Deuteronomio 32

BSNP Edit

Deuteronomio 32

32:1 "Skucha, O shelunan, i lagami papia; i laga tera tende e palabranan di mi boka.

32:2 Laga mi siñansa kai manera awaseru, mi diskurso gotia manera serena, manera gota di awa riba yerba fresku i manera awaseru ta basha riba yerba di speserei.

32:3 "Pasobra mi ta proklamá e nòmber di SEÑOR; atribuí grandesa na nos Dios!

32:4 E Baranka! Su obra ta perfekto, pasobra tur Su kamindanan ta hustu; un Dios di fieldat i sin inhustisia, hustu i rekto E ta.

32:5 "Nan a aktua na manera korupto pa kunE, nan no ta Su yunan, pa motibu di nan defekto; ma nan ta un generashon pèrvèrso i malbado.

32:6 T'asina bo ta paga SEÑOR, O pueblo loko i bobo? No ta E ta bo Tata ku a kumprabo? Ta E a trahabo i stablesébo.

32:7 "Kòrda e dianan di promé aya, konsiderá e añanan di tur generashon. Puntra bo tata, i e lo kontabo, bo ansianonan, i nan lo bisabo.

32:8 Tempu ku e Haltísimo a duna e nashonnan nan erensia, tempu ku El a separá e yunan di hende, El a pone e markanan di frontera di e pueblonan konforme e kantidat di e yunan di Israel.

32:9 Pasobra SEÑOR Su porshon ta Su pueblo; Jakòb ta e parti di Su erensia.

32:10 "El a hañ'é na un tera di desierto, i den abandono di horibel soledat; El a rondon'é, El a pèrkurá p'é, El a ward'é manera Su pret'i wowo.

32:11 Manera un águila ku ta aktivá su neishi, ku ta zwef riba su puitunan, El a habri Su halanan i a kohe nan, El a karga nan riba Su plumanan.

32:12 SEÑOR so tabata gui'é, i no tabatin ningun dios stranhero huntu kuné.

32:13 "El a hasié kabalgá riba e lugánan haltu di tera, i el a kome e kosecha di kunuku; i El a hasié chupa miel for di baranka, i zeta for di piedra duru,

32:14 lechi kuahá di baka i lechi di karné, ku vèt di lamchi, i karné chubatu, di e kria di Basan, i kabritu, ku e mihó di e trigo; i di e sanger di wendrùif bo a bebe biña.

32:15 "Ma Jesurun a bira gordo i a sapatiá-- bo a bira gordo, diki, i ta lombra di manteka-- e ora ei el a bandoná Dios, Kende a trah'é, i a despresiá e Baranka di su salbashon.

32:16 Nan a hasiE yalurs ku diosnan stranhero; ku abominashonnan nan a probok'E na rabia.

32:17 Nan a ofresé sakrifisio na demoñonan, no na Dios, na diosnan ku nan no a konosé, diosnan nobo ku a bin últimamente, pa kendenan bo tatanan no tabatin temor.

32:18 Bo a neglishá e Baranka ku a engendrábo, i a lubidá e Dios ku a dunabo bida.

32:19 "I SEÑOR a mira esaki i a rechasá nan, pa motibu di e probokashon di Su yu hòmbernan i yu muhénan.

32:20 E ora ei El a bisa: 'Lo Mi skonde Mi kara pa nan i mira kiko nan fin lo ta; pasobra nan ta un generashon pèrvèrso, yunan den kendenan no tin fieldat.

32:21 Nan a hasiMi yalurs ku loke no ta Dios; nan a probokáMi na rabia ku nan ídolonan. Pesei lo Mi hasi nan yalurs ku esnan ku no ta un pueblo; lo Mi proboká nan na rabia ku un nashon bobo,

32:22 pasobra un kandela a wòrdu sendí den Mi rabia, i ta kima te na e profundidat di Seol, i ta kaba ku tera huntu ku loke e ta produsí, i ta sende e fundeshinan di e serunan na kandela.

32:23 'Lo Mi montoná desaster riba nan; lo Mi tira mi flechanan riba nan.

32:24 Hamber lo kaba ku nan, i plaga i destrukshon amargo lo devorá nan, i lo Mi manda djente di bestia riba nan, ku veneno di loke ta lastra den stòf.

32:25 Pafó spada lo destruí, i paden spantu-- tantu hoben komo birgen, yu na pechu komo hòmber ku kabei blanku.

32:26 Lo Mi a bisa: "Lo Mi kòrta nan na pida-pida, lo Mi kita e rekuèrdo di nan for di hende,"

32:27 si Mi no tabatin temor di e probokashon di e enemigu, pa nan atversarionan no komprendé robes, pa nan no bisa: "Nos man ta triunfá, i no ta SEÑOR a hasi tur esaki."'

