Ezikiel 6
6:1
I e palabra di SEÑOR a yega na mi, bisando:
6:2
"Yu di hende, bira bo kara wak den direkshon di e serunan di Israel, i profetisá kontra nan,
6:3
i bisa: 'O serunan di Israel, skucha e palabra di Señor DIOS! Asina Señor DIOS ta bisa e serunan i seritunan, e roinan i e vayenan: "Mira, Mi mes ta bai trese un spada kontra boso, i lo Mi destruí boso lugánan haltu.
6:4
Asina boso altarnan lo keda desolá i boso altarnan di sensia lo wòrdu kibrá na pida-pida. I lo Mi hasi boso mortonan kai dilanti di boso ídolonan.
6:5
Tambe lo Mi pone e kadavernan di e yunan di Israel dilanti di nan ídolonan, i lo Mi plama boso wesunan rònt di boso altarnan.
6:6
Den tur boso lugánan di biba statnan lo keda ruiná i e lugánan haltu lo keda desolá, asina ku boso altarnan lo keda ruiná i desolá, boso ídolonan kibrá i destruí, boso altarnan di sensia bashá abou, i loke boso a traha lo wòrdu kitá kompletamente.
6:7
E mortonan lo kai meimei di boso i boso lo sa ku Ami ta SEÑOR.
6:8
"Ma lo Mi laga un restante, pasobra boso lo tin meimei di e nashonnan esnan ku a skapa for di spada, ora boso wòrdu plamá den e nashonnan.
6:9
E ora ei esnan di boso ku skapa lo kòrda riba Mi den e nashonnan pa unda nan lo wòrdu hibá den koutiverio--kon Mi a sufri pa motibu di nan kurason adúltero, ku a alehá for di Mi, i pa motibu di nan wowonan ku nan a prostituí kuné dor di sigui tras di nan ídolonan. Nan lo tin asko di nan mes pa motibu di e maldatnan ku nan a kometé den tur nan abominashonnan.
6:10
E ora ei nan lo sa ku Ami ta SEÑOR. No ta pòrnada Mi a bisa ku lo Mi trese e desaster aki riba nan."'
6:11
"Asina Señor DIOS ta bisa: 'Bati man, bati pia abou i bisa: "Ai, pa motibu di tur e abominashonnan grandi di e kas di Israel, pasobra nan lo kai pa medio di spada, hamber i pèst.
6:12
Esun ku ta leu lo muri pa medio di pèst; esun ku ta serka lo kai pa medio di spada; i esun ku keda i ku ta tur rondoná lo muri pa medio di hamber. Asina lo Mi kumpli ku Mi furia riba nan.
6:13
E ora ei boso lo sa ku Ami ta SEÑOR, ora nan mortonan keda meimei di nan ídolonan rònt di nan altarnan, riba tur seru haltu, riba tur kabes di seru, bou di tur palu bèrdè i bou di tur palu di eik ku ta yen di blachi, e lugánan kaminda nan tabata ofresé sensia di holó dushi na tur nan ídolonan.
6:14
Asina lo Mi saka Mi man kontra nan den tur nan habitashonnan i hasi e tera desolá, sí, mas desolá ku e desierto na Diblat. Asina nan lo sa ku Ami ta SEÑOR."'"