Ezikiel 42
42:1
Despues el a hibami na e plenchi pafó, den direkshon panòrt; i el a hibami den e sala ku ta keda dilanti di e espasio separá, i dilanti di e edifisio ku ta keda parti panòrt.
42:2
Den su largura, kual tabata shen kodo, e porta panòrt tabata keda; e tabata sinkuenta kodo hanchu.
42:3
Dilanti di e binti kodonan ku tabata pertenesé na e plenchi paden, i dilanti di e flur ku tabata pertenesé na e plenchi pafó, tabatin hadrei dilanti hadrei, den tres piso.
42:4
I dilanti di e salanan tabatin un pasada ta bai paden, dies kodo hanchu i shen kodo largu; i nan portanan tabata habri panòrt.
42:5
Awor e salanan mas ariba tabata mas smal, pasobra e hadreinan tabata tuma mas espasio for di nan ku for di e esnan di e piso mas abou i esnan di e piso meimei di e edifisio.
42:6
Pasobra nan tabata den tres piso i no tabatin pilar manera e pilarnan di e plenchinan. Pesei esnan mas ariba tabata mas smal ku esnan mas abou i esnan meimei, for di suela.
42:7
I e muraya pafó, banda di e kambernan den direkshon di e plenchi pafó ku ta keda kara pa e salanan, tabata sinkuenta kodo largu.
42:8
Pasobra largura di e salanan ku tabata den e plenchi pafó tabata sinkuenta kodo, i mira, largura di esnan kara pa e tèmpel tabata shen kodo.
42:9
I bou di e salanan aki tabatin e entrada parti pariba, ora ta drenta nan for di e plenchi pafó.
42:10
Den e hanchura di e muraya di e plenchi parti pariba, kara pa e espasio separá i kara pa e edifisio, tabatin salanan.
42:11
I e pasada dilanti di nan tabata parse esnan di e salanan parti panòrt; nan largura i nan hanchura tabata igual; i tur nan salidanan tabata segun nan midínan i segun nan entradanan.
42:12
I meskos ku e entradanan di e salanan ku tabata kara pasùit, ora hende ta drenta bai paden, tabatin un entrada na kuminsamentu di e pasada tambe, e pasada dilanti di e muraya parti pariba.
42:13
I el a bisami: "E salanan panòrt i e salanan pasùit, ku ta keda dilanti di e espasio separá, eseinan ta e salanan santu kaminda e saserdotenan ku ta aserká SEÑOR lo kome e kosnan di mas santu. Aya nan lo pone e kosnan di mas santu, e ofrenda di mainshi, e ofrenda pa piká i e ofrenda pa kulpa, pasobra e lugá ta santu.
42:14
Ora ku e saserdotenan drenta, nan lo no sali for di e lugá santu bai na e plenchi pafó sin kita nan paña den kual nan ta sirbi, i lagu'é ayanan, pasobra eseinan ta santu. Nan lo bisti otro paña, i e ora ei nan lo aserká e lugánan ku ta pa e pueblo."
42:15
Awor ora ku el a kaba di midi e kas paden, el a hibami pafó pa medio di e porta ku tabata kara pariba, i a midié tur rònt.
42:16
El a midi banda pariba ku e richi-di-midi, sinku shen richi ku e richi-di-midi.
42:17
El a midi banda panòrt, sinku shen richi ku e richi-di-midi.
42:18
Na banda pasùit el a midi sinku shen richi ku e richi-di-midi.
42:19
El a bira banda pabou i a midi sinku shen richi ku e richi-di-midi.
42:20
El a midié na e kuater bandanan; e tabatin un muraya tur rònt: largura sinku shen i hanchura sinku shen, pa hasi separashon entre loke ta santu i loke ta profano.