32:28 "Pasobra nan ta un nashon ku falta konseho, i no tin komprendementu den nan.

32:29 Mara nan tabata sabí, ku nan lo a komprendé esaki, ku nan lo a tene kuenta ku e fin ku ta spera nan.

32:30 Kon ún so por pèrsiguí mil, i dos pone dies mil hui, si no ta nan Baranka a bende nan, i SEÑOR a entregá nan?

32:31 Di bèrdat, nan baranka no ta manera nos Baranka, nos enemigunan mes ta huzga esaki.

32:32 Pasobra nan mata di wendrùif ta bin for di e mata di wendrùif di Sodoma, i for di e kunukunan di Gomora; nan wendrùifnan ta wendrùifnan venenoso, nan tròshinan ta marga.

32:33 Nan biña ta veneno di kolebra, i veneno kruel di kobra.

32:34 'No ta serka Mi e ta wardá, seyá den Mi lugánan di warda tesoro?

32:35 Vengansa ta di Mi, i rekompensa, na su debido tempu nan pia lo slep; pasobra e dia di nan kalamidat ta serka, i e kosnan prepará pa nan ta bin rápido riba nan.'

32:36 "Pasobra SEÑOR lo huzga Su pueblo, i lo tin kompashon ku Su sirbidónan, ora ku E mira ku nan forsa a kaba, i ku no a keda ningun hende, ni katibu, ni liber.

32:37 I E lo bisa: 'Unda nan diosnan ta, e baranka den kual nan a buska refugio?

32:38 Ken a kome e vèt di nan sakrifisionan, i a bebe e biña di nan ofrenda di bibida? Laga nan lanta yudabo, laga nan ta bo lugá di skonde!

32:39 'Mira awor ku ta Ami, Ami ta E, i no tin ningun dios fuera di Mi; ta Ami ta mata i ta duna bida. Ta Ami a heridá i ta Ami ta Esun ku ta kura; i no tin ningun hende ku por libra for di Mi man.

32:40 Di bèrdat, Mi ta halsa Mi man na shelu, i ta bisa: Manera Mi ta biba pa semper,

32:41 si Mi sleip Mi spada ku ta briya manera lamper, i Mi tene huisio den Mi man, lo Mi tuma vengansa riba Mi atversarionan, i lo Mi paga bèk esnan ku ta odiaMi.

32:42 Lo Mi hasi Mi flechanan burachi ku sanger, i Mi spada lo devorá karni, ku e sanger di esnan matá i di e katibunan, di e kabesnan ku kabei largu di e enemigu.'

32:43 "Regosihá, O nashonnan, huntu ku Su pueblo; pasobra E lo venga e sanger di Su sirbidónan, i lo tuma vengansa riba Su atversarionan, i lo hasi ekspiashon pa Su tera i pa Su pueblo."

32:44 E ora ei Moisés a bin i a resitá tur e palabranan di e kantika aki pa e pueblo tende, é, huntu ku Josué, yu hòmber di Nun.

32:45 Ora Moisés a kaba di resitá tur e palabranan pa henter Israel,

32:46 el a bisa nan: "Paga bon tino na tur e palabranan ku mi ta spièrta boso kuné awe, ku boso lo ordená boso yunan pa pèrkurá di kumpli ku nan, tur e palabranan di e lei aki.

32:47 Pasobra esaki no ta un palabra bashí pa boso; di bèrdat, esaki ta boso bida. I pa medio di e palabra aki boso lo prolongá boso dianan na e tera ku boso ta bai krusa Jordan pa poderá di djé."

32:48 I SEÑOR a papia ku Moisés riba e mesun dia ei, bisando:

32:49 "Subi bai riba e seru di Abarim aki, riba Seru Nebo, ku ta keda na tera di Moab, enfrente di Jeriko, i wak e tera di Kanaan, ku Mi ta duna e yunan di Israel komo propiedat,

32:50 i muri riba e seru ku bo ta subi, i wòrdu reuní ku bo pueblo, meskos ku Aaron, bo ruman, a muri riba Seru Hor i a wòrdu reuní ku su pueblo,

32:51 pasobra boso a peka kontra Mi meimei di e yunan di Israel banda di e awanan di Meriba di Kades, den e desierto di Zin, pasobra boso no a santifikáMi meimei di e yunan di Israel.

32:52 Pasobra lo bo mira e tera na un distansia, ma lo bo no bai ayanan, den e tera ku Mi ta duna e yunan di Israel."

Deuteronomio 31 Deuteronomio 33