Eksodo 1

BSNP Edit

Eksodo 1

1:1 Awor esakinan ta e nòmbernan di e yunan di Israel ku a bin Egipto huntu ku Jakòb; kada un di nan a bin ku e hendenan di su kas:

1:2 Ruben, Simeon, Leví i Juda;

1:3 Isakar, Zabulon i Benjamin;

1:4 Dan i Nèftalí, Gad i Aser.

1:5 I e personanan ku a sali for di lomo di Jakòb tabata setenta na tur, ma Jose tabata na Egipto kaba.

1:6 I Jose a muri, i tur su ruman hòmbernan i henter e generashon ei.

1:7 Awor e yunan di Israel tabata fruktífero i a oumentá mashá i a multipliká bira masha poderoso mes, asina ku e tera a keda yen-yen di nan.

1:8 I a lanta un rei nobo na Egipto ku no tabata konosé Jose.

1:9 I el a bisa su pueblo: "Mira, e pueblo di e yunan di Israel ta mas tantu i mas poderoso ku nos.

1:10 Ban, laga nos trata nan ku sabiduria pa nan no multipliká, i den kaso di guera nan tambe uni nan mes ku esnan ku ta odia nos, i bringa kontra nos i bai for di e tera."

1:11 Pesei e egipsionan a pone kapatasnan riba nan pa afligí nan ku trabou pisá. I nan a traha pa Farao statnan di depósito, Piton i Ramesés.

1:12 Ma mas nan tabata afligí nan, mas nan tabata multipliká i mas nan tabata plama, asina ku e egipsionan tabata teme e yunan di Israel.

1:13 I e egipsionan tabata obligá e yunan di Israel pa traha rigorosamente;

1:14 i nan tabata amargá nan bida ku trabou pisá di trahamentu ku klei i klenku i ku tur sorto di trabou den kunuku, tur e trabou ku rigorosamente nan tabata imponé riba nan.

1:15 E ora ei rei di Egipto a papia ku e parteranan hebreo, di kualnan esun tabata yama Sifra i e otro Púa;

1:16 i el a bisa: "Ora boso ta yuda e muhénan hebreo haña yu i boso ta mira nan riba banki di parto, e ora ei si ta yu hòmber, boso mester mat'é, ma si ta yu muhé, e mester keda na bida."

1:17 Ma e parteranan tabata teme Dios i no tabata hasi manera rei di Egipto a ordená nan, ma a laga e mucha hòmbernan keda na bida.

1:18 Pesei rei di Egipto a manda yama e parteranan i a bisa nan: "Pakiko boso a hasi e kos aki i a laga e mucha hòmbernan keda na bida?"

1:19 I e parteranan a bisa Farao: "Pasobra e muhénan hebreo no ta manera e muhénan egipsio; nan ta balente, i nan ta duna lus promé ku partera yega serka nan."

1:20 Asina Dios a trata bon ku e parteranan, i e pueblo a multipliká bira masha poderoso.

1:21 I a sosodé ku pasobra e parteranan tabata teme Dios, El a duna nan un famia.

1:22 E ora ei Farao a ordená henter su pueblo, bisando: "Tur yu hòmber ku nase boso mester tira den Neil, i tur yu muhé boso mester laga keda na bida."

Genesis 50 Eksodo 2