Ezikiel 30

BSNP Edit

Ezikiel 30

30:1 Atrobe e palabra di SEÑOR a yega na mi, bisando:

30:2 "Yu di hende, profetisá i bisa: 'Asina Señor DIOS ta bisa: "Grita yora i bisa: 'Ai di e dia!'

30:3 Pasobra e dia ta serka, e dia di SEÑOR ta serka; e lo ta un dia nublá, un tempu di desaster pa e nashonnan.

30:4 I un spada lo bin kontra Egipto; i lo tin angustia na Etiopia ora ku e mortonan kai na Egipto, i nan bai ku su rikesanan, i su fundeshinan keda destruí.

30:5 Etiopia, Put, Lut, henter Arabia, Libia, i e pueblo di e tera ku ta ligá ku otro, lo kai pa medio di spada huntu ku nan."

30:6 'Asina SEÑOR ta bisa: "Di bèrdat, esnan ku ta sostené Egipto lo kai, i e orguyo di su poder lo baha; for di Migdol te na Sevene nan lo kai ayanan pa medio di spada," Señor DIOS ta deklará.

30:7 "I nan lo keda desolá entre e teranan desolá, i su statnan lo keda entre e statnan destruí.

30:8 I nan lo sa ku Ami ta SEÑOR, ora Mi sende Egipto na kandela, i tur esnan ku yud'é keda destruí.

30:9 "Riba e dia ei mensaheronan lo sali for di Mi den barkunan, pa spanta Etiopia ku ta sinti su mes asina sigur. I angustia lo ta riba nan meskos ku riba e dia di Egipto, pasobra, mira, e ta bin!"

30:10 'Asina Señor DIOS ta bisa: "Tambe lo Mi pone un fin na e multitut di Egipto pa medio di man di Nabukodonosor, rei di Babilonia.

30:11 E ku su pueblo huntu kuné, esnan di mas kruel di e nashonnan, lo wòrdu tresí pa destruí e tera; anto nan lo saka nan spada kontra Egipto i yena e tera ku e mortonan.

30:12 Ademas, lo Mi hasi e kanalnan di Neil seka i bende e tera ku hòmbernan malbado. Lo Mi hasi e tera keda desolá, i tur loke tin den djé, pa medio di man di stranheronan; Ami, SEÑOR, a papia."

30:13 'Asina Señor DIOS ta bisa: "Lo Mi destruí e ídolonan tambe i pone un fin na e imagennan di Menfis. Anto lo no tin prens mas na tera di Egipto; i lo Mi pone temor den tera di Egipto.

30:14 I lo Mi hasi Patros keda desolá, sende Zoan na kandela, i ehekutá huisio riba Tebas.

30:15 I lo Mi drama Mi furia riba Sin, e lugá fortifiká di Egipto; tambe lo Mi kòrta e multitut di Tebas kit'afó.

30:16 Lo Mi sende Egipto na kandela. Sin lo trose den agonia; nan lo dal e muraya di Tebas kibra, i diariamente Menfis lo sufri angustia.

30:17 E hobennan di Aven i di Pibeset lo kai pa medio di spada, i e muhénan lo bai den koutiverio.

30:18 I na Tafnes dia lo ta skur, ora Mi kibra e baranan di e yugo di Egipto. E ora ei e orguyo di su poder lo kaba den djé; un nubia lo tap'é, i su yu muhénan lo bai den koutiverio.

30:19 Asina lo Mi ehekutá huisio riba Egipto, i nan lo sa ku Ami ta SEÑOR."'"

30:20 I a sosodé ku den e di diesun aña, den e promé luna, riba e di shete dia di e luna, e palabra di SEÑOR a yega na mi, bisando:

30:21 "Yu di hende, Mi a kibra brasa di Farao, rei di Egipto; i mira, e brasa no ta fahá pa e kura, ni lorá den verbant pa ta fuerte pa tene spada.

30:22 Pesei, asina Señor DIOS ta bisa: 'Mira, Mi ta kontra Farao, rei di Egipto, i lo Mi kibra su brasanan, tantu esun fuerte komo esun kibrá; i lo Mi hasi e spada kai for di su man.

30:23 Lo Mi plama e egipsionan entre e nashonnan i benta nan p'aki p'aya den e paisnan.

30:24 Pasobra lo Mi fortalesé e brasanan di rei di Babilonia i pone Mi spada den su man; anto lo Mi kibra e brasanan di Farao, asina ku e lo keha di doló su dilanti, manera un hòmber heridá ta keha.

30:25 Asina lo Mi fortalesé e brasanan di rei di Babilonia, ma e brasanan di Farao lo kai. E ora ei nan lo sa ku Ami ta SEÑOR, dia Mi pone Mi spada den man di rei di Babilonia i e ekstendé esaki kontra tera di Egipto.

30:26 Dia ku Mi plama e egipsionan entre e nashonnan i benta nan p'aki p'aya den e paisnan, nan lo sa ku Ami ta SEÑOR.'"

Ezikiel 29 Ezikiel 31