Daniel 1
1:1
Den e di tres aña di e reinado di Joakim, rei di Juda, Nabukodonosor, rei di Babilonia, a bin Jerusalèm i a rondon'é.
1:2
I Señor a entregá Joakim, rei di Juda, den su man, huntu ku algun di e artíkulonan-di-uzo di e kas di Dios; i el a hiba nan na tera di Sinar, na e kas di su dios, i a pone e artíkulonan-di-uzo den e lugá-di-warda-tesoro di su dios.
1:3
E ora ei rei a ordená Aspenaz, hefe di su eunukonan, pa trese algun di e yunan di Israel i algun di e famia real i di e nobelnan,
1:4
hobennan ku no tabatin ningun defekto, ku tabata di bon aparensia, ku tabatin inteligensia den tur ramo di sabiduria, ku tabata yen di komprendementu i konosementu pa diserní, i ku tabatin abilidat pa sirbi den rei su korte; i el a orden'é pa siña nan e literatura i idioma di e kaldeonan.
1:5
I rei a duna òrdu pa nan haña un provishon diario di e mihó kuminda di rei i di e biña ku rei tabata bebe, i tambe pa nan haña un edukashon di tres aña, na fin di kual nan mester a drenta e sirbishi personal di rei.
1:6
Awor entre nan tabatin Daniel, Ananias, Misael i Azarias, di e yu hòmbernan di Juda.
1:7
Anto e hefe di e eunukonan a duna nan un nòmber nobo; i Daniel el a duna e nòmber Beltsasar, Ananias Sadrak, Misael Mesak i Azarias Abed-nego.
1:8
Ma Daniel a proponé den su kurason di no kontaminá su mes ku e mihó kuminda di rei, ni ku e biña ku rei tabata bebe; pesei el a pidi hefe di e eunukonan pèrmit pa e no tin mester di kontaminá su mes.
1:9
Awor Dios a hasi ku Daniel a haña grasia i kompashon den bista di e hefe di e eunukonan,
1:10
i e hefe di e eunukonan a bisa Daniel: "Mi tin miedu di señor mi rei, kende a duna òrdu tokante di boso kuminda i boso bibida; pasobra pakiko e mester mira boso kara ta mustra mas blek ku kara di e hobennan di boso edat? E ora ei boso lo pone mi kabes na peliger dilanti di rei."
1:11
Ma Daniel a bisa e mayordomo ku e hefe di e eunukonan a nombra riba Daniel, Ananias, Misael i Azarias:
1:12
"Pa fabor, pone bo sirbidónan na prueba pa dies dia, i laga nan duna nos bèrdura pa kome i awa pa bebe.
1:13
E ora ei, laga nos aparensia wòrdu kompará ku aparensia di e hobennan ku ta kome e mihó kuminda di rei; i trata ku bo sirbidónan konforme loke bo ta mira."
1:14
Asina el a skucha nan den e asunto aki i a pone nan na prueba pa dies dia.
1:15
I na fin di dies dia nan aparensia tabata mustra mihó i nan tabata den mihó kondishon ku tur e hobennan ku tabata kome e mihó kuminda di rei.
1:16
Pesei e mayordomo a sigui kita nan porshon di e mihó kuminda i e biña ku nan mester a bebe, i a sigui duna nan bèrdura.
1:17
I na e kuater hobennan aki Dios a duna konosementu i inteligensia den tur ramo di literatura i sabiduria; i Daniel tabata komprendé tur sorto di vishon i soño.
1:18
Anto na fin di e dianan, ora rei a bisa pa presentá nan, e hefe di e eunukonan a presentá nan dilanti di Nabukodonosor.
1:19
I rei a papia ku nan, i den nan tur no a wòrdu hañá ni un manera Daniel, Ananias, Misael i Azarias; asina nan a drenta e sirbishi personal di rei.
1:20
I den tur asunto di sabiduria i komprendementu ku rei tabata konsultá ku nan, e tabata haña nan dies bes mihó ku tur e magonan i astrólogonan ku tabatin den henter su reino.
1:21
I Daniel a keda einan te na e promé aña di rei Siro.