Efesionan 5

BSNP Edit

Efesionan 5

5:1 Pesei, sea imitadónan di Dios, manera yunan stimá;

5:2 i kana den amor, meskos ku Cristo tambe a stima boso, i a entregá Su mes pa nos, un ofrenda i un sakrifisio na Dios komo un holó dushi.

5:3 Ma no laga inmoralidat òf kualkier sorto di impuresa òf golosidat ni wòrdu mentá mes meimei di boso, manera ta pas pa santunan,

5:4 ni sushedat, ni papiamentu di ko'i loko, ni chansanan bulgar, ku no ta pas, ma mas bien duna gradisimentu.

5:5 Pasobra esaki boso sa ku siguridat, ku ningun fornikadó, persona impuru òf hende kudisioso, ku ta un adoradó di dios falsu, no tin erensia den e reino di Cristo i Dios.

5:6 No laga ni un hende gaña boso ku palabra bano, pasobra ta pa motibu di e kosnan aki e furia di Dios ta bin riba e yunan di desobedensia.

5:7 Pesei, no sea partisipante huntu ku nan.

5:8 Pasobra antes boso tabata skuridat, ma awor boso ta lus den Señor; kana komo yunan di lus

5:9 (pasobra e fruta di e lus ta konsistí di tur bondat i hustisia i bèrdat),

5:10 tratando di siña loke ta agradabel na Señor.

5:11 I no partisipá den e obranan infruktífero di skuridat, sino mas bien eksponé nan;

5:12 pasobra ta bèrguensa asta pa papia di e kosnan ku nan ta hasi na sekreto.

5:13 Ma tur kos ta bira visibel ora nan wòrdu eksponí dor di lus, pasobra tur kos ku bira visibel ta lus.

5:14 Pa e motibu aki ta wòrdu bisá: "Spièrta, abo ku ta drumi, i lanta for di e mortonan, i Cristo lo lusa riba bo."

5:15 Pesei, mira bon kon boso ta kana, no manera hende bobo, ma manera hende sabí,

5:16 hasiendo bon uzo di boso tempu, pasobra e dianan ta malu.

5:17 Pesei anto, no sea bobo, ma komprendé kiko ta e boluntat di Señor.

5:18 I no bebe biña bira burachi, pasobra esei ta libertinahe, ma sea yená ku e Spiritu,

5:19 papiando ku otro den salmo i himno i kantika spiritual, kantando i hasiendo melodia na Señor den boso kurason,

5:20 semper dunando gradisimentu na Dios Tata pa tur kos den e nòmber di nos Señor Jesu-Cristo;

5:21 i sea sumiso na otro den e temor di Cristo.

5:22 Esposanan, sea sumiso na boso mes esposo, manera na Señor.

5:23 Pasobra e esposo ta kabes di e esposa, meskos ku Cristo tambe ta kabes di e iglesia, E mes siendo Salbador di e kurpa.

5:24 Ma meskos ku e iglesia ta sumiso na Cristo, asina tambe e esposanan mester ta sumiso na nan esposo den tur kos.

5:25 Esposonan, stima boso esposa, meskos ku Cristo tambe a stima e iglesia i a entregá Su mes p'é,

5:26 pa E santifik'é despues di a purifik'é pa medio di e labamentu di awa ku e palabra,

5:27 pa E presentá na Su mes e iglesia den tur su gloria, sin mancha ni ploi ni nada paresido, ma pa é por ta santu i sin kulpa.

5:28 Asina esposonan tambe mester stima nan esposa manera nan mes kurpa. Esun ku ta stima su esposa ta stima su mes;

5:29 pasobra nunka ni un hende no a odia su mes karni, ma ta aliment'é i ta kuid'é, meskos ku Cristo tambe ta hasi ku e iglesia,

5:30 pasobra nos ta miembronan di Su kurpa, di Su karni i di Su wesunan.

5:31 Pesei un hòmber lo bandoná su tata i su mama, i lo uni ku su esposa; i nan lo bira ún karni.

5:32 E misterio aki ta grandi, ma mi ta papia tokante di Cristo i e iglesia.

5:33 Asina anto, laga kada un di boso tambe stima su esposa manera su mes; i e esposa pèrkurá pa e respetá su esposo.

Efesionan 4 Efesionan 6