Eksodo 36
36:1
"Awor Bezaleel i Aholiab i tur persona eksperto, den kendenan SEÑOR a pone kapasidat i komprendementu pa sa kon pa hasi tur e trabou den konstrukshon di e santuario, mester hasi konforme tur loke SEÑOR a ordená."
36:2
E ora ei Moisés a yama Bezaleel i Aholiab i tur persona eksperto, den kendenan SEÑOR a pone kapasidat, kada un ku su kurason tabata konmov'é pa bin hasi e trabou.
36:3
I di Moisés nan a risibí tur e kontribushonnan ku e yunan di Israel a hiba pa hasi e trabou den konstrukshon di e santuario. I ainda e pueblo tabata sigui hiba ofrendanan boluntario p'é tur mainta.
36:4
I tur e hòmbernan eksperto ku tabata hasi tur trabou di e santuario a bin, kada un for di e trabou ku e tabata hasi,
36:5
i nan a bisa Moisés: "E pueblo ta hiba muchu mas ku sufisiente pa e trabou di konstrukshon ku SEÑOR a ordená nos pa hasi."
36:6
Pesei Moisés a duna òrdu, i un proklamashon a wòrdu pasá rònt den henter e kampamentu, bisando: "No laga ni hòmber ni muhé hasi ningun trabou mas pa e ofrendanan di e santuario." Asina nan a stòp e pueblo di hiba mas.
36:7
Pasobra e material ku nan tabatin tabata sufisiente, i mas ku sufisiente, pa tur e trabou ku mester a wòrdu hasí.
36:8
I tur e hòmbernan eksperto entre esnan ku tabata hasi e trabou a traha e tabernakel di dies kortina; di lino fini trosí i hilu blou, púrpura i skarlata, ku kerubin, e obra di un trahadó eksperto, Bezaleel a traha nan.
36:9
E largura di kada kortina tabata bint'i ocho kodo, i e hanchura di kada kortina, kuater kodo; tur e kortinanan tabatin e mesun midí.
36:10
I el a pega sinku kortina na otro, i e otro sinku kortinanan el a pega na otro.
36:11
I el a traha lùs koló blou na rant di e kortina ku tabata mas pafó den e promé sèt; i meskos el a hasi na rant di e kortina ku tabata mas pafó den e di dos sèt.
36:12
El a traha sinkuenta lùs den esun kortina i el a traha sinkuenta lùs na rant di e kortina ku tabata den e di dos sèt; e lùsnan tabata keda un enfrente di otro.
36:13
I el a traha sinkuenta hak di oro i a pega e kortinanan na otro ku e haknan, asina ku e tabernakel a keda tur na ún.
36:14
E ora ei el a traha kortina di lana di kabritu hasi nan un tènt pa tapa e tabernakel; el a traha diesun kortina na tur.
36:15
E largura di kada kortina tabata trinta kodo, i kuater kodo e hanchura di kada kortina; e diesun kortinanan tabatin e mesun midí.
36:16
I el a pega sinku kortina na otro i e otro seis kortinanan na otro.
36:17
Ademas, el a traha sinkuenta lùs na rant di e kortina ku tabata mas pafó den e promé sèt, i el a traha sinkuenta lùs na rant di e kortina ku tabata mas pafó den e di dos sèt.
36:18
I el a traha sinkuenta hak di bròns pa pega e tènt na otro, pa e keda tur na ún.
36:19
I el a traha un kapa pa e tènt di kueru di karné chubatu tiñá kòrá, i un kapa di kueru di dòlfein riba djé.
36:20
E ora ei el a traha e tablanan pa e tabernakel di palu di akasia, pará règt.
36:21
E largura di kada tabla tabata dies kodo i e hanchura di kada tabla, un kodo i mei.
36:22
Tabatin dos pènchi pa kada tabla, pa pega nan na otro; asina el a hasi ku tur e tablanan di e tabernakel.
36:23
I el a traha e tablanan pa e tabernakel: binti tabla pa e banda sùit;
36:24
i el a traha kuarenta pia di plata bou di e binti tablanan; dos pia bou di esun tabla pa su dos pènchinan i dos pia bou di e otro tabla pa su dos pènchinan.
36:25
Anto pa e di dos banda di e tabernakel, na e banda nòrt, el a traha binti tabla,
36:26
i nan kuarenta pianan di plata; dos pia bou di esun tabla i dos pia bou di e otro tabla.
36:27
I pa e parti patras di e tabernakel, na e parti pabou, el a traha seis tabla.
36:28
I el a traha dos tabla pa e skinanan di e tabernakel na e parti patras.
36:29
I abou nan tabata pegá na otro, i ariba pegá huntu ku un solo renchi. Asina el a traha nan dos pa e dos skinanan.
36:30
I tabatin ocho tabla ku nan pianan di plata, dieseis pia, dos bou di kada tabla.
36:31
Anto el a traha baranan di palu di akasia, sinku pa e tablanan di esun banda di e tabernakel,
36:32
i sinku bara pa e tablanan di e otro banda di e tabernakel, i sinku bara pa e tablanan di parti patras di e tabernakel, parti pabou.
36:33
I el a traha e bara meimei pa pasa dor di e tablanan, nèt meimei, di punta pa punta.
36:34
I el a fura e tablanan ku oro i a traha nan renchinan di oro pa tene e baranan kuné, i a fura e baranan ku oro.
36:35
Ademas, el a traha e velo di hilu blou, púrpura i skarlata, i lino fini trosí; el a trah'é ku kerubin, e obra di un trahadó eksperto.
36:36
I el a traha kuater pilar di palu di akasia p'é, i a fura nan ku oro, ku nan haknan di oro; i el a basha kuater pia di plata pa nan.
36:37
I el a traha un skèrm pa entrada di e tènt, di hilu blou, púrpura i skarlata, i lino fini trosí, obra di un wefdó-di-tela;
36:38
i el a traha su sinku pilarnan ku nan haknan, i el a fura nan kapitelnan i nan banchinan ku oro, ma nan sinku pianan tabata di bròns.