa e haña un esposa el a kuida karné.

12:13 Ma pa medio di un profeta SEÑOR a saka Israel for di Egipto, i pa medio di un profeta e tabata wardá.

12:14 Efrain a proboká na rabia amargo; pesei su SEÑOR lo laga su kulpa di sanger keda riba djé, i trese su reproche bèk riba djé.

Hoseas 11 Hoseas 13