Hoseas 11

BSNP Edit

Hoseas 11

11:1 "Tempu ku Israel tabata mucha, Mi tabata stim'é, i for di Egipto Mi a yama Mi yu hòmber.

11:2 Mas nan a yama nan, mas leu nan a bai for di nan; nan a sigui ofresé sakrifisio na e Baalnan i kima sensia na ídolonan.

11:3 Tòg ta Ami ta Esun ku a siña Efrain kana, Mi a kohe nan den Mi brasa; ma nan no tabata sa ku Mi a kura nan.

11:4 Mi a guia nan ku kordonnan di hende, ku lasonan di amor, i Mi a bira pa nan manera un hende ku ta kita e yugo for di nan kachete; i Mi a bùk abou i a kria nan.

11:5 "Nan lo no bolbe na tera di Egipto; ma Asiria--e lo ta nan rei, pasobra nan a nenga di bolbe serka Mi.

11:6 I e spada lo zwai kontra nan statnan, i lo destruí nan baranan di porta i kaba ku nan pa motibu di nan konsehonan.

11:7 Asina Mi pueblo ta determiná pa bira for di Mi. Maske nan yama nan pa bin serka e Haltísimo, ningun di nan apsolutamente no ta hals'E.

11:8 "Kon Mi por bandonábo, O Efrain? Kon Mi por entregábo, O Israel? Kon Mi por hasibo manera Adma? Kon Mi por tratabo manera Zeboim? Mi kurason ta bòlter den Mi; tur mi kompashonnan ta lanta.

11:9 Lo Mi no ehekutá Mi rabia ardiente; lo Mi no destruí Efrain mas. Pasobra Ami ta Dios i no hende, Esun Santu meimei di boso, i lo Mi no bin den furia.

11:10 Nan lo kana tras di SEÑOR; E lo gruña manera leon; di bèrdat E lo gruña, i Su yu hòmbernan lo bin na temblamentu for di pabou.

11:11 Nan lo bin ta tembla, manera parha for di Egipto, i manera palomba for di tera di Asiria; i lo Mi stablesé nan den nan kasnan," SEÑOR ta deklará.

11:12 Efrain ta rondonáMi ku mentira, i e kas di Israel ku engaño; Juda tambe ta rebelde kontra Dios, asta kontra Esun Santu, Kende ta fiel.

Hoseas 10 Hoseas 12