Esdras 9
9:1
Awor ora e kosnan aki a wòrdu kompletá, e prensnan a bin serka mi, bisando: "E pueblo di Israel i e saserdotenan i e levitanan no a separá nan mes for di e pueblonan di e teranan, pa loke ta trata nan abominashonnan, esta, for di e kananeonan, e heteonan, e ferezeonan, e jebuseonan, e amonitanan, e moabitanan, e egipsionan i e amoreonan.
9:2
Pasobra nan a tuma algun di nan yu muhénan komo esposa pa nan mes i pa nan yu hòmbernan, asina ku e rasa santu a meskla ku e pueblonan di e teranan; di bèrdat, e mannan di e prensnan i e gobernantenan tabata esnan di promé pa hasi e infieldat aki."
9:3
I ora mi a tende tokante di e asunto aki, mi a sker mi paña i mi mantel, i a ranka poko kabei for di mi kabes i mi barba, i mi a kai sinta tur babuká.
9:4
E ora ei tur esnan ku tabata tembla pa e palabranan di e Dios di Israel pa motibu di e infieldat di e eksiliadonan a reuní serka mi; i mi a keda sinta tur babuká te na e ora di ofrenda di atardi.
9:5
Ma na e ora di ofrenda di atardi mi a lanta for di mi umiyashon, ku mi paña i mantel gesker, i mi a kai na rudia i a habri mi mannan na SEÑOR mi Dios,
9:6
i mi a bisa: "O mi Dios, mi tin bèrguensa, i mi ta sintimi umiyá, i mi tin bèrguensa di hisa mi kara na Bo, mi Dios, pasobra nos inikidatnan a multipliká riba nos kabesnan, i nos kulpa a krese yega te na e shelunan.
9:7
For di e dianan di nos tatanan te dia djawe nos kulpa tabata grandi, i pa motibu di nos inikidatnan, nos, nos reinan i nos saserdotenan a keda entregá den man di e reinan di e teranan, na spada, na koutiverio, na plùnder i na bèrguensa públiko, manera ta awe.
9:8
"Ma awor pa un momento kòrtiku grasia a wòrdu mustrá for di SEÑOR nos Dios, pa laga pa nos un restante ku a skapa i pa duna nos un lugá firme den Su lugá santu, pa nos Dios por iluminá nos wowo i duna nos poko rebibamentu den nos sklabitut.
9:9
Pasobra nos ta esklabu; sinembargo, den nos sklabitut nos Dios no a bandoná nos, ma a mustra nos miserikòrdia den bista di e reinan di Persia, pa duna nos rebibamentu pa lanta e kas di nos Dios, pa restorá su ruinanan i pa duna nos un muraya na Juda i Jerusalèm.
9:10
"I awor, nos Dios, kiko nos lo bisa despues di esaki? Pasobra nos a bandoná Bo mandamentunan
9:11
ku Bo a ordená pa medio di Bo sirbidónan e profetanan, bisando: 'E tera ku boso ta drenta pa poderá di djé ta un tera impuru, pa motibu di e sushedat di e pueblonan di e teranan, pa motibu di nan abominashonnan ku a yen'é di punta pa punta i pa motibu di nan impuresa.
9:12
Asina anto, no duna boso yu muhénan na nan yu hòmbernan ni tuma nan yu muhénan pa boso yu hòmbernan; i no buska nan pas ni nan prosperidat nunka, pa boso por ta fuerte i kome e kosnan bon di e tera, i lagu'é komo un erensia pa boso yu hòmbernan pa semper.'
9:13
"I despues di tur loke ku a bin riba nos pa motibu di nos mal echonan i nos gran kulpa, komo ku Abo nos Dios a kastigá nos menos ku nos inikidatnan ta meresé, i a duna nos un restante ku a skapa, manera esaki,
9:14
nos lo bolbe kibra Bo mandamentunan i imparentá ku e pueblonan ku ta kometé e abominashonnan aki? Lo Bo no rabia ku nos te na e punto di destrukshon, te ora no tin restante mas ni ningun ku ta skapa?
9:15
O SEÑOR Dios di Israel, Bo ta hustu, pasobra nos a keda komo un restante ku a skapa, manera ta awe. Mira, nos ta Bo dilanti den nos kulpa, pasobra ningun hende no por para Bo dilanti pa motibu di esaki."